ДжакӀуэ 2

ЕтӀуанэ Ӏыхьэ

Гур хэзыгъахъуэхэми, дуней хъугъуэфӀыгъуэхэми пщӀэ яӀэкъым

1«ГурэпкӀырагъэ гуэр зесхьэнщи зызгъэунэхужынщ, фӀагъыу хэлъыр зыхуэдэр зэзгъэщӀэнщ», – жысӀэри сегупсысащ. АрщхьэкӀэ ари пщӀэншэу къыщӀэкӀащ. 2ДыхьэшхыкӀеиныр акъылыншагъэу къэслъытащ, гурэпкӀырэным къыпхуихь зэрыщымыӀэри зэхэсщӀыкӀащ. 3Фадэр зэш теупӀэ сщӀыну тезубыдащ, акъылым и гъунэм симыкӀыу делагъэ зесхьэнуи тезухуащ: къыхуиуха гъащӀэ тӀэкӀур мы уафэм и щӀагъым щӀэту щезыхьэкӀ цӀыхум ифӀ зыхэлъыр къэсхутэну сыхуейт.

4Ӏуэхушхуэ зыбжанэ згъэхъащ: унэхэр сщӀащ, жызум хадэхэри згъэтӀысащ, 5пхъэщхьэмыщхьэу къапымыкӀэ щымыӀэу жыг хадэхэмрэ мэз тӀэкӀухэмрэ зезгъэукъуэдиящ. 6Хадэхэм къыщыкӀ жыгхэр псы щымыщӀэн щхьэкӀэ псыгуэнхэри изгъэувэжащ. 7Къэсщэхуащ пщылӀ цӀыхухъуи, пщылӀ цӀыхубзи, абыхэм къащӀэхъуэжа пщылӀхэри сиӀащ. Ӏэщ пӀащэуи, Ӏэщ цӀыкӀууи сиӀар ебэкӀырт тетыгъуэр Ерусэлим щызыӀыгъа дэтхэнэ зыми иӀам нэхърэ. 8Зэхуэсхьэсащ дыщи дыжьыни, къесхьэлӀащ пащтыхьыгъуэхэмрэ щӀыналъэхэмрэ мылъкуу ярылъри. УэрэджыӀакӀуэ цӀыхухъухэри, уэрэджыӀакӀуэ цӀыхубзхэри си куэдт, цӀыхухъугум и щӀасэу бгъафэ чэсейхэри#2:8 Бгъафэ чэсейхэри – Пасэрей Ӏэрытхым къыщыкӀуэ псалъэхэм къарыкӀыр гурыӀуэгъуэ дыдэкъым, зэрызэдзэкӀами къигъэлъагъуэр иӀэнкӀэ хъуну мыхьэнэхэм языхэзырщ. ФӀыцӀагъэ ЛъапӀэм къызэрыхэщымкӀэ, Сэлмэн бегъымбарым щхьэгъусэ щиблрэ щӀасэ бзылъхугъэ щищрэ иӀащ. си мащӀэтэкъым.

9Щхьэ лъапӀэныгъэу къызахымкӀэ Ерусэлим си япэ щыпсэуа дэтхэнэ зыми сыфӀэкӀыжат, ауэ акъылыр ӀэщӀыб зэикӀ сщӀакъым. 10Си нэр здэплъэм сыплъащ, си гум фӀэигъуэми сыпэрыуакъым. СщӀэ псоми сыщыгуфӀыкӀырт – си лэжьыгъэм къыпэкӀуэми ар я щхьэт. 11АрщхьэкӀэ си ӀэщӀагъэ сыхэплъэжщ, гугъуехьу сшэча псоми сегупсысыжри, къанэ щымыӀэу зэрыпщӀэншэри, зи щхьэпэ зэрыщымыӀэри къызгурыӀуащ, мы уафэм и щӀагъым сыт къыщымыхъуми, зэрыпсыхэкӀуадэри къэслъэгъуащ.

Ӏущыгъэри делагъэри пщӀэ зимыӀэщ

12Ӏущыгъэр зищӀысым, акъылыншагъэмрэ делагъэмрэ зыхуэдэм сегупсысу щӀэздзащ. Пэж дыдэу, пащтыхь тахътэм дэкӀуейм сыт ищӀэфынур, япэ итам и щапхъэм иримыгъуазэмэ?#2:12 Пасэрей Ӏэрытхым къыщыкӀуэ псалъэхэм къарыкӀыр гурыӀуэгъуэ дыдэкъым.

