ESTER 2
2
Ester ta ningi omunyekadhi
1Konima yethimbo, ondjahi yomukwaniilwa sho ya adhika ya lota, okwa dhiladhila shoka Vashti e shi ningi neutho ndyoka lya gandjwa omolwe. 2Gamwe gomomalenga gomukwaniilwa gopothingo oga ti: “Omukwaniilwa na kongelwe aakadhona ya shitika. 3Nkeyama, oto vulu okulangeka omalenga moshitopolwa kehe shoshilongo e to ga lombwele, ga ete aakadhona aawanawa komuhandjo gwaanyekadhi yoye muka muSusa. Naa tulwe metonatelo lyaHegai, omuthonwantu ngoka ha tonatele aanyekadhi yoye nembonzolo lyawo. 4Nena oto kutha po omukadhona ngoka we mu hokwa unene, oye a ninge omunyekadhi peha lyaVashti.”
Ondunge ndjika oyo opalele omukwaniilwa, nokwe yi landula.
5MuSusa omwa li Omujuda edhina lye Mordekai yaJair yaShimei yaKish gwomezimo lyaBenjamin. 6Nebukadnezzar, omukwaniilwa gwaBabilonia, sho a falele omukwaniilwa gwaJuda Jehoiakin muupika pamwe noonkwatwa dhilwe muJerusalem, mongundu ndjoka omwa li wo Mordekai. 7Okwa li nomwanagona Ester, edhina lye mOshihebeli oHadassa. Ester okwa li omukadhona o opala e na ondjelo ombwanawa. Aakuluntu ye sho ya si, Mordekai okwe mu kutha po e te mu putudha ongomwana omukadhona.
8Omukwaniilwa sho a gandja eutho lye, naakadhona oyendji oye etwa muSusa, Ester okwa li mokati kawo. Naye wo a tulwa moshimpwiyu shaHegai, ngoka ha tonatele omuhandjo gwaanyekadhi. 9Hegai okwa hokwa Ester nokwe mu opalele. Mbalambala okwa tameke embonzolitho lye e te mu pe iikulya ya sheywa. Okwe mu pe wo aayakuli yaheyali aahogololwa nelugo dhingi momuhandjo gwaanyekadhi.
10Ester ina holola kutya oye Omujuda, oshoka Mordekai okwa li e mu indike oku shi ninga. 11Esiku nesiku Mordekai okwa li te ende pondje yehale lyomuhandjo gwaanyekadhi, opo a kundane, ngele Ester oku li nawa naashoka she mu ningilwa.
12Omukadhona manga inaa falwa komukwaniilwa, okwa mbonzolwa oomwedhi omulongo nambali: muule woomwedhi hamano okwa thetwa nomagadhi gomira noomwedhi hamano nomagadhi gokanakamuma niinima yilwe yuutiko. 13Sho ta zi momuhandjo gwaanyekadhi u uka mombala, ota vulu okuzala ngaashi a hala. 14Oha yi mo ongulohi, nongula nge kwa shi, ota falwa komuhandjo omukwawo e ta kala moshimpwiyu shaShaashgas, omuthonwantu gwokutonatela aakiintu yopooha. Ita yi we komukwaniilwa, shila omukwaniilwa e mu hokwa e te mu ithana kedhina.
15Olufo lwaEster olwe ya okuya komukwaniilwa. Ester olyaAbihail, omwanagona gwaMordekai, ngoka e mu taamba a ninge omwana. Ester okwa ziminwa kukehe ngoka e mu tsu keho. Sho a yi, okwa zala ngaashi a lombwelwa kelenga Hegai, ndyoka hali tonatele omuhandjo gwaanyekadhi. 16Ester okwa falwa komukwaniilwa Kserkses momwedhi omutimulongo, omwedhi Tebet, momumvo omutiheyali gwepangelo lye. 17Omukwaniilwa okwe mu hokwa unene shi vule aakiintu ayehe, nokwa li e mu opalela shi vule aakadhona ayehe. Omukwaniilwa okwe mu zaleke uulenga womunyekadhi komutse gwe e te mu ningi omunyekadhi peha lyaVashti. 18Mokusimaneka Ester, omukwaniilwa okwe mu ningile omatelekela e ta hiya aakwanepangelo noongoloneya ye ayehe. Okwa utha ongondji moshilongo ashihe nokwa gandja omagano gopakwaniilwa.
Mordekai ta hupitha omukwaniilwa
19Mordekai okwa adhika a pewa iilonga yontumba kehale lyuuwa, aakadhona sho ya li taa gongelwa olutiyali. 20Ester okwa li inaa holola manga ezimo nuukwashigwana we, oshoka Mordekai okwa li e mu indike oku shi ninga, naEster okwa vulika kuye, ngaashi a li ha vulika muunona we.
21Methimbo ndyoka Mordekai a taamba iilonga muuwa, Bigtan naTeresh, yaali yomaalangeli yopomiyelo dhoongulu dhomukwaniilwa, oya geele omukwaniilwa noyu uvanene, ye mu dhipage ofuthi. 22Mordekai okwe shi koneke e ta yakele ko omunyekadhi Ester, ngoka a lombwele omukwaniilwa shoka Mordekai a dhimbulula. 23Oshinima osha konakonwa nosha monika mo kutya oshoshili, onkee aalumentu ayehe yaali oya tulwa kohake. Omukwaniilwa okwa nyolitha oshiningwanima shika mondjokonona yoshilongo.
Currently Selected:
ESTER 2: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.