1 Timoteo 6
6
Siupapo inkipijnas ti iyoyi ki inamtik
1Siunapo inkipijnas, 'esiji ka ink'iuye napo jika anechiyasas, jawo lajaye. Ja'nakayeyijna'a ti ja lajak'ipa ka inlaki pi Sinia', jla'yi ki jika'neyasajnaye, ka wo'ate, “Je p'an 'es.” 2Jlampet siunapo ti ijyiwite ni jika anechiyas ti iyoyi ki Inamtik, je 'es ka jikiowe iwone 'ate, “Ejlowek je ijiat ka its'iuye, jla'yi ka iyo lajaye, kajeyepa ti iyo'ate awo ti iyoyi ki Inamtik.” 'Yina kat'aja ti 'esk'i ka ijiatayi ka inoyeje, 'yina ti jikiechayik'i ti iyoyi ki Inamtik, kajeyepa napoka siunapo jika anechiyasas, Sinia' jilis ti wuj ti ti'niejmak'i.
Siunie ti ijiate ti iyoyi ki Inamtik yame'e pet ti 'esi
Woyi amtikie' siu'nie, jla'yi ka 'eyasane napo i'nio'. 3I'nio' ti taka'neyasane siunie 'wenayiji ti je jnanjlajape'n ki iyo niwa jlamtis ti isis pa Saka'niona Jesús ti Sijwajieti, jla'yi ni iyo pit ni jika'neyasajnaye, ni tajle ni sitienkiujnieye ti 'es, 4naka ni i'nio' ti initonit, jlam'ne lajk'iyipa ka iwo je 'yije'en. Iyot'e 'ate ni inlaye, yimi'n ti iniewitiji'n napo ijia, jlam'ne je 'yakajk'i siupi ijwi'il ka initajlatisi, 'yina jlam inilanejen'ni papo ijia. Nak tajle ni siunie ti je paj ka ijnol wita'm napo i'nio', inisela napo i'nio', initejlitk'i wita'm napo i'nio'. 5Laj jlaja ti tejets'i wita'm, 'yina napoka napo ti initiajnat naka ni jlosik ti 'es, netia'n ki iyo ti 'yijene naka ijiatk'i. Ijwilayis ka ijiatayiji ka 'esieyi ka 'naka siunie kan'yakanisi ti iyoyisi siunie jitienkiujnieye ti 'es.
6Ijiatk'i kiaka, ti je jlase' ni ikajliji ni i'nio' ti po' naka ti jitienkiujnieye ti 'es, siuti jampeni'yi pi jwamjla'a pi nitia i'wi'in.#Fil 4.11 7Siuti kia'iyo k'iejli awakie ape'e 'ni ajnat, lajk'ipa ka itiunie'ni, 'yina kiak jawo'ojyi pet, siuti jaliki 'ni ajnat, ja lajak'ipa ka k'iejliyeyi ka itiunie.#Job 1.21; Sal 49.17; Ec 5.15 8Siuti po' ni sak, jla'yi ti po' ni 'oyek'i, 'esiji apejnikie'e wek kajeyepa ti 'etsaka ti akajmak. 9Jlampet siunapo i'nio' ijialas ka inkasaja je kia'iyo. Je to'm ilia'm naka inkajejlasaye siunie iyo ape'e 'ni ajnat, jak je iyoyiji yiyi ts'iji ijiatayiji ti inikajyi'n. 10Kajeyepa siunie jijwetis wikie'eyi niwaka je isis, naka ti inemijnaye tena'a jana wikiniet'aj,#Heb 13.5 jla'yi siunapo ti jitienkiujnieye ipijlanitia'm, ti iyojonk'iye ka jlomas intejwe ka je inetiane janak wikiniet'aj, napoka napo yiyi ts'iji initiajnat ni jitienkiujnieye ti 'es, 'yaka ijlie'en, sekyi'i wuj ti inilayiti ti iyo ni jijliak'ali ti iyo ti yiji ni jlosik.
