DEUTERONOMIUM 25
25
1“Ngele Aaisraeli yaali otaa tamanana e taa yi koompangu, nagumwe ta monika kee na ondjo namukwawo omunandjo, 2omunandjo ngele ota dhengwa, omutokolihapu ne mu langeke egombe ye e mu dhengithe. Omwaalu gwomadhengo nagu faathanithwe nondjo ndjoka e na. 3Ina dhengwa oongola dhi vule omilongo ne, opo kaa sithwe ohoni koshipala shoye.”
4“Ino manga okana konani ndjoka tayi yungula nokulyatagulithwa iilya molupale.”
Ondjokana yoosuwala
5“Ngele ope na omuntu namumwayina ya kalathana puushiinda, nagumwe gwomuyo ta si inaa vala omumati, omukiintu gwanakusa ina hokanwa kaayeni, suwala ye ne mu kuthe po, e mu hokane po. 6Omunona gwotango omumati ota ka yalulwa omuna gwanakusa, opo ezimo lye li kale po muIsrael. 7Ihe omumwayina gwanakusa ngele ina hala e mu kuthe po, nena omukiintu ota yi kaawiliki yoshilando e ta ti: ‘Suwala yandje ina hala a gwanithe oshinakugwanithwa she; okwa tinda okupa omumwayina oluvalo mokati kAaisrael.’ 8Nena aawiliki yoshilando oye na okwiithana omulumentu ngoka, ye mu popithe. Ngele natango ota tindi okuhokana suwala ye, 9omuselekadhi na ye kuye montaneho yaawiliki, ta kutha po olukaku lwe noku mu hiyila omayeye moshipala ta ti: ‘Osho ngaaka tashi ningilwa omuntu ngoka ta tindi okupa omumwayina oluvalo.’ 10Ezimo lye muIsrael otali ka tseyika ‘ezimo lyomuntu a hulwa olukaku.’ ”
Oompango dhilwe
11“Ngele oku na aalumentu yaali taa kondjo, nomukulukadhi gwagumwe gwaambaka taa kondjo te ya a popile omulume nomoku shi ninga ta kwata ngwiyaka komatondo, 12ina silwa nando ohenda; oshikaha she nashi tetwe ko.
13-14“Ino kotokela mokulongitha iiyelekitho yiifundja yuudhigu nenge yiipindomwa. 15Longitha oomasandjundo dhi shi kwiinekelwa, opo u kale u na omwenyo omule mevi ndyoka Omuwa Kalunga koye te li ku pe. 16Omuwa oha tondo aantu mboka haa kotokele.”
Aayamaleki naa kombwe po sheke
17“Dhimbulukwa shoka Aayamaleki ye ku ningile, sho wa li mondjila to zi muEgipiti. 18Oya li inaa tila Kalunga noye ku kaakene, sho wa li wa vulwa nowa nkundipala, e taa dhipaga ayehe mboka ya li monima taa ende taa gaganyata. 19Onkee ano shampa Omuwa Kalunga koye e ku pe evi ndyoka nokwe ku gamene kaatondi yoye ayehe mboka ye ku kunduka, dhipaga po Aayamaleki ayehe, opo pwaa kale ngoka te ya dhimbulukwa we kombanda yevi. Ino shi dhimbwa tuu!”
Currently Selected:
DEUTERONOMIUM 25: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
