DEUTERONOMIUM 4
4
Moses ta thiminikile Israel evuliko
1“Aaisraeli, vulikeni koompango adhihe tandi dhi mu nongeke, opo mu kale mu na omwenyo nomu ka lale evi ndyoka Omuwa Kalunga koohokulu te li mu pe. 2Inamu gwedha ko sha koohapu ndhoka tandi dhi mu lombwele, ne inamu kutha mo sha. Vulikeni kiipango yOmuwa Kalunga keni mbyoka nde yi mu pe. 3Omwa mono ne yene shoka Omuwa a ningi pondundu Peor. Okwa yono po ayehe mboka ya longele Baal, oshikalunga shaPeor. 4Ihe ne amuhe mboka mwa dhiginine okwiinekela Omuwa Kalunga keni, omu na omwenyo sigo ongashingeyi.
5“Onde mu nongeke oompango adhihe, ngaashi Omuwa a lombwele ndje ndi shi ninge. Vulikeni kudho mevi ndyoka tamu ka kwata po. 6Vulikeni kudho ne mu dhi dhiginine, notashi ulukile iigwana yilwe kutya ne aanandunge. Shampa taa kundana oompango adhihe ndhika, otaa ka tya: ‘Oshigwana shika oshi na uunongo noondunge dhi thike peni!’
7“Kaku na oshigwana shilwe shi na kalunga kasho e li popepi nasho, ngaashika Omuwa Kalunga ketu e li natse. Ote tu yamukula, sho tatu mu kugile ekwatho. 8Kaku na oshigwana shilwe shi na oompango dhuuyuuki dha fa ndhoka nde dhi mu nongeke nena. 9Kotokeni! Ndhindhilikeni, ne mwaa dhimbwe ayihe mbyoka mwe yi mono nomeho geni yene, manga mu na omwenyo. Hokololeleni aana yeni naatekulu yeni 10esiku ndyoka mwa thikama koshipala shOmuwa Kalunga keni pondundu Sinai, sho a lombwele ndje a ti: ‘Gongaleka oshigwana. Onda hala yu uve shoka ndi na okupopya, opo ya koneke okuvulika kungame aluhe, manga ye na omwenyo, nopo ya nongeke oyana okutila ndje.’
11“Hokololeleni aana yeni, nkene mwa yi nomwa thikama ponyonga yondundu ndjoka ya li ya siikilwa kiikogo yolwithi nomulilo tagu lilima gu uka mombanda. 12Ya hokololeleni, nkene Omuwa e mu popitha e li mehayango lyomulilo nonkene mwe mu uvu ta popi, ihe ne inamu mu mona nando e li molupe lwasha. 13Okwe mu lombwele shoka mu na okuninga, mu dhiginine ehangano ndyoka e li hangana nane. Omu na okudhiginina Iipango Omulongo mbyoka e yi nyola miipelende iyali yomamanya. 14Omuwa okwa lombwele ndje, ndi mu nongeke oompango adhihe ndhoka mu na okuvulika kudho mevi ndyoka tamu yi, mu ke li lale.”
Elondodho omolwiimenka
15“Omuwa sho e mu popitha e li mehayango lyomulilo kondundu Sinai, inamu mona nando olupe lwasha. Omoluuwanawa weni yene kotokeni, 16mwaa yone mokwiihambulila iimenka molupe lwasha — kashi na nee mbudhi kutya omolupe lwomulumentu nenge lwomukiintu, 17lwoshinamwenyo nenge lwondhila, 18lwoshihono nenge lwohi. 19Inamu kwatwa kohwehwe yokusimaneka nokulongela mbyoka yi li mewangandjo — etango, omwedhi noonyothi. Omuwa Kalunga keni okwe yi topolele aantu ayehe yomuuyuni. 20Ihe one oshigwana e shi mangululile muEgipiti, meziko lyomulilo. Okwe mu tembudha mo, mu ninge aantu ye mwene, ngaashi mu li ngashingeyi. 21Molweni Omuwa okwa geele ndje nokwa uvaneke nokugana kutya itandi ka tokola we Jordan ndi ye kevi ndyoka ewanawa te ke li mu pa. 22Otandi ka sila mevi ndika noitandi ka tokola Jordan, ihe ne otamu yi mu gu taaguluke ne mu ka lale evi ndyoka lyo ondoka. 23Kotokeni tuu, mwaa dhimbwe ehangano ndyoka Omuwa Kalunga keni a hangana nane. Vulikeni koshipango she noinamu iningila iimenka yasha, 24oshoka Omuwa Kalunga keni oye omulilo hagu lyana, Kalunga omulaadhi.
