IILONGA 8

1Saulus naye wo okwa li a panda okudhipagwa huka kwaStefanus.

Saulus ta hepeke egongalo

Okuza kesiku tuu ndyoka egongalo lyomuJerusalem olya adhika komahepeko omanene. Onkee ooitaali ayehe, kakele kaayapostoli, oya halakanene omikunda adhihe dhaJudea nodhaSamaria. 2Aalumentu yamwe haa simaneke Kalunga, oya fumvike Stefanus noye mu lili noonkondo.

3Ihe Saulus okwa kambadhala okuhanagula po egongalo. Oye okwe ende nomagumbo agehe nokwa hilagula mo ooitaali ayehe, aalumentu naakiintu, nokwe ya edhililitha mondholongo.

Evaangeli tali uvithilwa muSamaria

4Ooitaali mboka ya halakanithwa ngeyi, oya yi akuhe noyu uvitha oohapu dhaKalunga. 5Filippus okwa yi koshilando shaSamaria noku uvithile aantu yaahoka elaka tali popi Kristus. 6Ongundu ayihe yaantu oya ndhindhilike nawa shoka tashi tiwa kuFilippus, sho ye mu pulakene noya mono iikumithalonga mbyoka e yi longo. 7Oshoka oombepo dha nyata odha zi mo maantu oyendji nokwiigidha mokule, naasilombanda oyendji niilema oya aludhwa.

8Onkee aantu yomuSamaria oya li ya nyanyukwa noonkondo.

9Ihe moshilando shiyaka omwa li omulumentu gumwe, edhina lye Simon, nopomathimbo gamwe okwa li ha kumitha Aasamaria nuumpulile we. Oye okwi iningi omunene, 10naantu ayehe, aanenentu naadhinwa, oye mu simaneke ya ti: “Omulumentu nguka oye oonkondo dhaKalunga, haku tiwa ‘Oonkondo oonene.’ ” 11Oyo oye mu simaneke, oshoka okwa li e ya kumitha ethimbo ele nuumpulile we. 12Ihe aantu sho yi itaale elaka etoye ndyoka ye li uvithilwa kuFilippus tali popi Oshilongo shaKalunga nedhina lyaJesus Kristus, oya shashwa ayehe, aalumentu naakiintu. 13Simon mwene naye wo okwi itaale Jesus, naasho a shashwa, okwa kala puFilippus. Oye okwa li a kuminwa iikumithalonga niilongankondo mbyoka tayi longwa kuFilippus.

14Aayapostoli yomuJerusalem sho yu uvu kutya Aasamaria oya taamba oohapu dhaKalunga, oya tumu Petrus naJohannes kuyo. 15Oyo sho ya thiki ko, oya galikanene ooitaali, opo ya pewe Ombepo Ondjapuki. 16Oshoka kakwa li nando ogumwe gwomuyo ngoka a adhika a pewa Ombepo Ondjapuki. Oyo oya li owala ya shashelwa medhina lyOmuwa Jesus. 17Petrus naJohannes oye ya tenteke ihe iikaha yawo, oyo noya pewa Ombepo Ondjapuki.

18Simon okwa mono kutya Ombepo Ondjapuki oya pewa ngoka aayapostoli ye mu tenteke iikaha yawo. Onkee okwe etele Petrus naJohannes iimaliwa nokwa ti: 19“Pii ndje wo oonkondo ndhoka, opo shaa ngoka tandi mu tenteke iikaha yandje, a pewe Ombepo Ondjapuki.”

20Ihe Petrus okwe mu yamukula a ti: “Iimaliwa yoye nayi ye pamwe nangoye moheli, oshoka ito vulu okulanda omagano gaKalunga niimaliwa. 21Ito vulu okulonga pamwe natse, oshoka omadhiladhilo goye inagu uka koshipala shaKalunga. 22Itedhulula ano, u ze mo momadhiladhilo goye omawinayi. Galikana Omuwa, opo e ku dhimine po, sho wa li wa dhiladhila oshinima sha tya ngeyi. 23Oshoka ondi wete kutya ou udha efupa ewinayi nou li omupika guulunde.”

