Ruma 15
15
Pakan-an Kasulungan ti Kaparihu, danga Kanyu Sadili
1Kita ti manga mabisug kailangan mag-antabay sa manga malumuy kanda pagsarig. Danga ti sadili kasulungan ti pag-intindiha. 2Bagkus ngap pakan-an nita kasulungan kanta patar-ari nu ikamayad niya, hampay bumisug kay pagsarig. 3Si Kiristu unman diman nagsadili kasulungan. Bagkus ngap angay sa isinurat sa Kasuratan magkun, “Sa kanda magpuya mana sa kanmu, aku ngap ti pinuyaan nida.”#15:3 Bantayi diman ti Kanta 69:9. 4Una hintay ti isinurat sa manga Kasuratan kaybi waya sa ikadunung nita. Nu pagbasahun nita ti manga katutuuhanan sa Banal Kasuratan, amat-amat lalu matiniisun kita ag rumig-un kanta naisipan bag-u siyun maan ginan ti pag-asa nita. 5Pagsa kanyu ti Diyus, imaw ti nagpakaun sa kanyu matiniisun hanggan marig-un pag naisipan hampay kay awatan kamu sa kanyu pagkarausa angay sa kay mustara ni Kiristu, 6hampay mirinsan kanyu magdayaw sa Diyus sa Ama nita Panginuun Hisu-Kiristu.
Ti Mayad pag Barita sa manga Balaw Hudiyu
7Nu kabitay kamu ungud tinanggap ni Kiristu, katunda diman waydi ti buwatun niyu sa kada usa hampay pagdayawun niyu ti Diyus. 8Pagkumnun niku sa kanyu, si Kiristu ti nagsirbi sa manga Hudiyu hampay kay ipakilala niya ti Diyus masarigan, magtupad sa kay manga itinaratu sa kanda ginurang, 9ag hampay ti manga balaw Hudiyu magdayaw waydi sa Diyus dahil sa kay pangaawa, angay sa isinurat sa Banal Kasuratan magkun,
“Nakan ngani pumasalamat aku sa kanmu sa atubangan manga balaw Hudiyu.
Kantahun niku ti kadayawan nimu ngaran.”#15:9 Bantayi diman sa 2 Sam. 22:50; Kanta 18:49.
10Sinabi waya magkun,
“Pagbaya duy kamu pag manga balaw Hudiyu,
minsan sa kay pinili Diyus pag nasyun.”#15:10 Bantayi diman ti Diyut. 32:43.
11Sinabi waya magkun,
“Dayawun niyu ti Panginuun, kamu pag manga balaw Hudiyu.
Ti tanan manga nasyun tawu pagdayaw sa kanya.”#15:11 Bantayi diman ti Kanta 117:1.
12Idinugang waya ni Isayas magkun,
“Rumas-ug ti usa ka linahi ni Isai,
ipinakaun siya Diyus hampay magpamahala sa manga balaw Hudiyu.
Siya ti sarigan nida.”#15:12 Bantayi diman ti Isa. 11:10.
13Diyus ti may pakaun pag-asa sa kanta imaw waydi ti pumakaun kabayaan sa kanyu, hanggan kahusayan sa kanyu magsarig agud lalu abunda kanyu pag-asa dahil sa kapangyarihan Ispiritu Banal.
