Данил 5
5
Блыным тратха псалъэхэр
1Пащтыхь Бэлъщэцар#5:1 Пащтыхь Бэлъщэцар – НэгъуэщӀ тхыдэхэм къызэрагъэлъагъуэмкӀэ Бабылейм иужьрей пащтыхьу яӀар Набонидщ. Ауэ Набонид куэдрэ щыӀэтэкъыми, абы и къуэ Бэлъщэцар пащтыхьыпӀэр иӀыгъыу щытащ и адэр къэтыху. , и блыгущӀэтхэм ящыщ миным ефэешхэшхуэ яхузэхишауэ, абыхэм я гъусэу санэ ефэрт зэгуэрым. 2Фадэр къыпкърыхьауэ, Бэлъщэцар унафэ ищӀащ дыжьынымрэ дыщэмрэ къыхэщӀыкӀа фалъэхэр, и адэжь#5:2 адэжь – АрамеибзэкӀэ «адэ», ауэ а псалъэм нэгъуэщӀ мыхьэнэхэр къикӀынкӀи мэхъу «адэжь» е «зи пӀэм уиува» жиӀэу. Апхуэдэуи еплъ 11-нэ, 13-нэ, 18-нэ пычыгъуэхэм. Бэлъщэцар Нэбыхъунэщыр и хэту щытами ехьэлӀауэ щӀэныгъэлӀхэр зэгурыӀуэу щыткъым. Нэбыхъунэщыр Тхьэм и Унэу Ерусалим дэтым къришауэ щытахэр, къахьыну: езыри, и блыгущӀэтхэри, и фызхэри, и жэщгъуэлъ цӀыхубзхэри абыхэмкӀэ ефэн папщӀэ. 3Арати, Тхьэм и Унэу Ерусалим дэтым кърашауэ щыта фалъэхэр къахьри, абыхэмкӀэ ефэн щӀадзащ пащтыхьми, абы и блыгущӀэтхэми, и фызхэми, и жэщгъуэлъ цӀыхубзхэми. 4Санэ здефэм псоми я тхьэхэр ягъэлъапӀэрт – дыщэм, дыжьыным, гъуаплъэм, гъущӀым, пхъэм, мывэм къыхэщӀыкӀахэр.
5Асыхьэтым цӀыхуӀэм и Ӏэпэхэр къэхутэри пащтыхь сэрейм и блынджабэ джафэхум, уэздыгъэм и нэхур здытридзэм деж тетхыхьын щӀидзащ. Пащтыхьым цӀыхуӀэ тхэр къилъагъури 6и фэр пыкӀащ. Апхуэдизу шынагъэм зэщӀищтати, и лъэгуажьэхэр зэкӀэщӀэзызэри и лъакъуэхэр щӀэщӀащ.
7Пащтыхьыр ину кӀиящ, нэщыпхъуэхэри, мэгъухэри, удхэри къыхуашэну унафэ ищӀу. Ахэр – Бабылейм и усэрэжхэр – къызэрысу захуигъэзащ: «Мо тхыгъэм къысхуеджэу абы къикӀыр къызгурызыгъаӀуэр чэтэныплъ лъапӀэкӀэ езгъэхуэпэнурэ, дыщэ лэрыпси и пщэм ирезгъэлъхьэнущ, си пащтыхьыгъуэм и Ӏэтащхьэ ещанэуи згъэувынущ», – жиӀэри.
8Бэлъщэцар и усэрэжу хъуар къызэхуэса щхьэкӀэ, ахэр тхыгъэм къеджэфакъым, абы къикӀри пащтыхьым жраӀэфакъым. 9Абдежым Бэлъщэцар пащтыхьыр нэхъ Ӏеижу къэшынащ, и фэри шэхум хуэдэу пыкӀащ, и блыгущӀэтхэми ящӀэнур ямыщӀэжу къызэхэнащ.
