Ruma 3
3
1Hintay ti mahalaga sa ngaran Hudiyu may sa balaw Hudiyu? Hintay kay pakinabang nu tinuri ti tawu? 2Daka gid duy. Un-an gid sa tanan, ti manga Hudiyu ti pinaintirgahan manga katutuuhanan bagaw Diyus. 3Kabitay nu ti iba manga Hudiyu balaw yi matinupadun? Ibug aw lugud sabihun kanda balaw matinupadun ti nagrangga sa kay pagtupad Diyus? 4Bukun ay sa katida. Ti Diyus sa katutuuhanan, una ti kada tawu pudilun, angay sa isinurat sa Kasuratan magkun tag sa Diyus, “Hampay kawu kilalan-un kuntay matadlung sa kanmu manga sinabi ag manalu kawu nu pihuun nida kawu sa daut sa mayad.”#3:4 Bantayi diman ti Kanta 51:4.
5Dapat nu kanta kadautan tigpakilala ngap sa kay katadlungan Diyus, unman aw lugud masabi nita ti Diyus salan kay sintinsiya nu kita pagparusahan niya? Katunda ngani ti tawu kay pamagawan. 6Dapat bukun ay sa katida. Nu abi ti Diyus balaw matadlung, kabitay pag mapihu niya ti manga tawu taga kalibutan nu mayad nu daut?
7Dapat nu abi ginan sa kang kapudilan lalu lumutaw ti katutuuhanan Diyus, dahil pag-ipakakit kay katupadan, matadlung aw nguna siya nu parusahan niya aku bilang ga usa ka makasalanan? 8Hayga unman nita masabi magkun, “Pagbuwat yi lang kita daut hampay lalu miburayhaw ti kaayadan?” Magkun ti manga magpuya sa kangku, katunda kunu kang pag-itudlu. Parusahan sida aban Diyus, tunda yi ngani ti kailangan sa kanda.
Ud may Tawu Matadlung
9Kabitay nguna tunda? Kita manga Hudiyu mayad man aw lugud kanta kahamtangan sa manga balaw Hudiyu? Bukun ay duy. Dahil kanmi pinatutuuhanan yi kuntay sinakup kapangyarihan kasalanan ti tanan manga tawu una Hudiyu una balaw Hudiyu. 10Angay sa nisurat sa Kasuratan magkun,
“Ud gid may matadlung, una di usa ka tawu.
11Unman may nakaintindi, ud may maghanap sa Diyus.
12Ti tanan nagsimray sa dalan, nagpakadaut yi.
Unman may magbuwat mayad, una di usa.#3:12 Bantayi diman ti Kanta 14:1-3; 53:1-3.
13Kanda tululnan parihu ga lulubngan nabukasan,
dahil kanda manga bibig paggamitun sa magdaya.
Kanda dila may dalit ga ulay udtu adlaw.#3:13 Bantayi diman ti Kanta 5:9; 140:3.
14Kanda bibig marasuy-aw, masakit kanda pinamagawan.#3:14 Bantayi diman ti Kanta 10:7.
15Madali gid sida nu kanda turunu manlibun tawu.
16Lunsay kadautan ag karukuan sa kanda uryan.
17Unman nida alam ti dalan kahusayan.#3:17 Bantayi diman ti Isa. 59:7,8.
18Unman nida pagpakan-an rugar sa kanda tagipusuun ti magkadala sa Diyus.”#3:18 Bantayi diman ti Kanta 36:1.
19Alam yi nita una hintay ti pagsabihun sa Kasuguan, sinabi yi ngani sa manga napasakup sa Kasuguan, hampay una si unu pag tawu balaw yi may isingyanan ag ti tanan-tanan tawu may kapanagutan nu sa kaudasan sintinsiya Diyus. 20Nakan unman gid may tawu pagkilalan-un Diyus kuntay siya matadlung#3:20 Bantayi diman ti Kanta 143:2. nu dahil lang sa kay pagtupad sa Kasuguan. Kabay ginan ngap sa Kasuguan pag makilala ti kasalanan.
Pagkilalan-un Diyus ti Tawu kuntay Siya Matadlung
21Taynguna bay niburayhaw yi nu kabitay pagkilalan-un Diyus ti manga tawu kuntay sida manga matadlung bukud sa Kasuguan, ag balaw sa pagtupad nida sa Kasuguan ni Muysis. Pinatutuuhanan diman gid tunda sa manga ribru Kasuguan hanggan manga Purupita. 22Una si unu pag tawu nu sumarig siya sa kan Hisu-Kiristu, pagkilalan-un siya Diyus kuntay matadlung, dahil lang sa kay magsarig sa kan Hisus, una manga Hudiyu una manga balaw Hudiyu. 23Nagkasala ti tanan tawu. Nakan unman gid karapat-dapat sa magbantay Diyus. 24Dahil sa pangaawa Diyus kinilala niya sida matadlung. Si Kiristu Hisus ti nagribri sa kanda. 25Si Hisus ngani ti ihinanda Diyus hampay ipakaun niya kay buhi ag hampay sa pagkabuhus niya dugu may kapatawadan ti manga tawu sa kanda manga kasalanan, nu sida magsarig sa kanya. Kay binwat Diyus tunda hampay ipakilala kay katadlungan. Dahil nu sa kaybi, pinakan-an niya rugar ti manga tawu, pinasinsiya niya kanda manga kasalanan. 26Dapat kainda, ihinandug yi Diyus kay buhi ni Kiristu hampay ipakakit siya matadlung. Dahil sa inda pag binwat Diyus, napatutuuhanan matadlung ngani siya una pag-itadlung niya ti manga magsarig kan Hisus.
27Hintay nangus kanta ipadayaw-dayaw? Unman duy may ipadayaw-dayaw kita. Hayga unman? Dahil lang aw nguna sa kanta nagtupad sa Kasuguan? Bukun ay, nu unman dahil sa kanta pagsarig sa kan Kiristu. 28Dahil naintindihan yi nita isip, ti tawu kinilala Diyus kuntay siya matadlung dahil sa kay sarig sa kan Kiristu, bukun dahil sa kay nagtupad sa Kasuguan. 29Ti Diyus lugud Diyus lang aw manga Hudiyu? Unman aw lugud siya Diyus diman manga balaw Hudiyu? Balaw unman, Diyus diman ngap siya manga balaw Hudiyu. 30Kabay usa-usa ti Diyus. Una ti manga Hudiyu una ti manga balaw Hudiyu, nu sida sumarig sa kan Kiristu, pagkilalan-un yi sida Diyus kuntay sida manga matadlung. 31Nu katida ibug aw sabihun udyi pagpahalgaan nimi ti Kasuguan? Bukun sa katida. Kanmi di ngap pagpahalgaan.
Copyright © 2023 by OMF International, Philippines