Nu hayga Udyi Napigilan ni Pablu kay Sarabihun
14Manga patar-ari, lubus aku magpaniwala ud may kurang kanyu kaayadan, may kang-ud kanyu kaalaman ag madunung kamu magparaalalahanan sa usa kag sa usa. 15Madi katida, sa inda pag surat udyi napigilan niku kang sarabihun dahil may ipaalaala aku manga katutuuhanan sa kanyu. Binwat niku inda dahil sa kay pakaun Diyus sa kangku inda pag marinu pag katungkulan, 16hampay suruguun yi aku ni Kiristu Hisus tabug sa manga balaw Hudiyu. Pag-itudlu niku sa kanyu, sa manga balaw Hudiyu, ti Mayad pag Barita hampay maihandug niku kamu sa Diyus kay kaibgan, dahil kamu ipinasaman yi Ispiritu Banal. 17Nakan ngani dahil sa kang magpakiusa sa kan Kiristu Hisus, mahimu gid aku makapadayaw sa kang nabwat para sa Diyus. 18Dahil pinanghasan niku itinultul kay binwat lang ni Kiristu, ginamit niya aku hampay makabutung sa manga balaw Hudiyu tabug sa pagsunud sa Diyus dahil sa kang manga pagbagawun hanggan pagbuwatun, 19may mamaski waya pag manga makadululaw ag lilingutan pag manga tanda buwat kapangyarihan Ispiritu Banal. Nakan ngani sa tanan rugar ginan sa Hirusalim hanggan tugka Iliriku pag daga itinudlu yi niku ti tanan Mayad pag Barita tungkul sa kan Kiristu. 20Magtagatudlui yi gid aku sa Mayad pag Barita sa manga rugar udwaya nakadnug tungkul sa kan Kiristu, hampay balaw ga mag-agaw aku sa binudlayan iba manugtudlu. 21Angay sa isinurat sa Banal Kasuratan magkun,
“Makakit aban ti udwaya nakaalam tungkul sa kanya.
Makaintindi aban ti udwaya nakadnug tungkul sa kanya.”#15:21 Bantayi diman ti Isa. 52:15.
Kay Gayak ni Pablu Mansabang sa Banwa Ruma
22Ti makuri unman aku may katahanan, nakan pirmi magkaampara kang gayak asan tabug sa kanyu. 23Dapat taynguna namhan yi kang buruwatun sitay baliwa. Dugay yi gid kang ibug asan tag. 24Magtagasampaki gid aku sa kanyu kang atag sa Ispanya sa panab-anan mana niyu awat. Alam niku masulung gid aku sa kanta pagsampak una ngalay lang. 25Dapat kainda atag dapu aku sa Hirusalim hampay kang itibu ti awat manga patar-ari sa manga sakup sa Diyus ati. 26Dahil ibinuluntad nida isip manga patar-ari taga Masidunya hanggan Akaya hampay ipadara nida kanda ambag kuwarta para sa manga makuri pag patar-ari sa Hirusalim. 27Buluntadan yi gid kanda pakaun tunda. Nu sa ungud talaga kailangan gid waydi nida buwatun tunda. Dahil ti manga balaw Hudiyu nahurayan waydi sa kay papalad Diyus angay sa Ispiritu sa manga Hudiyu, nakan kailangan ihuray waydi manga balaw Hudiyu sa manga Hudiyu ti ipinapalad Diyus kahamtangan sa kanda. 28Pagkatapus tunda, nu miintirga yi niku tunda pag ambagan kuwarta tanan-tanan sa manga patar-ari sa Hirusalim, tuminir waya aku asan sa kanyu bag-u di aku tabug sa Ispanya. 29Alam niku nu umasan aku, may imaw abunda aku pag papalad ginan sa kan Kiristu para sa kanyu.
30Pagsabihun yi gid niku sa kanyu, manga patar-ari, alang-alang sa kanta pagsarig sa Panginuun Hisu-Kiristu ag sa pagmahal kay ipinakaun Ispiritu Banal, awati niyu aku sa ungud pag darangin sa Diyus. 31Idarangin niyu aku sa makaribri aku sa manga tawu unman magsarig ati sa Hudiya. Idarangin diman niyu kang dara awat tabug sa Hirusalim hampay pagbayaun manga sakup sa Diyus ati. 32Bag-u nu kagustuhan Diyus, rumas-ug aku asan sa kanyu hampay masulung kang naisipan nu makapahari asan sa kanyu. 33Pagsa kanyu tanan ti Diyus ti gimpuunan nita kahusayan. Amin.
Copyright © 2023 by OMF International, Philippines