Rom 14

Ddo kema kaidé kual ca kermi ’eno

1Kema go bo cindi go todero na, ga ’yai gusugeng, ddo keng mainyé kualang nai ’eno. 2Kema go pena go bu cindi ’erem ddiang dono ca do henga mam, ama kema go ddang go bu cindi goang todero na, ddi di kaia gasem mera. 3Kema go wa do henga mam na, ddo ddi doré mondi go basé do henga mam kel ’eno, kema go ba da henga mam ’eno na, ddo ddi kaidé kual ca mondi go wa do henga mam ’eno, cawa Kumu ba ’yei ’enda. 4Jia wang go kaidé kual ca mondin marna goi ga? Ddi nia lé gié ddar, kau ddi nia aserong na, na kual go bagulondi koi, ddia ’eré gag ca bagulong da bi dono do ’yomé gusi.

5Kema go pena ’erem ca wolé kona ddi mondi, ama koné ’erem ca wolé mam na pena, na gad kema goni goni kau, ddi sela kual lé ddara duro ddaindi. 6Kema go wa magé wolé na, ddi maga ca boi Bagulong hormo, kema go wa do henga mam na, ddi dia ca boi Bagulong hormo bu’, cawa ddi lei Kumu désé ca do goi, kema go da henga mam ’eno kau, na ca boi Bagulong hormo bua, ca loiang Kumu désé bu’. 7Cawa a duraina na, kema go jomang cindi dang macai na, wo ’eno, kau kema nia ma na, ddi ma macai ’eno, na nia jomang cindena na, na jomang cindena ca Bagulong. 8Na nia ma na, na ma ca Bagulong, main kain na, na nia jomang cindena, kau na nia margeng na, na ga Bagulong kai. 9Cawa Krist ma, ddi belang cindi a duro ga maré ca ddia jomé Bagulong go kalang ga maré kogé bua, dang ga jomang cindegé kogé bu’. 10Ama ji, cawa ma ji kaidé kual ca kermin ga? Cawa ma ji dor kermin kel ga? Na mam da ’eregeng tumu Kumu ca ddi kaidé kual cainageng. 11Cawa cidab do Kumu toi yé waldong wang: Bagulong yé wa:

Main ’enung wo kenang cindung na, kema goni goni kau da poi gomdi dugo tumang.

Kema goni goni kau da soi noi, ddia yé wa:

’Enunga Kumu go dono.

12Com, kema goni goni kau da ’eré tumu Kumu ca yoi henga gai ga ddi ba légé mam.

Ddo kema aseré kermi ’eno

13Na ca ma, ddo na kaidé kual ca gusuna ’eno, ama ga nyana gusugeng ddara, ddo keng lo henga ga aseré kermegeng duro isinwa ’eno. 14Cawa ’enunga pena dang Bagulong Jésu na, ’enung sol carara ca henga pena belé ddisin dang macai na, wo ’eno, ama kema nia ’erem henga la ddisin na, henga lé da belé ddisin cindi. 15Ji nia aser kermin ca henga ga ji wa dogé na, jianga kederé ’yo ’eno, ddo ji kaié ddi go Krist ba ma cai ca henga ga ji wa dogé ’eno. 16Henga ga ji solgé main henga ga ddari na, ddo ké yo kual caigé main henga ga isini kain ’eno. 17Cawa Leu do Kumu toi na henga ga do dang ga so ’eno, ama toa geddang bua, dang jalua juam bua, dang gusu mowa go ké bena a gusu Habé ga Kumu kai bu’. 18Kema go lo gié go Krist koi main kain na, ddi mowia Kumu gusi bua, kalang kederégé ’yei bu’.

19Na ca ma, dda na daregeng henga ga buana jalua juam bua, dang henga ga buana dono duro bo cindi bu’. 20Ga toinyé gié go Kumu koi ca henga ga do ’eno. Cindi henga mam bbala do, ama ca do henga ga aseré kermin duro isinwa na, na wané. 21Kermin nia da aserong duro isinwa ca kunyung ga ji wa do bua, dang sur kangndo ga ji wa so bu’ na, na golgo ji do kunyung ’eno bua, ji so sur kangndo lé ’eno bu’. 22Kual go ji ’eremi duro ddaindin ca henga lé na, ji magai ga gusin tumu Kumu. Kema go sol ca ddia la gia basé wané na, ddiang gusu mowa. 23Ama kema goni goni goa dang ’eremé sua sua ca henga ga ddi ba digé na, Kumu da kaidé kual cai cawa ddi di henga langa bo cindi ’eno. Gié mam go lo basé bo cindi ’eno na, na isinwa.

Currently Selected:

Rom 14: TNG1978

Highlight

Copy