Gié 25

Paul dar ca ddia ora tumu Sésar go ddo ca

1Péstus lé wolé subu ca gesong gai, kardené ddi sai a Sésaré ’yé Jorsalem. 2Gemdong ga tibé Kumu dang gemdong ga Juib kagé sai ’yé kembé Paul gusi. 3Ké ’engeri ca kondia gulang Paul ’erang nai a Jorsalem. Ké nyan kual ca golei giyong ca ka deddei. 4Ama Péstus jogu yégé wa: Paul wa duro gerngang a Sésaré, ’enung bang jia ’yoab ca jogé kené. 5Ddi jogé yégé ddang com: Dda gemdong gageng jogé Sésaré dang nang, kema lé kua nia lé wané na, ka si kual cai a kené.

6Kiddin ga Péstus wolé duroigé main wolé margem kau moac na, ddi sai jogu ’yé Sésaré. Waindo joguddu ddi jom ca pogu go kaidé kual, ddi yégé kandia ’erangang Paul. 7Kiddin ga Paul ba ’erga na, ga Juib ga ba saga a Jorsalem sai lurei dugo, ké kembei dang kual go gemdong combu, ama na kual go hendé ’eno. 8Paul sai dor kual cai cong, ddi yé wa: ’Enung la wané ca so go Juib kogé ’eno bua, ca kulu go yaué go Kumu koi ’eno bua, ca go ddo ca ’eno bu’. 9Péstus dar ca waié gusu ga Juib, na ca ma ddi ’enger Paul wa: Ji dara ca oré Jorsalem ca kandia kaida kual cain tumang ca kual lé ga? 10Paul jogu yei wa: ’Enung ’era wa tumu pogu go kaidé kual go ddo ca koi, kua na kiddin ga ’enung dar ca ké kaida kual cang, ’enung la henga ga isini dang ga Juib cang pena ’eno, main ji bang ba solang kual lé kain bu’. 11’Enung nia lé henga ga isini, kau henga ga bbalé maré na, ’enung go kainyé maré ’eno, ama kual go ké ba si cang nia cindi ’eno na, kema pena go buang kobegé kau wo ’eno, ’enung dar ca oré ’eré tumu go ddo ca. 12Kardené kiddin ga Péstus ba yé kual dang gemdong gai na, ddi jogu yei wa: Ji nia dar ca oré ’eré tumu go ddo ca na, cindi jia ’era tumu go ddo ca lé.

Paul ’eré tumu Agripa kang Bérnis

13Kardené wolé go pena kelma Agripa kang Bérnis ’yé Sésaré ca lo Péstus waigi. 14Ké jom kené lé wolé muddug, Péstus yei kelma lé kual go Paul koi, ddi yei wa: Kema pena wo kené go Pélis ba ddei duro gerngang. 15Kiddin ga ’enung ba Jorsalem na, gemdong ga tibé Kumu dang gemdong ga Juib kagé, ké kembei gusung, ké olung ca ’enunga kaida kual cai.

16’Enung jogu yégé wa: Kalang ga Rom dang hada do bo kema kuaba kalang ga ba si kual cai, basé ddi ’eré tumoigé ca doré kual cai cong tumu jua ’eno. 17Kardené ké jogu niang nagé, ’enung la liling ’eno, ama waindo joguddu ’enung jom ca pogu go kaidé kual a duro bedang, ’enung yégé ca ké ’erangang kema lé. 18Kiddin ga kalang ga kembei lé sai ’eré dang na, ké si kual go isini cai main ’enung ba ’eremang kain ’eno. 19Kual go ké ba si cai na, na ca hada dogé dang kema pena go ké ba tei Jésu go ba ma, ama Paul yé waldong wang kondia wo kenang cindi. 20’Enung sela kual go main kain lé kaidé goi ’eno, na ca ma ’enung ’enger Paul wa: Ji dar ca oré Jorsalem ca ké kaida kual goin a kené ga? 21Ama Paul yeni wa: Nia magai duro gerngang bera ca go ddo ca na kaida kual cai jua. Na ca ma ’enung yégé ca ké magai bera ’enunga gii gusu go ddo ca lé. 22Agripa yei Péstus wa: ’Enung bang dar ca jo kema lé kual goi dang duro dé. Péstus jogu yei wa: Waindo jia jé kual goi lé.

23Waindo na, Agripa kang Bérnis andong duro kulu go kalang ga yaué kené combu. Kiddin ga ké ba andong kené dang gemdong ga asengeriyong kagé bua, dang gemdong ga gulong lé bu’ na, kalang bigé hormo bbani ’eno, Péstus yégé kandia gulang Paul. 24Kardené Péstus yé wa: Kelma Agripa dang keng mam ga ba yau dang nani kua, keng sol kema lé kua go ga Juib combu ba kembei a gusung a Jorsalem bua, a ba kua bu’, ké soi noigé, ké yé wa: Kondia bbala maré. 25Ama ’enung na, ’enung sela henga pena ga ddi ba légé ga bbal maré ’eno, ama ddi banga daré ca ddia oré tumu go ddo ca, na ca ma ’enung gii kené. 26’Enung sela kual go isin go pasé cai ca boi go ddo ca ’eno, na ca ma ’enung gulgai tumoigeng mam bua, dang tumu ji kelma Agripa bu’, ca keng ’engeri kual lé toiang duro, ca ’enung wai kual go pasé cai. 27’Enung ’erem ca ’enung nia gi kema go gerngang lé gusu go ddo ca, basé pasé wané doi do ké ba si cai ’eno na, na kual go mam.

Currently Selected:

Gié 25: TNG1978

Highlight

Copy