13Нэхур кӀыфӀым зэрытекӀуэм ещхьу

Ӏущыгъэр акъылыншагъэм зэрефӀэкӀыр къызгурыӀуащ.

14Ӏущым здэкӀуэр ӀупщӀу елъагъу,

Ӏулэр кӀыфӀым Ӏэбэрабэурэщ зэрыхэтыр.

Ауэ тӀуми а зы пӀалъэр къазэрыхуиухари зэхэсщӀыкӀащ.

15«Ӏулэм къыпэплъэр сэри къыспэщылъмэ, сыткӀэ сыхуэныкъуэ-тӀэ Ӏущыгъэм?» – сегупсысащ абы щыгъуэ.

«Мыр гуэрыри пщӀэншэщ», – жысӀащ сигукӀэ.

16Ӏущри Ӏулэри игъащӀэкӀэ яӀэщӀэмыхужу зигу илъын щыӀэу къыщӀэкӀынкъым:

игъуэр къэсмэ, тӀури ящыгъупщэжынущ.

Ӏулэм ещхьу, Ӏущри зэгуэр мэлӀэж!

17Мы уафэм и щӀагъым щыхъу-щыщӀэ псоми гур зэӀищӀэу къысщыхъуащ, арыххэуи хуэсщӀащ мы гъащӀэм гущыкӀ. Псори пщӀэншэщ, зи щхьэпи щыӀэкъым.

ГуащӀэдэкӀыр пщӀэ зимыӀэщ

18ПщӀэнтӀэпсыр къыспыжу къэзлэжьар си ужькӀэ къэкӀуэнум къызэрыхуэнэнум мы уафэм и щӀагъым щызгъэхъахэм лъагъумыхъуныгъэ яхузигъэщӀащ. 19Хэт зыщӀэр ар Ӏущу щытынуми, акъылыншэу къыщӀэкӀынуми? Мы уафэм и щӀагъым сыщӀэту пщӀэнтӀэпсрэ акъылкӀэ къыщызлэжьар псори аракъэ-тӀэ къызыхуэнэнур? Мыри пщӀэ зимыӀэщ.

20Сигу зэщагъэуащ мы уафэм и щӀагъым сыщӀэту гугъуехьыр пылъу къыщызлэжьа псоми: 21и Ӏущыгъи, и щӀэныгъи, и ӀэпэӀэсагъи ирихьэлӀэурэ цӀыхум къилэжьар къанэ щымыӀэу и Ӏуэху зи цӀэ зыхэмылъым къыхуигъэнэжын хуей мэхъу. Мыри пщӀэншэщ, жыпӀэнурамэ, захуагъэ зи цӀэ зыхэмылъщ. 22Сытыр и щхьэпэ мы уафэм и щӀагъым щӀэту цӀыхум гугъуехьыр пылъу щилэжьымрэ къиину щишэчымрэ? 23ӀуэхукӀэ гъэнщӀауэ игъакӀуэ и махуэхэр гухэщӀрэ гукъеуэ хэмыкӀ защӀэщ. Жэщ дыдэми гупсэхугъуэ иӀэкъым. Арыххэуи, мыри пщӀэншэщ.

24Ешхэрэ ефэу, и лэжьыгъэ щыгуфӀыкӀыу псэуным нэхъыфӀ цӀыхум дежкӀэ щыӀэкъым. КъызгурыӀуащ а псор Тхьэм зэритыгъэр. 25Хэт Арыншэу ишхыр зыщыкӀуэнур, ищӀэми щыгуфӀыкӀыфынур?#2:25 Е «Сэр нэмыщӀ ишхым щыгуфӀыкӀыу хэт шхар?» 26Тхьэр зыхуэарэзы цӀыхум Ӏущыгъи, щӀэныгъи, насыпи ирет. Ауэ псэкӀуэдыщӀэм бэлыхь мыухыжыр трелъхьэ: мылъку зэхуэлъэфэсын нэхъ плъапӀэ имыӀэжу къегъанэ, Тхьэм и нэфӀыр зыщыхуам иужькӀэ ар иритын хуэдэу. Мыри пщӀэншэщ, зи щхьэпи щыӀэкъым.

Currently Selected:

ДжакӀуэ 2: АдгФЛ

Highlight

Copy