Rom 16

Waigi do Paul toi

1’Enung yogenga hendé do temdena Pibi toa, to lé gia duro yaué go Kumu koi go a Sénikeré. 2Ga ’ya dang Bagulong gusondi main kalang ga Kumu kai ba lang kain. Ga jigena dang henga mam ga to ba wiang nagé, cawa to jégen kalang combu dang ’enung bu’.

3Ga la Preskila kang Akila kamdeng ga duro gié go Jésu Krist koi labia. 4Ké bu gusugé temai cang ca ’enunga maré ’eno, na ’enunga logé désé mera ’eno, ama yaué go Kumu koi a duro kalang ga toigé ddang mam légé désé bu’. 5Ga la yaué go Kumu koi go wa yaué tagé labia bu’. Ga lai kermeng Apanét labia, na ddi go bo cindi tumu jua ca Krist a ca gesong ga Akai. 6Ga la Maram do lo gié nain caigeng labia. 7Ga lai Andronikus kang Junias labia, ka kalndeng, ké jomang nang duro gerngang. Ka kalang ga gemdong a duro pajerong ga gié, ké belé ga Krist kaia tumang.

8Ga lai Ambulatus labia, ddia bajandeng ca Bagulong. 9Ga lai Urban labia, ddia mondini go gié duro gié go Krist koi, kang bajandeng Astaki. 10Ga lai Apél labia, ddia go geddang duro bo cindi ca Krist. Ga lagé kalang ga ta Aristabul labia. 11Ga lai gelmeng Hérodia labia. Ga lagé kalang ga ta Narsis ga ba bu cindi ca Bagulong labia. 12Ga la Téraipén kang Traipas ga lo gié ca Bagulong labia, dang Peresid do ba lé gié combu cai bu’. 13Rupus go lo gié go Bagulong koi ddar kang ’yoi do main ’yoang kain, ga lagé labia bu’. 14Asinkrit, kang Piligon, kang Hermé, kang Patrobas, kang Harmas, kang karmé kané gang nagé na, ga lagé labia bu’. 15Pélolog kang Juli, kang Néré, kang temdo, kang Olimpas, kang kalang ga Kumu kai mam ga jomang nagé na, ga lagé labia.

16Ga lageng gusugeng labiang ddagédé go gusugeng. Yaué go Krist koi mam legeng labia bu’.

Géjé go karé

17Karmeng, ’enung olgeng, lageng angalang ké ga coderé kalang, na ké ga naré kalang ga bo cindi ca kobé gelé go keng ba ’yei. Ga nyimgeng gusugeng cong hasang nagé. 18Cawa kalang ga lo main kain na, ké lé gié go Bagulondena Krist koi ’eno, ama ké lé gia ca kederégé mera. A gusu kual gogé go doré go ddari go mowa gusu na, ké babu kalang ga mader ’eremé gogé. 19Kalang mam sol ca keng kobu kual go Bagulong koi, na ca ma, gusung mowung caigeng, ama ’enung dar ca keng jimang narua ca lo henga ga ddari, ga jimageng carara, ddo keng lo henga ga isini ’eno. 20Kumu go bo jalua juam ji ’yoab ca heradé Sidan to gondegeng dugo.

Dda wai do Bagulondena Jésu toi jimang nageng.

21Mengang go gié Timoté legeng labia, Lukius dang kalndeng Jason kang Sosipata legeng labia bu’.

22Dang ’enung Tartius go pasé maktub lé, ’enung legeng labia dang Krist gusondi.

23Gaius go luang terga go ’yo yaué go Kumu koi tai legeng labia. Arasté go magé laré go gulong kang kermana Kartus, ké legeng labia bu’.

[ 24Dda wai do Bagulondena Jésu Krist toi jimang nageng mam. Amin.]

Debainyé go karé

25Dda na debainyé Kumu, ddi bbal bogeng dono a duro bo cindi ca Nô do Ddari do ’enung wa doara, ’enung dora kula go Jésu Krist koi ca solé go mendem go Kumu koi go keng ba ’yei. Ké wosu mendem la tumu din duro saman do ba hal. 26Ama cakcak kua na, ddi ddé kalang sol mendem lé toa arin ca cidab do ga cogelé kebu go Kumu koi togé, main Kumu go bera kuddum ba yegeng kain, ddi bu kalang ga toigé ddang mam solé mendem lé toa ca kandia bu cindi cai bua, kandia kubai bu’.

27Kumu pena go nari na, ddiang hormo ca Jésu Krist waindo waindo bera kuddum. Amin.

Currently Selected:

Rom 16: TNG1978

Highlight

Copy