IILONGA 18

MuKorinto

1Konima yaambika Paulus okwa zi muAtena e ta yi kuKorinto. 2Hwiyaka okwa adha ko omulumentu Omujuda, edhina lye Akula, nomukadhi Priskila. Omulumentu nguka okwa valelwa muPontus nokwa adhika, opo e ya mo a zi kuItalia, oshoka omupangeli Omuroma Klaudius okwa li a lombwele Aajuda ayehe kutya naa ze mo muRoma. Paulus okwa yi kuyo 3e ta kala puyo nokulonga pamwe nayo, oshoka nayo wo oya li aatungi yootenda ngashika ye. 4MEsabati kehe Paulus okwa popi mosinagoga nokwa kambadhala okutompa ayehe, Aajuda nAagreka.

5Ano Silas naTimoteus sho ya thiki muKorinto okuza kuMakedonia, oya adha Paulus i ipyakidhila ethimbo alihe nokuuvithila aantu oohapu dhaKalunga nokwa tompo Aajuda kutya Jesus oye Kristus. 6Ihe oyo sho ye mu ludhikitha noye mu popile muuwinayi, okwi ipupula ontsi koonguwo dhe e te ya lombwele ta ti: “Ngele omwa ka kana, nena ondjo oyeni yene. Ngame kandi na sha moshinima shika. Okuza kesiku lyonena ngame otandi yi, ndi ka uvithile aapagani.” 7Nena oye okwe ya thigi po nokwa ka kala megumbo lyomulumentu omupagani nakusimaneka Kalunga, edhina lye Titius Justus. Egumbo ndika olya li popepi nosinagoga. 8Krispus, omukuluntu gwosinagoga, pamwe naanegumbo lye ayehe oyi itaale, nosho wo aantu oyendji yomuKorinto oyu uvu oohapu dhaKalunga noyi itaale e taa shashwa.

9Uusiku umwe Omuwa okwi ihololele Paulus memoniko nokwe mu lombwele ta ti: “Ino tila, popya, ino mwena; 10oshoka ondi li pamwe nangoye. Kape na nando ogumwe te ku ningile uuwinayi, oshoka ondi na aantu oyendji moshilando shika.” 11Onkee ano Paulus okwa kala muKorinto omvula yimwe netata nokwa longo aantu oohapu dhaKalunga. 12Ihe Gallio sho a langekwa kAaroma, a ninge omuleli muGreka, Aajuda oya gongala noya hangene Paulus e taye mu kwata noye mu fala kompangu. 13Oyo oya popi noya ti: “Omulumentu nguka ota kambadhala okuhongolola aantu, ya longele Kalunga pamukalo ngoka gwa tsa ondumbo nompango.”

14Ano Paulus sho kwa ale a popye, Gallio okwa lombwele Aajuda ta ti: “Aajuda ne, omulumentu nguka ando okwa li a ningi epogolo lyasha nenge oshilonga shuukolokoshi, ando ondi idhidhimike ngaa oku mu pulakena. 15Ihe sho mu na owala omaludhi naye kombinga yiitya, yomadhina noyompango yeni, nena oshinima shika oshi li miikaha yeni.” 16Oye nokwe ya tidha mo mompangu. 17Nena oyo ayehe oya nukile Sostenes, omukuluntu gwosinagoga, noye mu dhengele mpoka komeho goshipundi shompangu. Ihe Gallio okwa li kee na ko nasha.

Paulus ta shuna kuAntiokia

18Paulus okwa kala natango pamwe nooitaali omasiku ogendji muKorinto, opo ihe okwe ya laleke nokwa yi nosikepa pamwe naAkula naPriskila kuAntiokia. Ihe manga inaa ya mosikepa, okwa gana egano muKenkrea nokwa kululitha omutse gwe. 19Ano sho ya thiki muEfeso, Akula naPriskila oya thigala moka, ihe Paulus okwa yi kosinagoga nokwa kundathana nAajuda. 20Oyo oye mu indile, a kale puyo omasiku gamwe, ihe oye okwa tindi. 21Okwe ya laleke ashike nokwe ya uvanekele a ti: “Kalunga ngele okwe shi hala, otandi ka galukila kune.” Oye okwa zi muEfeso nosikepa.

22Ano sho a thiki muKesarea, okwa yi kuJerusalem, a ka popithe egongalo. Opo ihe okwa yi kuAntiokia. 23Sho a kala ko omasiku gamwe, okwa thikama ishewe, a shune. Okwa pitile momikunda dhaGalatia nodhaFrigia nokwa tsu ooitaali omukumo.

Apollos tu uvitha muEfeso nomuKorinto

24Omujuda gumwe, edhina lye Apollos, a valelwa muAleksandria, okwe ya kuEfeso. Oye okwa li enyakwa lyokupopya nokwa tseya nawa Omanyolo. 25Apollos okwa li wo a longwa okutseya ondjila yOmuwa, onkee okwa popi nuulaadhi nokwa longo aantu elongo lyu uka kombinga yaJesus. Ihe okwa li a tseya owala eshasho ndyoka Johannes e li ningi. 26Oye okwa tameke okupopya nuulaadhi mosinagoga. Ano Priskila naAkula sho ye mu pulakene, oye mu kutha e taa yi naye kaandjawo noye mu longo noku mu yelithila nawalela ondjila yaKalunga.

27Nena Apollos okwa tokola ihe okuya kuGreka, onkee ooitaali yomuEfeso oye mu kwatha mokunyolela ooitaali ooyakwawo yomuGreka noku ya kumagidha, ye mu taambe nawa. Ano sho a thiki ko, okwa kwatha lela mbeyaka ya ningi ooitaali kesilohenda lyaKalunga. 28Oshoka oye okwa tompo Aajuda nomatompelo ga kola montaneho yaantu ayehe, nomokulongitha Omanyolo okwe ya ulukile kutya Jesus oye Kristus.

Currently Selected:

IILONGA 18: ONDB

Highlight

Copy