25“Nongele tamu kala olule moshilongo e tamu mono aanona naatekulu, inamu yona mokwiihambulila iimenka molupe lwasha. Mbika oyo iihuna koshipala shOmuwa notayi mu geyitha. 26Otandi ithana egulu nevi, yi ninge oonzapo dheni kutya ngele itamu vulika kungame, otamu kana mo moshilongo nziya. Itamu ka kala mo olule moshilongo shahandiyaka yaJordan shoka tamu ka lala. Otamu ka hanagulwa po thilu. 27Omuwa ote ke mu halakanithila kiilongo niilongo, nkoka taku ka hupila aantu yamweyamwe ayeke yomune. 28Oko nkoka tamu ka longela ookalunga ya hambulwa kiikaha yaantu, ookalunga yiiti noyomamanya mboka ihaa mono ko noihaa uvu ko, ihaa li noihaa thimbula ezimba. 29Hoka otamu ka konga Omuwa Kalunga keni, nongele tamu mu kongo nomutima aguhe, otamu ke mu mona. 30Uuna tamu adhika kuudhigu niinima mbika ayihe tamu yi ningilwa, nena ohugunina otamu galukile kOmuwa e tamu vulika kuye. 31Oye Kalunga omunamutimahenda. Ite mu etha nando nenge e mu hanagule po, noita dhimbwa nando ehangano ndyoka ye mwene e li hangana noohokulu.
32“Konakoneni utale omathimbo gonale, manga ne inaamu valwa, ethimbo alihe lyonale okuza mpoka Kalunga sho a shiti omuntu kombanda yevi. Konakoneni evi alihe. Iinima iinene yi thike mpaka oya ningilwe uunake nale? Oku na tuu ngoka u uvile iinima ya tya ngeyi? 33Oku na tuu oshigwana shilwe shu uvile Kalunga ta popi e li momulilo ndele tashi kala shi na we omwenyo, ngaashi ne mu li? 34Oku na tuu kalunga gulwe a yelekelele okutembudha mo oshigwana shontumba moshigwana shilwe e te shi ningi she mwene, ngaashi Omuwa Kalunga keni e mu ningile muEgipiti? Omontaneho yenilela a longitha oshikaha she shoonkondo nokwooko kwa taganana; okwe eta iiponga niita, a longo iilongandhindhiliko niinyengandunge nokwe eta iitilithilonga ya ningwa. 35Omuwa okwe mu hololele mbika, opo e mu ulukile kutya oye awike Kalunga nokaku na we gulwe. 36Okwe mu uvititha ewi lye tali zi megulu, opo e mu nongeke; naampaka kombanda yevi okwe mu talitha omulilo gwe omuyapuki e ta popi mugwo. 37Okwe mu hogolola, oshoka oku hole oohokulu, nokoonkondo dhe oonene okwe mu tembudha mo muEgipiti. 38Okwa tidha mo iigwana iinene niinankondo mondjila yeni, opo e mu ete mo mevi lyawo, evi ndyoka tali ningi lyeni. 39Dhimbulukweni ano nena ne mwaa dhimbwe nando kutya Omuwa oye Kalunga komegulu nokombanda yevi. Kaku na we kalunga gulwe. 40Vulikeni koompango adhihe ndhika tandi dhi mu pe nena ndjika, opo ayihe yi kale nawa kune naana yeni mevi ndyoka Omuwa Kalunga keni te li mu pe sigo aluhe.”
Iilando yokwiigamena kuuzilo waJordan
41Moses okwa yoolola iilando itatu kuuzilo waJordan 42moka tamu vulu okuholama omuntu ngoka a dhipaga mukwawo hanowina ye ke shi omutondi gwe. Ota vulu okuya ontuku moshilando shimwe mwaambika nota hupu. 43Ezimo lyaRuben olya li li na oshilando Bezer metumbalalovi lyombuga; ezimo lyaGad olya li li na Ramot moshilongo Gilead; nezimo lyaManasse olya li li na Golan moshilongo Baasha.
Efalomo lyegandjo lyompango yaKalunga
44Moses okwa gandja oompango dhaKalunga kAaisrael. 45Okwa gandja omalongo noompango ndhika kAaisrael, sho ya tembuka mo muEgipiti 46noya li mesilu kuuzilo waJordan ya taalelathana noshilando Betpeor, moshilongo shaSihon, omukwaniilwa gwAayamori, ngoka a pangele muHeshbon. Moses nAaisrael oye mu sindi, sho ya zi muEgipiti. 47Oya kutha po oshilongo she noshilongo shaOg, omukwaniilwa gwaBaasha. Og okwa li omukwawo gwomaakwaniilwa yAayamori kuuzilo waJordan. 48Oshilongo shika osha taandela okuza koshilando Aroer kooha dhomulonga Arnon sigo ondundu Sirjon, kokutya Hermon. 49Osha kwatelela mo oshikandjo ashihe shokuuzilo waJordan sigo okEfuta lya sa kuumbugantu noponyonga yondundu Pisga kuuzilo.
Currently Selected:
DEUTERONOMIUM 4: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