10Абыхэм я зэрызехьэ макъыр пащтыхь гуащэм#5:10 пащтыхь гуащэм – Зи гугъу ищӀыр пащтыхьым и анэрауэ къыщӀэкӀынщ. зэхихри, ефэешхэр щекӀуэкӀ пэшым щӀыхьащ. «Зи щӀыхьыр ин ди пащтыхь! УщӀэгузэвэни уи фэр щӀыпыкӀыни щыӀэкъым! – жиӀащ абы. 11– Уи пащтыхьыгъуэм исщ цӀыху, тхьэ лъапӀэхэм я псэр#5:11 тхьэ лъапӀэхэм я псэр – Е «Тхьэ лъапӀэм и псэр»; апхуэдэуи еплъ пычыгъуэ 14-нэм. зыхэт. Уи адэжьым и тетыгъуэм наӀуэ къэхъуауэ щытащ абы акъыл нэхуи зэхэщӀыкӀыныгъэшхуи зэриӀэр, тхьэхэм я Ӏущыгъэм хуэдэ Ӏущыгъи зэрыхэлъыр. Уи адэжь Нэбыхъунэщыр ар Ӏэзэгъуазэхэми, нэщыпхъуэхэми, мэгъухэми, удхэми тхьэмадэ яхуищӀауэ щытащ. 12А Данил жыхуаӀэу, уи адэжьым Бэлътэщэр зыфӀищыгъар, и акъылыфӀагъымкӀэ, и щӀэныгъэмкӀэ, и зэхэщӀыкӀыныгъэшхуэмкӀэ, пщӀыхьэпӀэхэр зэрызэхихуфымкӀэ, щэхухэр сэтей къызэрищӀыфымкӀэ, Ӏуэху зэхэзэрыхьахэр зэрызэхихыжыфымкӀэ хуэбгъэдэн щымыӀэу цӀэрыӀуэ хъуат. Аращи, Данил къегъаши, абы псори гурыӀуэгъуэ пхуищӀынщ».
13Данил къашэри, пащтыхьым абы жриӀащ: «Уэра Данил хъужыр, си адэжь пащтыхьым Ехьудейм къриша гъэрхэм ящыщыр? 14Сэ зэхэсхаи уэ тхьэхэм я псэр пхэту икӀи акъыл нэхуи зэхэщӀыкӀыныгъэшхуи уиӀэу, Ӏущыгъэшхуи ббгъэдэлъу. 15АтӀэ, сэ мо тхыгъэм къезгъаджэу къикӀри къезгъэӀуэтэну усэрэжхэри мэгъухэри къезгъэшати, абыхэм ар яхузэфӀэкӀакъым. 16Ауэ, уэ птеухуауэ сэ зэхэсхащ пщӀыхьэпӀэхэм къарыкӀыр къэпщӀэфу икӀи зэхэзэрыхьа Ӏуэхухэр зэхэпхыжыфу. Иджы, мо тхыгъэм укъысхуеджэрэ ар къызгурыбгъаӀуэмэ, чэтэныплъ лъапӀэкӀэ уезгъэхуэпэнурэ, дыщэ лэрыпси уи пщэм ирезгъэлъхьэнущ, си пащтыхьыгъуэм и Ӏэтащхьэ ещани усщӀынущ».
17Данил пащтыхьым жэуап иритыжащ: «Тыгъэхэр къызыхуэгъэнэж, саугъэтхэмкӀи нэгъуэщӀ зыгуэрым хуэупсэ. Арыншауи сэ уэ тхыгъэм сыкъыпхуеджэнщи, къикӀри бжесӀэнщ.
