IILONGA 16

Timoteus ta tameke okweenda pamwe naPaulus naSilas

1Paulus okwa yi kuDerbe nokuListra, hoka a adha ko omwiitaali, edhina lye Timoteus, a valwa komukiintu Omujuda omwiitaali, ihe he okwa li Omugreka. 2Ooitaali ayehe yomuListra nomuIkonium oya li taa popile Timoteus muuwanawa. 3Paulus okwa li a hala okukutha Timoteus, a ye pamwe naye, onkee okwe mu fukalekitha. Paulus okwe shi ningi, oshoka Aajuda ayehe mboka ya kala miilando mbiyaka, oya li ye shi shi kutya he yaTimoteus Omugreka.

4Mokweenda kwawo miilando ayihe oya tseyithile ooitaali omautho ngoka ga ningwa kaayapostoli nokaakuluntu muJerusalem noye ya lombwele, ya ga dhiginine. 5Osho ngeyi omagongalo oga kolekelwa meitaalo nomwaalu gwooitaali ogwi indjipala esiku kehe.

Paulus ta mono emoniko muTroas

6Oyo oye ende nokupitila muFrigia nomuGalatia, oshoka Ombepo Ondjapuki okwe ya keelele okuuvithila oohapu dhaKalunga moshitopolwa shaAsia. 7Ano sho ya thiki koongamba dhaMisia, oya kambadhala okuya kuBitinia, ihe Ombepo yaJesus inayi ya pitikila oku shi ninga. 8Onkee ano oya taakana Misia pokati noya yi kuTroas. 9Uusiku mbwiyaka Paulus okwa mono emoniko: omulumentu Omumakedonia a thikama koshipala she e te mu indile ta ti: “Taagulukila huka kuMakedonia, u tu kwathe!”

10Mbalambala konima yemoniko ndika lyaPaulus otwa thikama e tatu yi kuMakedonia, oshoka otwa dhimbulula kutya Kalunga okwe tu ithana, tu ka uvithile aantu yaahoka elaka etoye.

Eitedhululo lyaLidia muFilippi

11Okuza muTroas otwa yi nosikepa tu ukilila kuSamotrake nomesiku lya landula otwa thiki kuNeapolis. 12Okuza muNeapolis otwa yi koshilando shaFilippi, oshitembukilwa shAaroma shi li moshikandjo shotango shaMakedonia.

13MEsabati otwa piti mo moshilando e tatu yi komulonga, hoka twa tengeneke kutya oku na ehala lyAajuda lyokugalikanena. Ano sho twa thiki ko, otwa kuutumba e tatu popitha aakiintu mboka twa adha ya gongalela ko. 14Omukiintu gumwe, edhina lye Lidia, omuhalithi gwoonguwo oontiligane gwokoshilando shaTiatira, okwa li gumwe gwaapulakeni. Oye okwa li omukiintu nakusimaneka Kalunga, Omuwa nokwe egulula omwenyo gwe okutaamba nokwiitaala shoka Paulus a ti. 15Onkee okwa shashwa pamwe naanegumbo lye ayehe. Nena oye okwe tu lombwele ta ti: “Ngele omu uvite kutya ngame ondi itaala shili Omuwa, nena ileni, mu kale megumbo lyandje.” Oye nokwe tu thiminike, tu ye naye.

Paulus naSilas taa tulwa mondholongo

16Esiku limwe manga twa li mondjila tu uka kehala lyokugalikanena, otwa tsakanekwa komupika omukadhona e niwe kombepo ombwinayi, ndjoka ya kala hayi mu longitha okuhunganeka onakuyiwa. Mokuhunganeka ngeyi okwa likolitha ooyene ye iimaliwa oyindji. 17Oye okwa kala he tu landula nosho wo Paulus ti igidha ta ti: “Aalumentu mbaka oyo aamati yaKalunga gwokombandambanda. Oyo otaye mu tseyithile, nkene ne tamu vulu okuhupithwa.” 18Oye sho e shi ningi omasiku ogendji, osha vulitha Paulus. Nena Paulus okwa punguluka e ta lombwele ombepo ombwinayi ta ti: “Medhina lyaJesus Kristus otandi ku lombwele, za mo muye!” Nena ombepo oya zi mo muye pethimbo tuu ndyoka.

