IILONGA 10
10
Petrus naKornelius
1MuKesarea omwa li mu na omulumentu, edhina lye Kornelius, omukuluntu gwetanga lyaakwiita yAaroma ndyoka haku tiwa “Etanga lyAaitalia”. 2Oye okwa li omulumentu ha simaneke Kalunga nohe mu galikana pamwe negumbo lye alihe. Oye okwa ningi oshindji okukwatha Aajuda mboka oohepele nokwa li ha galikana Kalunga aluhe. 3Esiku limwe potundi ontintatu komatango Kornelius okwa mono emoniko: omuyengeli gwaKalunga e ya kuye e te mu ithana ta ti: “Kornelius!”
4Oye okwa tala omuyengeli e mu tongolola a haluka e ta ti: “Omuwa, oshike?”
Omuyengeli okwe mu yamukula a ti: “Kalunga oku uvu omagalikano goye nokwa mono iilonga yoye yokukwatha oohepele e te ku dhimbulukwa. 5Ano ngashingeyi tuma aalumentu yamwe, ya ye kuJoppa, ya ka tale omulumentu, edhina lye Simon Petrus. 6Oye omuyenda maandjaSimon omupeli gwiipa, ngoka e na egumbo li li pooha dhefuta.” 7Ano omuyengeli ngoka a li a popi naye, sho a yi, Kornelius okwi ithana aamati ye yaali nomukwiita omusimanekikalunga gwomwaamboka yopopepi naye. 8Oye okwe ya hokololele shoka sha ningwa po, e te ya tumu kuJoppa.
9Esiku lya landula, manga ya li mondjila taa ihilile popepi naJoppa, Petrus okwa londo kombanda yongulu pethimbo lyopokati komutenya, a ka galikane. 10Oye okwa li u uvite ondjala nokwa hala okulya. Ihe manga iikulya ya li tayi telekwa, Petrus okwa mono emoniko. 11Okwa mono egulu lye eguluka e tamu zi oshinima sha fa onguwo onene ontokele sha kwatwa koonkotso dhasho ne nosha kulukithilwa pevi. 12Musho omwa li mu na iikwamagulugane yokuukukutu yomaludhi agehe, iihono noondhila. 13Nena ewi olye mu lombwele lya ti: “Petrus, thikama, dhipaga iinamwenyo mbyoka e to li.”
14Ihe Petrus okwa ti: “Aawe, Omuwa! Itashi vulika! Noshitonale inandi lya nando shaa shoka sha talika shi na oshidhila nenge sha nyata.”
15Ewi olye mu yamukula ishewe lya ti: “Shaa shoka Kalunga e shi yapula, ito vulu oku shi tala kutya oshi na oshidhila.” 16Ewi sho lye mu popitha lutatu, onguwo oya hililwa megulu.
17Petrus okwa li a kuminwa emoniko ndyoka e li mono. Manga a li ti ipula ngeyi, aalumentu mbeyaka ya tumwa kuKornelius, oya adhika yu ulukilwa egumbo lyaSimon noye ya e taa thikama posheelo. 18Oyo oyi indile megumbo nokwiigidha mokule e taa ti: “Megumbo muno omu na tuu omulumentu omuyenda e na edhina Simon Petrus?”
19Ano Petrus manga a li natango ti ipula emoniko ndika shoka tali ti, Ombepo Ondjapuki oye mu lombwele ya ti: “Pulakena! Peelo ope na aalumentu yatatu taa ku pula. 20Thikama ano, u ye kuyo pevi, ngoye ino limbililwa okuya pamwe nayo, oshoka ongame nde ya tumu.” 21Osho ano Petrus okwa yi pevi kaalumentu mbeyaka e te ya lombwele ta ti: “Ongame omulumentu ngoka tamu kongo. Omwi ile shike mpaka?”
22Oyo oye mu yamukula ya ti: “Tse otwa tumwa komukuluntu gwaakwiita Kornelius. Oye omulumentu omwaanawa, ha galikana Kalunga nokwa simanekwa noonkondo kAajuda ayehe. Oye okwa lombwelwa komuyengeli gwaKalunga memoniko, e ku ithane kegumbo lye, opo u uve shoka to mu lombwele.” 23Petrus okwi ithana ihe aalumentu megumbo nokwe ya pe omulalo uusiku mbwiyaka.
Esiku lya landula Petrus okwa thikama e ta yi pamwe nayo. Yamwe yomooitaali yomuJoppa oya yi pamwe naye. 24Esiku ekwawo oya thiki kuKesarea noya adha Kornelius e ya tegelela pamwe naanegumbo lye ayehe nookuume mboka Kornelius a adhika e ya hiya. 25Ano Petrus manga a li te ende u uka megumbo, Kornelius okwe mu tsakaneke, okwi ihata pevi poompadhi dhe nokwi inyongamene koshipala she. 26Ihe Petrus okwe mu lombwele a ti: “Thikama, oshoka nangame wo omuntu gwowala.”
