2 ONDJALULO 1
1
Salomo ta pula oondunge
(1 Aak. 3:1-15)
1Salomo yaDavid okwa koleke uukwaniilwa woshilongo Israel, nOmuwa, Kalunga ke, okwe mu laleke nuuyamba e te mu ningi omunenenene.
2Omukwaniilwa Salomo okwa hiya aakuluntu ayehe mboka haa wilike aalumentu eyuvi nenge ethele naakwanepangelo ayehe, aakuluntu yomagumbo ayehe noshigwana ashihe, 3e te ya lombwele ya ye pamwe naye keha lyelongelokalunga kuGibeon. Oya yi ko, oshoka oko kwa li etsalihangano lyOmuwa, ndyoka lya li lya tungwa mombuga kuMoses, omumati gwaKalunga. 4(Oshikethahangano osha li sha pungulwa muJerusalem metsali ndyoka lya dhikwa komukwaniilwa David, sho a ka talele ko oshikethahangano kuKiriat Jearim.) 5Oshiyambelo oshikushu shoka sha li sha ningwa kuBezalel yaUri, omutekulu gwaHur, osha li wo muGibeon komeho getsalihangano lyOmuwa. Omukwaniilwa Salomo noshigwana ashihe oya simanekele Omuwa nkoka. 6Omukwaniilwa okwa simanekele Omuwa komeho getsalihangano, sho a yamba iimuna eyuvi omafikilondjambo koshiyambelo shoshikushu.
7Uusiku mboka Omuwa okwi ihololele Salomo e te mu pula ta ti: “Owa hala, ndi ku pe shike?”
8Salomo okwa yamukula a ti: “Ongoye owa hololele aluhe tate David ohole yoye onene nowa landulitha ndje tate muukwaniilwa. 9Omuwa Kalunga, gwanitha euvaneko lyoye we li uvanekele tate. Ongoye wa kwaniileke ndje, ndi lele aantu oyendji yaa shi kuyalulwa, 10onkee ano pe ndje owino nuunongo tandi u pumbwa moku ya lela. Ngele hasho, otandi vulu ngiini okulela oshigwana shoye oshinene shi thike mpano?”
11Kalunga okwa yamukula Salomo a ti: “Owa hogolola nawa, oshoka ino pula uuyamba nenge omaliko nenge esimano nenge eso lyaatondi yoye nenge omwenyo omule kombanda yevi, ihe owi indile owino nuunongo, opo u vule okulela aantu yandje, mboka nde ye ku pe, u ya lele. 12Otandi ku pe owino nuunongo. Otandi ku pe wo uuyamba, omaliko nesimano enene u vule aakwaniilwa ayehe mboka ye ku tetekela nenge mboka taye ke ku landula.”
Oonkondo dhaSalomo nuuyamba we
(1 Aak. 10:26-29)
13Salomo okwa zi ko keha lyelongelokalunga muGibeon, moka mwa li etsalihangano lyOmuwa, e ta shuna kuJerusalem. Nkoka okwa lele Israel. 14Salomo okwa gongele omatembakwiita geyuvi limwe nomathele gane naakawilinkambe omayuvi omulongo nagaali. Yamwe yomuyo okwa kala nayo muJerusalem nayalwe okwe ya langeke miilando yilwe. 15Muuyuni we oshisiliveli noshingoli oya li ya ha muJerusalem ya fa evi, nomisendeli odha li odhindji dha fa omikwiyu muShefela. 16Aalongeli yomukwaniilwa oye ke mu landela uukambe kuMusri naKilikia 17nomatembakwiita okuEgipiti. Oya landa uukambe nomatembakwiita kaakwaniilwa Aaheti nAasiria. Omatembakwiita oga gu iimaliwa iisiliveli 600 kehe limwe nuukambe owa gu 150 kukehe.
Currently Selected:
2 ONDJALULO 1: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.