Rom 3

1Ga Juib ddi kalang ga toigé ddang ga? Walé go mandeli danga jégené ga? 2Ké ddiang henga combu cawa Kumu biga ga Juib kual goi tumu jua. 3Na ya mena ga? Kalang ga pena a duroigé nia geddang ’eno kau na, Kumu da ddé geddang goi cong ca ké ba belé isinwa ga? 4Na main kain ’eno, kema goni goni nia belu go poi kau, na gad Kumu jomanga kual goi go cindi, main cidab do Kumu toi ba yang waldong wang kain:

Na gad ké sol ca jia geddang ca kual goin go yo,

Ké nia kaidé kual cain kau, jia ddigé.

5Ama isinwa duana nia gel geddang do Kumu toi dong na, na ya mena ga? Kumu nia kaidé kual caina, ddia geddang ’eno ga? (’Enung yé kual mainya kalang kain.) 6Na main kain ’eno, Kumu nia geddang ’eno na, ddia bbal kaidé kual ca delinya mena ga?

7Ama poi doang nia gel Kumu kual goi go cindi dang hormo doi waldong wang na, ké kaidé kual cang main ’enunga kema go isini kainya cawa ga? 8Ni wia kain na, na logeng henga ga isini ca dda ddarua gel dong ’eno ga? Kalang ga pena yé kual go isini cang, ké yé wa: ’Enunga dor kual main kain. Kumu da kaidé kual ca kalang lé bbal ca wané dogé.

Kema go geddang wo ’eno

9Na mena ga? Na ga Juib, na ddia kalang ga toigé ddang ga? Na main kain ’eno. ’Enung yogeng ka, ga Juib dang kalang ga toigé ddang mam wa to isinwa dugo. 10Cidab do Kumu toi yé waldong wang:

Kema go geddang wo ’eno, kau pena wo ’eno,

11Kema go solé kual toi pena wo ’eno bua,

Kema go daré Kumu pena wo ’eno bu’.

12Kalang mam suguddong hasang Kumu,

Ké kaiyong to gusugé pena.

Kema go lo henga ga ddari pena wo ’eno.

13Tumoigé mainya umbung go ’embé temai goang hangang kain bua,

Kelendigé ya kual go babé bua,

Kual go andong a kebegé mainya mainyé do kumbulo toi kain bu’,

14Kebegé wonanga bbesé dang kual go ddainyi.

15Ca deddé temai na, ké gera kala,

16Kiddin gani gani ga ka hal kené na,

Ké dda toanyang dang kederé ’endua.

17Ké sela giyong go jalua juam ’eno,

18Ké muru Kumu ’eno bu’.

19Na sol ca kual go so go Kumu koi ba yei mam. Ddi yéga ké ga ba jom to so dugo ca ddo kema pena soang toi ’eno bua, ca kalang a duro delinya mam jom wa to kual go kaidé go Kumu koi bu’. 20Cawa kema pena go belé geddang tumu Kumu ca magé go so na, wo ’eno. So go Kumu koi gel kema isinwa doi mera.

Kumu minyé kalang

21Cakcak kua Kumu gelna giyong go ddi ba belana geddang tumoi, na a gusu so ’eno, so go Kumu koi dang ga cogelé kebu go Kumu koi ba yé kual goi. 22Kumu belé kalang geddang ca bo cindi gogé ca Jésu Krist. Ddi lé kalang ga bo cindi ca Krist mam na main kain, cawa kalang mam na pena tumu Kumu. 23Cawa kalang mam la isinwa, ké wiang hormo do Kumu toi. 24Ca olum do Kumu toi na, ddi belegé geddang kalin ca Jésu Krist go ba torgé. 25Kumu belé Jésu Krist sandega do tibé dang kebardi. Krist bbal burogé kalang ga bo cindi cai isinwa dogé. Kumu lé main kainya ca gelé geddang doi waldong wang. Ddi ’yom gusi tumu din, ddi sol isinwa do kalang togé semgen. 26Ama a duro saman do cakcak kua na, ddi gel waldong wang ca ddi belé kalang geddang, ddi dar ca ddi jomé geddang bua, ddi dar ca kalang ga bo cindi ca Jésu bel geddang mam bu’.

27Henga ga ddang ga kalang pedé gusugé dang nagé wo kené ga? Henga pena ja ’eno, na ca wa ga? Na ca ké ba magu so ga? Na main kain ’eno, ama na ca bo cindi. 28Cawa na sol ca kema belé geddang tumu Kumu na ca bo cindi, na ca magé go so ’eno. 29Kumu na Kumu go Juib kogé mera laba, ddia Kumu go kalang ga toigé ddang kogé bu’ ga? Cindi ddia Kumu go kalang ga toigé ddang kogé bu’. 30Cawa Kumu wo kené pena mera. Ddi belé ga Juib geddang ca bo cindi gogé bua, ddi belé kalang ga toigé ddang geddang ca bo cindi gogé main kain bu’. 31Henga lé kua gelna ca bo cindi toinya so cong mam ga? Na main kain ’eno, na bu soa dono do nain bbad com.

Currently Selected:

Rom 3: TNG1978

Highlight

Copy