27Oyo oye ende ihe taa popi yu uka megumbo, moka ya adha mo aantu oyendji ya gongala. 28Nena Petrus okwa ti: “Omu shi shi ne yene kutya elongelokalunga lyopaShijuda itali mu pitika nando, Omujuda a talele po nenge e endathane nomupagani. Ihe Kalunga oku ulukile ndje kutya itandi vulu nando okutala omuntu gwontumba e na oshidhila nenge a nyata. 29Onkee ano sho mwa tumu kungame nomwi ithana ndje, ndi ye kune, onde ya mbala. Onkee ngashingeyi otandi mu pula kutya omwi ithanene ndje shike?”
30Kornelius okwe mu lombwele a ti: “Sho pwa piti omasiku gatatu, pethimbo naanaa ngandika, ngame onda adhikile te galikana megumbo lyandje potundi ontintatu yokomatango. Ohaluka yowala onda mono omulumentu a zala oonguwo tadhi adhima a thikama koshipala shandje. 31Oye okwa lombwele ndje a ti: ‘Kornelius! Kalunga oku uvu omagalikano goye nokwa dhimbulukwa iilonga yoye yokukwatha oohepele. 32Onkee ano ngashingeyi, tuma aantu kuJoppa, ya ka tale ko omulumentu gumwe, edhina lye Simon Petrus. Oye omuyenda megumbo lyaSimon omupeli gwiipa, ngoka e na egumbo li li pooha dhefuta.’ 33Onkee ano onde endelele oku ku tumina mbala elaka. Owa ningi nawalela, sho we ya. Ano ngashingeyi otse atuhe otu li mpaka koshipala shaKalunga twa tegelela, u tu lombwele ashihe shoka Omuwa e ku lombwele, u shi popye.”
Euvitho lyaPetrus
34Nena Petrus okwa tameke ihe okupopya ta ti: “Ngame ngashingeyi onde shi tseya kutya Kalunga aantu ayehe ohe ya tala ye thike pamwe. 35Ngoka he mu tila noha longo shoka shu uka, Kalunga ote mu taamba, na kale ogwomoshigwana sha tya ngiini. 36Oye okwa tumine Aaisraeli elaka etoye lyombili tali hokolola kutya Jesus Kristus oye Omuwa gwaantu ayehe. 37One omwa tseya kutya okuza peshasho ndyoka Johannes a li e li uvitha, oshinima oshinene osha ningwa moshilongo ashihe shAaisraeli okutameka kuGalilea sigo okuJudea. 38Omwa tseya wo kutya Jesus Omunasareti Kalunga okwa li e mu gwayekitha Ombepo Ondjapuki noonkondo. Oye okwe ende apehe, okwa longo uuwanawa nokwa aludha ayehe mboka ya li mepangelo lyomuhindadhi, oshoka Kalunga okwa li pamwe naye.
39“Otse oonzapo dhiinima ayihe mbyoka e yi ningi moshilongo shAajuda nomuJerusalem. Ihe oyo oye mu dhipaga, sho ye mu alele komushigakano. 40Ihe Kalunga okwe mu yumudha kuusi esiku etitatu nokwe mu hololele aantu. 41Oye ini ihololela aantu ayehe, ihe otse ashike mboka Kalunga e tu hogolola nale, tu kale oonzapo dhe. Otse otwa lile notwa nwine pamwe naye, sho a yumuka kuusi. 42Oye okwe tu lombwele, tu uvithile aantu ayehe evaangeli notu tseyithile aantu ayehe kutya Kalunga okwa lenge Jesus, a ninge omupanguli gwaanamwenyo naasi. 43Aahunganeki ayehe oye mu popi kutya kehe ngoka te mu itaale, ota dhiminwa po oondjo dhe omolwoonkondo dhedhina lye.”
Aapagani taa pewa Ombepo Ondjapuki
44Ano Petrus manga a li natango ta popi. Ombepo Ondjapuki okwa kulukile moomwenyo dhaayehe mboka ya li ye mu pulakene. 45Ooitaali Aajuda mboka ya zile kuJoppa pamwe naPetrus, oya li ya kumwa, sho Kalunga a gandja omagano ge gOmbepo Ondjapuki nokaapagani wo. 46Oshoka oyo oye ya uvu taa popi omalaka gaa shiwike notaa simaneke iilonga iinene yaKalunga. Nena Petrus okwa popi a ti: 47“Aantu mbaka oya pewa Ombepo Ondjapuki naanaa ngashika tse. Ope na tuu ngoka ta vulu oku ya keelela, kaaya shashwe nomeya?”
48Oye okwe ya lombwele ihe, ya shashelwe medhina lyaJesus Kristus. Nena oyo oye mu indile, a kale puyo omasiku gamwe.
Currently Selected:
IILONGA 10: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
