HESEKIEL 26
26
Tiro ta hunganekwa
1Mesiku lyotango lyomwedhi gwomumvo omutimulongo nogwotango guupongekwa wetu, Omuwa okwa lombwele ndje a ti: 2“Muna gwomuntu, shika osho sha nyanyudha aantu yomuTiro. Otaa igidha taa ti: ‘Jerusalem osha teyagulwa po! Aahalithi yasho oya kana! Itashi ka hakana we omaliko getu!’
3“Ngashingeyi ngame, Omuwa Omupangeliawike, otandi ti: Shilando Tiro, ngame omutondi gwoye. Otandi ka eta iigwana oyindji, yi ku ponokele; otayi ya ya fa omakuthikuthi gefuta. 4Otaa ka kumuna po omakuma goshilando shoye notaa hanagula po ooshungo dhoye. Opo ihe tandi ka komba po ontsi ayihe e tandi thigi po omamanya ga kwehuka. 5Aayuli yoohi otaa ka aneka po iiyulitho yawo pontuntu mpoka wa li. Ongame, Omuwa Omupangeliawike, nda popi. Iigwana otayi ka yuga Tiro, 6naamboka ya kala momikunda dhasho kooha dhefuta, otayi ke ya dhipaga po nomagongamwele gayo. Nena Tiro ota ka tseya kutya ongame Omuwa.”
7Omuwa Omupangeliawike ota ti: “Otandi ka tala omukwaniilwa omunene kwaayehe — omukwaniilwa gwaBabilonia Nebukadnezzar — a homone Tiro. Ote ya ziilile kuumbangalantu netangakwiita enene li na aakayilinkambe. 8Oomboka ya kala momikunda dhokooha dhefuta, otaa ka dhipagelwa molugodhi. Aatondi otaa fulu omikanka, otaa tungu omutuni gwekondekela e taye ku yeluthile omahuuyanza ye ku kondjithe. 9Otaa ka nyanyula omakuma goye niikumunithi yomakuma notaa hanagula po ooshungo dhoye niitago yiiyela. 10Oshikogo shontsi ya tukulwa kuukambe wawo, otashi ku kwidhidhike. Oshihomo shuukambe wawo tau hili omatemba nomatembakwiita, otashi ka kakamitha omakuma goye, nge taa pitile miiyelo yomakulukuma goshilando shoye. 11Aakayilinkambe yawo otaa mbolokotele momapandaanda goye, taa dhipaga aantu yoye nomagongamwele. Oongudhi dhoye oonene otadhi ka undulilwa pevi. 12Aatondi yoye otaye ki ikutha ko nuuyamba woye niipindikwa yoye. Otaa ka undulila omakuma goye pevi e taa mbonyona po omagumbo goye guuyamba. Otaa ka kutha po oondhopi, iipilangi niitandu ayihe noku yi ninginitha mefuta. 13Otandi ka hulitha po omaimbilo goye agehe notandi ka mweneka ewi lyuuharpa woye. 14Otandi thigi po ashike emanya ethenu, mpoka aayuli yoohi taa aneke iiyulitho yawo yoohi. Oshilando itashi ka tungululwa we. Ongame, Omuwa Omupangeliawike, nda popi.”
15Omuwa Omupangeliawike ota lombwele oshilando Tiro ta ti: “Nge wa sindika, aantu mboka ya kunkula nomunkulo gwefuta, otaa ka haluka keuyagano lyaamboka taa dhipagwa. 16Aakwaniilwa ayehe yiigwana yaayendifuta otaa ka kuluka ko kiipangelapundi yawo. Otaa ka hula mo oonguwo nomalwaakani gawo guulenga yo taa kuutumba mevi taa kakama. Otaa ka haluka keadhiko lyoye, notaa ka nyengwa okwiidhidhimika mokukakama kwawo. 17Otaye ke ku imbila eimbilo ndika lyoosa taa ti:
Shilando wa simana, owa kumunwa po!
Oosikepa dhoye odha kombwa mo mefuta.
Aanashilando yoye oya pangelele omafuta
noya halutha ayehe pomunkulofuta.
18Nena, omesiku ndika wa teka po,
oontuntu otadhi kakama,
aakalimo noya kunkwa kehanagulo ndika.”
19Omuwa Omupangeliawike ota ti: “Otandi ku ningi oshilando sha mbugala shaa na aantu. Otandi ku siikile nuulemeya wefuta. 20Otandi ke ku fala mwi, muuyuni wokuusi, u ka tsakanene naakulu yonale. Otandi ke ku kaleka muuyuni womohi mokati komakulukuma gaaluhe, u ka hangane naambeyaka yomuusi. Otashi ti nduno, ito ka kala we oshilando shi na aantu, u kale ando mokati kiilando yaanamwenyo. 21Otandi ke ku ninga oshiholelwa shehalutho, notali ka eta ehulilo lyoye. Aantu otaye ke ku konga, ihe ito ka monika we.” Omuwa Omupangeliawike oye a popi.
Currently Selected:
HESEKIEL 26: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