19Ano ooyene ye sho ya dhimbulula kutya nani omukadhona gwawo ita vulu we oku ya likolitha iimaliwa, oya nukile Paulus naSilas noye ya kookololele kehalandjandja lyokutokolela oohapu. 20Oyo oye ya fala koshipala shaapangeli Aaroma noya ti: “Aalumentu mbaka Aajuda otaa piyaganeke oshilando shetu. 21Oyo otaye tu longo omikalo ndhoka dha tsa ondumbo nompango yetu. Tse Aaroma itatu vulu okulandula omikalo dha tya ngaaka.”

22Nena ongundu yaantu yomoshilando oya tameke okudhenga Paulus naSilas, naaleli yoshilando oya tuulitha oonguwo dhaayapostoli e taye ya dhengitha noongola. 23Ano sho ye ya dhenge noonkondo, oye ya edhilile mondholongo. Omulangeli gwondholongo okwa lombwelwa, e ya tonatele nawa. 24Omulangeli sho a lombwelwa ngeyi, okwe ya edhilile mela lyomeni nokwe ya tula meti.

25Ihe pokati kuusiku Paulus naSilas oya galikana nokwiimbila Kalunga omahambelelondjimbo, noonkwatwa odhe ya pulakene. 26Ohaluka yowala evi olya tameke okukakama noonkondo nolya ndjingandjinga ondholongo sigo okomakankameno gayo. Opo tuu mpoka omiyelo dhondholongo odhe eguluka, nomalyenge goonkwatwa adhihe oga dhituluka. 27Ano omulangeli gwondholongo sho a papudhuka nokwa mono omiyelo dhondholongo dhe ekama, okwa dhiladhila kutya oonkwatwa adhihe odha fadhuka po. Oye okwa pweya mo egongamwele lye nokwa li a hala okwiidhipaga. 28Ihe Paulus okwi igidha mokule ta ti: “Ino iningila uuwinayi nando owasha! Tse atuhe omo tu li.”

29Nena omulangeli okwi indile, a pewe omulilo, e ta matukile mo. Oye okwi ihata pevi poompadhi dhaPaulus naSilas. 30Opo ihe okwe ya piitha mo e te ya pula ta ti: “Aasimanekwa, ondi na okuninga shike, opo ndi hupithwe?”

31Oyo oye mu yamukula ya ti: “Itaala Omuwa Jesus, e to hupithwa pamwe naanegumbo lyoye.” 32Aayapostoli oye mu uvithile oohapu dhOmuwa pamwe naanegumbo lye ayehe. 33Omulangeli okwe ya kutha e ta yi nayo potundi tuu ndjoka yuusiku nokwa yogo iilalo yawo; oye nokwa shashwa pamwe naanegumbo lye ayehe pethimbo tuu ndyoka. 34Nena okwa kutha Paulus naSilas nokwe ya fala megumbo lye e te ya pe iikulya. Oye okwa li a nyanyukwa unene pamwe naanegumbo lye ayehe, oshoka ngashingeyi oyi itaala Kalunga.

35Ongula yesiku lya landula aapangeli Aaroma oya tumu aambala komulangeli nelaka tali ti: “Etha aalumentu mboka, ya ye!”

36Nena omulangeli okwa lombwele Paulus ta ti: “Aaleli oya tumine ndje elaka tali ti kutya nandi mu ethe, mu ye, ne naSilas. Ano thikameni ngashingeyi, mu ye nombili.”

37Ihe Paulus okwa lombwele aambala ta ti: “Oyo oye tu dhengitha montaneho yaantu ayehe, nando inatu pangulwa, noye tu tula mondholongo, nando tse aakwashilongo shaRoma. Ihe ngashingeyi oya hala, ye tu piithe mo meholamo. Aawe, itashi vulika nando! Aapangeli mboka naye ye yo yene huka, ye tu piithe mo.”

38Aambala oya shuna e taa ka hokololela aapangeli Aaroma oohapu ndhika. Ano mbeyaka sho yu uvu kutya Paulus naSilas aakwashilongo shaRoma, oya haluka noonkondo. 39Onkee oya yi kuyo e taye ya pe ombili, oye ya piitha mo mondholongo noye ya indile, ya ze mo moshilando. 40Paulus naSilas oya zi mo mondholongo e taa yi kaandjaLidia. Mwiyaka oya tsakanene nooitaali ooyakwawo, oye ya tsu omukumo e taa yi kulwe.

Currently Selected:

IILONGA 16: ONDB

Highlight

Copy