18Ди пащтыхь лъапӀэ, Тхьэуэ я нэхъ Лъагэм уи адэжь Нэбыхъунэщыр тепщэныгъи, лъэкӀыныгъи, щӀыхьышхуи, пщӀэшхуи къылъигъэсат. 19Тхьэм абы апхуэдиз лъэщыгъэшхуэ къритати, сыт хуэдэ лъэпкъым щыщри, сыт хуэдэбзэкӀэ псалъэри, цӀыхуцӀэ зиӀэ псори абы и пащхьэ щыкӀэзызу къыщышынэрт. Абы зыхуейр иукӀырт, зыхуейм гущӀэгъу хуищӀырт; зэрыхуейуэ хэти иӀэтырт, хэти тридзырт. 20Нэбыхъунэщыр пагагъэр къытекӀуэри зыкъыфӀэщӀыжащ, абы къыхэкӀыуи и тахътэм кърагъэщэтэхри и щӀыхьри фӀагъэкӀуэдащ. 21Ар, цӀыхухэм къыхахури, хьэкӀэкхъуэкӀэхэм хуэдэу акъылыншэ хъуауэ, шыд Ӏэлхэм я гъусэу, Ӏэщым хуэдэу удзыр и шхыныгъуэу, уафэм къех уэсэпсыр и пкъым къытехэу псэуащ, Тхьэуэ я нэхъ Лъагэм цӀыхухэм я пащтыхьыгъуэр зыхуейм ириту зэрыӀэщӀэлъыр зэхищӀыкӀыху.
22Ауэ уэ, абы и къуэ#5:22 и къуэ – Арамеибзэ псалъэм «и щӀэблэ» е «и пӀэм иува» жиӀэу къикӀынкӀи мэхъу. Бэлъщэцар, а псом ущыгъуазэ пэтрэ, Ӏэсэ зыпщӀакъым. 23Уэ зыбгъэлъагэри уафэм и Тепщэм упэщӀэуващ: Абы и Унэм къыщӀаха фалъэхэр къебгъэхьри, уэри, уи блыгущӀэтхэри, уи фызхэри, уи жэщгъуэлъ цӀыхубзхэри абыхэмкӀэ фефащ! Уэ дыщэм, дыжьыным, гъуаплъэм, гъущӀым, пхъэм, мывэм къыхэщӀыкӀа тхьэхэр, зыри зымылъагъурэ зыхэзымыхӀахэр, акъыли зимыӀэхэр бгъэлъэпӀащ, атӀэ уи гъащӀэри уи гъуэгу псори Зи ӀэмыщӀэ илъ Тхьэм лъытэныгъэ хуэпщӀакъым. 24Аращ мо тхыгъэр зытха цӀыхуӀэр Абы щӀыуигъэлъэгъуар.
25Мыбдежым тетым къызэреджэр мыпхуэдэущ: МЕНЕ, МЕНЕ, ТЕКЕЛ, УПАРСИН. 26А псалъэхэм къикӀыр мыращ:
МЕНЕ#5:26 МЕНЕ – Арамеибзэ псалъэм къикӀыр «ябжащ». – уи тетыгъуэм и махуэхэр Тхьэм ибжри кӀэ иритащ.
27ТЕКЕЛ#5:27 ТЕКЕЛ – Арамеибзэ псалъэм къикӀыр «яшэчащ». – уэ тэрэзэкӀэ уашэчати, упсынщӀэ Ӏейуэ укъыщӀэкӀащ.
28ПАРСИН#5:28 ПАРСИН – АрамеибзэкӀэ: «перес»; «парсин» псалъэр куэд бжыгъэм итщ. Псалъэм и лъабжьэм «гуэшын» жиӀэу къокӀ, ауэ «персы» жиӀэу къыпщыхъункӀи мэхъу (я къэпсэлъыкӀэкӀэ зэтохуэри). – уи пащтыхьыгъуэр ягуэшри мыдхэмрэ къэжэрхэмрэ#5:28 къэжэрхэмрэ – Персие щӀыналъэм щыпсэуа лъэпкъщ. иратащ».
29Абдежым Бэлъщэцар и унафэкӀэ Данил чэтэныплъ щыгъынкӀэ къахуапэри, и пщэм дыщэ лэрыпси къралъхьащ, пащтыхьыгъуэм и Ӏэтащхьэ ещанэуи ягъэӀуащ.
30А жэщ дыдэм Бэлъщэцар, бабылейхэм я пащтыхьыр, яукӀри, 31абы и пӀэм иуващ мыд лъэпкъым щыщ Дарий. Ар абы щыгъуэ илъэс хыщӀрэ тӀурэ хъурт.
Currently Selected:
Данил 5: АдгФЛ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2009, 2018, 2021