“Mayi ki iyo ni awoki ti 'es, ká aleyi jla'yi ti ja ke anilaki ti jitie'yi ilia'm ni je 'es”
11-12A'm ti Sinia' jlasts'a'm ti inwakal, joskiye niwaka. Katate ka woye ni siunie 'es ti je tak'emiyeje wek; katate ti ani'neti pi Sinia'; woyi ni atankiujnieye ti 'es; siunie emijnaye kia'iyojliyi; je paj ka leyi naka; ke injwesie. Ni'net siuti jitie'yi ilia'm ni je 'es, 'yina ti po' 'ni atankiujnieye ti 'es. Akio' et'i janak a'wasankiye ti laj jlaja, 'yina siuti Sinia' tana'api jiwoyepe 'ate, “Sijwajieti Jesús naka ti 'Yaka'niona pet”, ti jlene jitieyi'i japo i'nio' ti 'loj.
13'Nakayi ya'am ene jitieyi'i pa Sinia', ti iyo ji'wasankiyeja' wikie'eyi niwa wask'i'nelaja yi' ape'e 'ni ajnat, jitieyi'i 'neje pi Sijwajieti Jesús, jlam ti inikajanit ti inijwel jitieyi'i pa Poncio Pilato,#Jn 18.37 ti ajlo'wa'm ti awo'ate: 14je paj ka leyi siunie ajloye'a'm ka woyi, ja'nakayeyi ti ja ke inets'e paka ka ine'yaja'ni siojopa jloma ti ja'nesi pa Saka'niona Jesús. 15Ka netieje janak jloma, Sinia' ti jla'am ti anechiyas wuj janjlo' ti janapimet. Jlam ti jika anechiyas papoka ijia anechiyasas, jla'yi ti jika'niona pet siunapo ijia inka'nionajas.#Deut 10.17; Apoc 17.14; 19.16 16Ijwienjli jla'am ti je paj ka'na'al, ji'wet pet janak kates siojona ti je ti'wena paka ijnoyi.#Ex 33.17-23; Sal 104.2; 1 Jn 1.5 Lajk'ipa kan'we'en kajeyepa ti lajk'ipa ka'najane paka wone kan'we'en. ¡Ja ke paja ka int'ekiye siunie iyo ti tonitie, siu'neje ni jijweye jajnok'i'ni! Amén.
17Awojonk'iye ka jwejla'm napoka i'nio' ti jwajla'a i'wi'in, ka wone'ate, “Ká anipajayi niwak askijmatis ti po', ti jijwela ka niwakaye ti injwajieta', 'yina siuniwa inkijmatis yi' ape'e 'ni ajnat, je t'o'n.” Ja jloye jla'am ka najataja jla'am ka jitiej iwomisie ni Sinia', 'yina ti jlam ti iwints'e'm wikie'eyi niwa wask'i'nelaja ti 'etsaka nakaye'eje ti yits'e ni sinikanitiejeye. 18Siuti jajloye, wone'ate, “Woyeyi ninta 'es. Siunie jiwoyeyi ti jwajla'a je sitiana, nak 'yenajiap siuniwa askijmayejes ti isis ti jawoyeyi. Ke enieja'm siuniwa askijmatis, pi jane'yi pet pa jawenajia'm.” 19'Yina ti jawoyi naka, 'yiniye ka iwoyi jijwetisila' niwa iyoyi siuniwa jikijmatis ts'iji, sekjane'yi ka i'yakanana'a jana ijiatk'i ti ji'wasankiye.
Siunie yi' jlaja ti Pablo ijliuyeje pa Timoteo kawoyi
20Timoteo, 'esiji ka lesaniji ni siunie Sinia' 'yaka ti je isiwita'a'm ti jawoyi. Ká ak'iuk'i'ni niwaka inamtis jiniliaja ti taj'l ape'e 'ni ajnat. 'Najane ti lajk'ipa ka 'esie ka intajleje, ni'ne ka niwakaye siuniwa wuj ti je isis iyone'ni 'ate napo i'nio' “'najankijnieye”. 21Siunapo yamk'i pet niwaka inamtis ti ajwe'el, ijiate ijlie'en pet naka ti 'es ni jitienkiujnieye.
'Esiji ka Saka'niona jikap'ijliuskiye ine'asap.
Currently Selected:
1 Timoteo 6: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.