DEUTERONOMIUM 6
6
Oshipango oshinene
1“Ndhika odho oompango ndhoka Omuwa Kalunga keni e dhi lombwele ndje, ndi mu nongeke. Vulikeni kudho mevi ndyoka tamu ke li lala. 2Omasiku agehe manga mu na omwenyo, one nomaluvalo geni mu na okusimaneka Omuwa Kalunga keni nokuvulika koompango dhe adhihe ndhoka tandi dhi mu pe, opo mu kale mu na omwenyo omule moshilongo shoka. 3Aaisraeli, dhi pulakeneni ano, ne mu dhi dhiginine nawa! Nena otamu ka kala nawa e tamu ningi oshigwana oshinankondo nokukala mevi ndyoka lya tondoka omahini nomagadhi goonyushi, ngaashi Omuwa Kalunga koohokulu u uvaneke.
4“Israel, pulakena! Omuwa Kalunga ketu oye awike Kalunga. 5Ano hola Omuwa Kalunga koye komutima gwoye aguhe, komwenyo gwoye aguhe nonoonkondo dhoye adhihe. 6Ino dhimbwa oohapu ndhika tandi dhi ku lombwele nena. 7Dhi nongeka aamwoye. Dhi hokolola, uuna u li moyaandjeni nuuna u li mepola, uuna to vululukwa nuuna to longo. 8Nadhi kale edhimbulukitho lya fa lya mangelwa koshikaha shoye nenge li li moshipala shoye. 9Dhi nyolela miikulo yomiyelo dhegumbo lyoye nomuuyanda.”
Okwaavulika
10“Uuna Omuwa Kalunga koye te ku fala mevi ndyoka e li uvanekele oohokulu Abraham, Isak naJakob, oto ka pewa iilando iinene noyo opala mbyoka inoo yi tunga. 11Oto ka pewa omagumbo gu udha omaliko omawanawa inoo ga pungula mo, omithima inoo dhi hupa, iitsambe yomiviinu niikunino yomiolivi inoo dhi tsika. Omuwa nge te ku fala mevi ndyoka, noto kala u na ayihe wa hala okulya, 12kotoka tuu, waa dhimbwe Omuwa ngoka e ku tembudha muEgipiti, moka wa li omupika. 13Tila Omuwa Kalunga koye, mu longela oye awike, nokuuvaneka omauvaneko goye medhina lye amuke. 14Ino longela ookalunga yalwe, oomboka yiigwana ye ku kunduka. 15Ngele to longele ookalunga yalwe, ondjahi yOmuwa otayi ku hwamene ya fa omulilo tagu ku lungunitha po thiluthilu, oshoka Omuwa Kalunga koye, ngoka e li pungoye, oye omulaadhi.
16“Ino hinda Omuwa Kalunga koye, ngaashi we shi ningi puMassa. 17Dhiginina iipango ayihe mbyoka Omuwa e yi ku pe nomikalo nomautho ge agehe. 18Gwanitha shoka shu uka nosho opalela Omuwa. Nena ayihe otayi kala nawa, noto ka vula okuya mo nokulala evi ndyoka ewanawa Omuwa u uvanekele oohokulu. 19Noto ka tidha mo aatondi yoye, ngaashi u uvaneke.
20“Komongula omumwoye nge te ku pula ta ti: ‘Omolwashike Omuwa Kalunga ketu a gandja omikalo, omautho noompango ndhika adhihe kune?’ 21Mu yamukula u tye: ‘Otwa li aapika yomukwaniilwa gwaEgipiti, ihe Omuwa okwe tu tembudha mo noshikaha she shoonkondo. 22Otwa mono nomeho getu yene iilongandhindhiliko niinyengandunge iinene niitilithi ya ningilwa Aayegipiti, omukwaniilwa gwawo nomalenga ge agehe. 23Okwe tu mangulula muEgipiti nokwe tu eta huka e te tu pe evi ndika, ngaashi u uvanekele ootatekulu nokugana. 24Omuwa Kalunga ketu okwe tu lombwele tu dhiginine omautho ngaka agehe noku mu tila. Ngele otatu shi ningi, ota ka tonatela aluhe oshigwana shetu e te shi kaleke melago. 25Ngele otatu vulika shili kiipango mbika ayihe Omuwa Kalunga ketu e tu lombwele, ota kala e na ombili natse.’ ”
Currently Selected:
DEUTERONOMIUM 6: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