24Nena Simon okwa lombwele Petrus naJohannes a ti: “Galikanenii ndje koshipala shOmuwa, opo ndaa adhike nando okushimwe shomiinima mbyoka mwa ti kutya otayi ka adha ndje.”

25Ano Petrus naJohannes sho ya adhika ya hokolola noyu uvitha elaka lyOmuwa, oya shuna kuJerusalem. Mokushuna kwawo oyu uvitha elaka etoye momikunda adhihe dhAasamaria.

Filippus nelenga lyokuEtiopia

26Omuyengeli gwOmuwa okwa lombwele Filippus a ti: “Thikama, ilongekidha, u ye lwokuumbugantu kondjila ndjoka ya za muJerusalem tayi yi kuGaza.” Ondjila ndjoka ihayi endiwa we. 27Filippus okwa thikama e ta yi. Ano omulumentu gumwe a simana gwokuEtiopia okwa adhika e li mondjila ta shuna kegumbo. Omulumentu nguka okwa li elenga enene nomudhiginini gweliko lyaKandake, omukwaniilwa omukiintu gwaEtiopia. Oye okwa yile kuJerusalem, a ka galikane Kalunga. 28Ngashingeyi mokugaluka kwe okwa adhika a kuutumba metemba lye, te ende ta lesha membo lyomuhunganeki Jesaja. 29Opo ihe Ombepo Ondjapuki oya lombwele Filippus ya ti: “Inda, u ka ende popepi netemba ndii.” 30Nena Filippus okwa matukile ketemba noku uvu, elenga tali lesha membo lyomuhunganeki Jesaja. Onkee okwe li pula a ti: “Ou uvite ko tuu omadhiladhilo gaashoka to lesha?”

31Elenga olye mu yamukula lya ti: “Otandi vulu ngiini okuuva ko, ngele kape na ngoka ta fatululile ndje?” Nena elenga olyi ithana Filippus, a londe metemba ye a kuutumbe pamwe naye. 32Oohapu dhomenyolo ndhoka dha li tadhi leshwa kelenga odho ndhika:

“Oye okwa li a fa onzi tayi falwa, yi ka dhipagwe.

Oye a li a fa onzigona tayi mwena thilu, uuna tayi kululwa.

Noye ina tumbula nando oshitya shimwe.

33Oye okwa fupipikwa ye ina uthilwa eutho lyu uka.

Kaku na nando ogumwe ta ka vula okupopya sha kombinga yoluvalo lwe,

oshoka okukalamwenyo kwe kwokombanda yevi okwa hulu po.”

34Elenga olya pula Filippus lya ti: “Lombwela ndje! Olye ngoka ta popiwa komuhunganeki? Oti ipopi ye mwene nenge ota popi omuntu gulwe i ili?” 35Nena Filippus okwa tameke okufatulula okuza kenyolo ndyoka noku uvithile elenga elaka etoye tali popi Jesus. 36Ano manga ya li taa ende ya landula ondjila, oya thiki pehala pu na omeya. Elenga olya lombwele ihe Filippus lya ti: “Omeya ogo ngaka, oshike ando tashi imbi ndje, ndi shashwe?” 37Filippus okwe mu yamukula a ti: “Kapu na omaimbo, ngele owi itaala nomwenyo gwoye aguhe!” Elenga olya yamukula lya ti: “Ondi itaala kutya Jesus Kristus oye Omuna gwaKalunga.”

38Elenga olya thikameke ihe etemba. Filippus nelenga oya zi mo metemba e taa yi momeya. Opo ihe Filippus okwe mu shasha. 39Ano manga ya li taa zi momeya, Ombepo yOmuwa oya kutha po Filippus pelenga, lyo inali mu mona we. Ihe olya tsikile ondjila yalyo lya nyanyukwa noonkondo. 40Filippus okwa adhika muAzotus; oye okwe ende miilando ayihe e tu uvitha elaka etoye, sigo e ya kuKesarea.

Currently Selected:

IILONGA 8: ONDB

Highlight

Copy