Bilang 9
9
Ti Pista Pag-alaala sa Karibrihan
1Katpung un-an bulan sa ikadwa pag timpu, ginan sa ipinalwas ti manga Israilita sa Ihiptu, magkun ti Panginuun sa kan Muysis ati sa pangawakawaan Sinai, 2“Idaus manga Israilita ti Pista Pag-alaala sa Karibrihan sa nakatagka pag panahun, 3ginan sa mag-isalup init sa ika-14 pag sirang sa inda pag bulan. Kailangan sundun niyu ti tanan surundanun tungkul sa inda pag pista.”
4Nakan sinabihan ni Muysis ti manga Israilita kuntay idaus ti Pista Pag-alaala sa Karibrihan, 5ag sinunud ngani nida inda ati sa pangawakawaan Sinai pagka nisalup ti init sa ika-14 pag sirang sa un-an pag bulan. Tinupad inda tanan Israilita angay sa isinugu Panginuun sa kan Muysis.
6Dapat ti iba sa kanda unman nakapaminsan sa inda pag Pista, dahil sa tunda pag sirang mayagting sida, nakaigpil sa bangkay. Nakan sa tunda diman pag sirang, nag-ati sida sa kanda ni Muysis ag ni Aarun 7ag magkun sida, “Nauringan kami dahil nakaigpil sa bangkay, dapat hayga balaw kami pagpasnuan makapaminsan sa inda pag kapistahan hanggan sa pag-ayaw manga handug sa Panginuun minsan sa iba manga Israilita sa itinagka pag panahun?” 8Nagsagut si Muysis sa kanda, “Pag-alagad dapu kamu tugka sa maalaman niku nu hintay ti sabihun Panginuun sa kangku tungkul sa kanyu.”
9Magkun ti Panginuun sa kan Muysis, 10“Sabiha nimu sa manga Israilita una si unu sa kanda ngatay sa kanda manga lahi ti nauringan dahil sa pag-igpil sa bangkay ngatay dahil nakalakaw siya arayu, makapaminsan di siya sa Pista Pag-alaala sa Karibrihan. 11Idaus nida inda pagkalawuy usa ka bulan, sa ikadwa pag bulan sa ika-14 pag sirang sa mag-isalup init. Mangaun sida tinama taguban karanidu kaibahan tinapay unman may pamadaka hanggan mapait pag urupiun. 12Kailangan unman sida may sawadan karan-unun kinasuripan, ag balaw diman nida bariun ti manga but-ul karanidu. Nu idaus nida ti Pista Pag-alaala sa Karibrihan, kailangan sundun ti tanan manga surundanun tungkul sitay.
13“Dapat ti tawu unman nagdaus Pista Pag-alaala sa Karibrihan, una malumpiyu siya ag unman naglakaw sa arayu, tunda pag tawu danga yi pagkilalan-a nasakupan niyu, dahil unman siya nag-ayaw handug para sa Panginuun sa nakatagka pag panahun. Mangagwanta siya sa kay kasalanan.
14“Nu may manga day-uhan nangulian kaibahan niyu magkaibug magdaus Pista Pag-alaala sa Karibrihan, kailangan idaus niya inda angay sa tanan manga surundanun sitay. Usa lang ti manga surundanun para sa manga tinubu Israilita hanggan sa manga day-uhan.”
Ti Rurum sa Turda Taragbuan
(Pag. 40:34-38)
15Sa sirang ipinatindug ti Turda Tiripnan pag-ingarnan diman Turda Taragbuan, sinaput inda rurum. Ginan malambung tugka surip, inda pag rurum parihu sa rayaw apuy. 16Pirmi kainda ti magpangyari — ti rurum magsaput sa Turda Taragbuan nu sirang, ag nu yabi magrayaw parihu sa apuy. 17Nu mag-atag tungud yi ti rurum maglakaw yi maan ti manga Israilita, ag nu naan magpat-ung ti rurum, ati sida pag magkampu. 18Nakan maglakaw ag magkampu ti manga Israilita angay sa sugu Panginuun. Unman sida maglakaw habang magsaput ti rurum sa Turda. 19Una magkadugay ti rurum sa babaw Turda, mag-alagad lang sida sa sugu Panginuun balaw sida magginan. 20Nu kas-a, manga pira lang ka sirang ti rurum sa babaw Turda, nakan ti manga tawu pira lang waydi ka sirang siyun. Guminan sida angay sa sugu Panginuun. 21Nu kas-a waydi siyun di ti rurum sa buu yabi, sa surip magpaabwat inda, nakan maglakaw yi maan sida. Una yabi ngatay sirang basta magpaabwat ti rurum, maglakaw yi maan ti manga Israilita. 22Nu siyun di ti rurum sa babaw Turda una duwa ka sirang ngatay usa ka bulan una usa ka timpu, katunda diman kadugay siyun ti manga Israilita sa kanda kampu. 23Nakan magkampu ag maglakaw ti manga Israilita angay sa sugu Panginuun. Ag sinunud nida ti manga sugu Panginuun sa panab-anan ni Muysis.
Currently Selected:
Bilang 9: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
