Ruma 13
13
Kanta Karampatan Magpasakup sa manga Pinunu Nasyun
1Ti kada usa ka tawu kailangan pagpasakup sa manga pinunu gubirnu. Dahil unman may magpamahala nu unman ginan sa Diyus ag ti manga gubirnu ti magpamahala kainda imaw gid ti pinatukahan Diyus. 2Nakan ngani ti tawu nu maglaban sa gubirnu, kay ngap paglabanan ti pinili Diyus. Pihu padapatan parusa una sitapu tiglaban. 3Ti manga pinunu kailangan kadalaan manga tawu magbuwat daut. Dapat ti magbuwat mayad unman waydi kailangan magkadala sa kanda. Ibug aw nimu dayu madala sa manga gubirnu? Pagbuwat kawu sa mayad bag-u bayaun kawu nida. 4Dahil sida manga suruguun Diyus sa ikamayad nimu. Dapat ay madala kawu nu magbuwat daut, dahil sida tutuu gid may karampatan magparusa. Sida manga suruguun Diyus, hampay parusahan nida ti manga magbuwat daut. 5Nakan ngani kailangan kamu pagpasakup yi hampay maamanan niyu kay pangagalit Diyus ag hampay unman kamu may pag-alalahanun kasalanan sa kanyu tagipusuun.
6Tunda diman ti dahilan nu hayga kamu magbayad buhis. Dahil ti manga pinunu gubirnu manga suruguun ngani Diyus, magpamahala sa tunda pag manga buruwatun. 7Ipakaun niyu sa kada usa ti dapat sa kanya. Pagbayad buhis hanggan manga lisinsiya sa manughiyaput buhis. Paggalang sa may karampatan galangun, pahalgai niyu ti dapat pahalgaan.
Kanta Katungkulan sa Kaparihu Tawu
8Danga magpalya kamu sa kanyu kasunduan magbayad utang una sa kantapu. Danga paglimti kanyu pagmahal sa usa kag sa usa dahil ti pagmahal sa kaparihu tawu imaw ti makatupad sa Kasuguan Diyus. 9Ti manga sugu Diyus magkun, “Danga kawu mag-uragin, danga kawu maglibun tawu, danga kawu magtakaw, danga kawu maghirak,”#13:9 Bantayi diman ti Pag. 20:13-15; 20:17; Diyut. 5:17-19, 21. ag una hintay waya pag manga sugu parihu sa kainda. Tunda tanan-tanan namhan sa inda pag hampang magkun, “Mahala nimu kanmu kaparihu parihu sa kanmu sadili.”#13:9 Bantayi diman ti Lib. 19:18. 10Ti may pagmahal sa kay kaparihu balaw magbuwat daut una sa kantapu. Nakan ti pagmahal imaw yi gid ti kamhanan buu Kasuguan.
11Mayad nu pagbuwatun niyu inda tanan, dahil alam niyu nu hintay pag udas yi kainda. Udas yi hampay mimata yi kamu kainda ginan sa katurugan dahil arani yi ti udas nita lubus pag karibrihan, balaw yi ga kaati katpung ga kanta bag-u nagsarig sa Panginuun. 12Mag-agaw sirang yabi arani yi magkasirang. Pagpakarayu yi kita ginan sa tanan buwat daut, ialistu nita kanta sadili sa buwat kaayadan.#13:12 sa buwat kaayadan: sa litiral, ti panangga karayawan. 13Pag-ugali sa mayad dahil sa karayawan yi kita, danga pag-abalaha ti udas sa maglangu, sa magulu pag kasulungan, danga pagpasibut-i ti sadili daut kagustuhan pagkatawu, una sa kahalayan, una sa irisgan, una sa hirirakan. 14Ipasakup niyu kanyu sadili sa Panginuun Hisu-Kiristu hampay siya ti humari sa kanyu buhi ag danga pakan-an rugar ti sadili naisipan hampay dayu pasibut-an lang ti sadili kagustuhan.
Copyright © 2023 by OMF International, Philippines