ESTER 7
7
1Osho ngaaka omukwaniilwa naHaman ya yi, ya ka lye naEster 2olutiyali. Manga taa nu omaviinu, omukwaniilwa okwa pula Ester a ti: “Munyekadhi Ester, owa hala shike? Lombwela ndje, ongame notandi shi ku pe. Otandi gwanitha eindilo lyoye, nando li pule ndje etata lyoshilongo shandje.”
3Omunyekadhi Ester okwa yamukula a ti: “Nkeyama, ngele otashi ku opalele, otandi ku indile neifupipiko, u zimine, ndi kale nomwenyo, noshigwana shandje shi kale nomwenyo. 4Tse noshigwana shetu otwa landithilwa po okuhanagulwa po, okudhipagwa nokukombwa po. Ando twa landithwa po ashike aapika, ando nde shi mwenene, oshoka kashi shi sha shokukudhila omukwaniilwa.”
5Omukwaniilwa Kserkses okwa pula omunyekadhi Ester: “Olye ano ta ningi iihuna mbika? Omuntu ngoka oku li peni?”
6Ester okwa yamukula a ti: “Omutondi gwetu, omuhepeki gwetu, ye oye oshiponga shetu, oHaman!”
Haman okwa tongolola omukwaniilwa nomunyekadhi Ester a kankwa. 7Omukwaniilwa okwa yambuka po a thita po kondjahi. Okwa zi mo moshinyanga e ta yi pondje koshikunino shuuwa shokuvululukilwa. Haman okwa mono kutya omukwaniilwa okwa tokola oku mu geela, onkee a kala po ta galikana Ester omolwomwenyo gwe. 8Okwa adhika opo ti iyumbile komeho goshipundi shaEster ti indile ombili, omukwaniilwa sho a galukile moshinyanga okuza koshikunino. Omukwaniilwa sho e shi mono, okwi igidha a ti: “Omuntu nguka ota thiminike omunyekadhi nokuli montaneho yandje, muuwa wandje mwene?”
Omukwaniilwa manga inaa mana okupopya ndhika, yo aapiya ye aathonwantu oya siikila nale Haman koshipala. 9Gumwe gwomuyo, edhina lye Harbona, okwa ti: “Nkeyama, pongulu yaHaman ope na ohake yi na omutumbo gwoondya omilongo ntano e yi dhikile Mordekai, ngoka a hupitha omwenyo gwoye.”
Omukwaniilwa okwa ti: “Tulii ko Haman.”
10Osho ngaaka Haman a tulwa kohake ndjoka a li e yi dhikile Mordekai. Nena ondjahi yomukwaniilwa oya polo.
Oshindonga Bible © Bible Society of Namibia, 2008.