DEUTERONOMIUM 15
15
Omumvo omutiheyali
(Lev. 25:1-7)
1“Momumvo omutiheyali ou na okudhima po oongunga dhaamboka ye ku hehelele iimaliwa. 2Oto shi ningi ngeyi. Shaa ngoka a hehelelwe ongunga kumukwawo, ne yi dhime po. Ina kambadhala i ilikolele sha. Omuwa mwene ota dhimi po oongunga. 3Oto pula ongunga komuyeni, ihe ino pula komukweni.
4“Omuwa Kalunga koye ote ke ku yambeka mevi ndyoka te li ku pe. Moshigwana shoye itamu kala ohepele, 5ngele oto vulika kOmuwa Kalunga koye e to gwanitha shili ayihe mbyoka tandi ku lombwele nena. 6Omuwa ote ke ku yambeka, ngaashi u uvaneka. Oto ka pa iigwana oyindji oongunga, ihe ngoye ito pumbwa okuhehela sha kuyo. Oto ka pangela iigwana oyindji, ihe kape na oshigwana tashi ke ku pangela.”
7“Pungoye ngele ope na ohepele, gumwe gwomooyakweni moshilando shimwe shomevi ndyoka Omuwa Kalunga koye te li ku pe, ino mu kukutikila omwenyo gwoye, neke lyoye ino li kamininina omumwanyoko ohepele. 8Mu kamunukila eke lyoye noku mu pa nenyanyu shoka te ku yaala uuthigona. 9Ino mu tindila shoka te ku indile, molwashoka omumvo ngoka oongunga hadhi dhimwa po gu li popepi. Ino pitika edhiladhilo lya tya ngeyi ewinayi li mene momwenyo gwoye. Ngele oto tindi okugandja ongunga, ota ka kugila ndje te ku tamaneke, noto humbata ondjo. 10Mu pa nohokwe, nomwenyo gwoye gwaa kale noshizimbi, nge to mu pe, oshoka omolwashika Omuwa Kalunga koye ote ku yambeke miilonga yoye ayihe nomwaayihe mbyoka to yi ningi. 11Oohepele itadhi pu mo moshilongo; omolwashoka tandi ku lombwele te ti: ‘Eke lyoye ou na oku li kamunukila mukweni omuthigona nohepele mevi lyoye.’ ”
Okukala naapika
(Eks. 21:1-11)
12“Ngele oku na Omuisraeli omukweni ti ilanditha po kungoye a ninge omupika, ou na oku mu mangulula, sho e ku longele omimvo hamano. Momumvo omutiheyali oto mu mangulula a ye. 13Nonge to mu mangulula a ye, ino mu etha a ye niikaha yowala. 14Mu pa meloolo ndyoka Omuwa e ku yambekele — oonzi, iilya nomaviinu. 15Dhimbulukwa kutya owa li omupika muEgipiti, nOmuwa Kalunga koye okwe ku mangulula. Omolwashoka tandi ku pe oshipango shika.”
16“Ihe ngele ote ku lombwele ta ti: ‘Inandi hala okuza po pungoye,’ molwashoka e ku hole negumbo lyoye noku uvite uutoye pungoye, 17nena mu fala meelo lyegumbo lyoye e to mu ulula kokutsi noniho, nota kala omupika gwoye aluhe. Naapika yoye aakiintu osho to ya ningi ngaaka. 18Ino kala u na olungwenye, uuna to laleke omupika; ndishi okwe ku longela omimvo hamano nondjambi yomulongeli lwaali nokuli. Shi gwanitha, nOmuwa Kalunga koye ote ke ku yambeka mwaayihe to yi ningi.”
Osheeli shongombe noshonzi
19“Yoololela Omuwa Kalunga koye iisheeli ayihe iilumentu yoongombe noyoonzi. Oongombe dha tya ngaaka ino dhi longitha, noonzi ndhoka ino dhi kulula. 20Omumvo kehe ngoye naanegumbo lyoye omu na oku yi lila koshipala shOmuwa pehala ndyoka Omuwa e li hogolola. 21Ihe ngele iinamwenyo oyi na oshipwe shasha, ngele iilema, iiposi nenge yi na oshipo shasha, ino yi yambela Omuwa Kalunga koye. 22Iimuna ya tya ngaaka yi lila paandjeni. Ne amuhe, ongele aayogoki nenge mboka ye na oshidhila, otamu vulu oku yi lya, naanaa ngaashi onyama yomenye nenge yohumba. 23Ihe ombinzi yayo inamu yi lya nando, nayi tilwehi pevi ya fa omeya.”
Currently Selected:
DEUTERONOMIUM 15: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
