Bilang 2
2
Ti Kaayusan Kampu manga Israilita
1Magkun ti Panginuun sa kan Muysis hanggan sa kan Aarun, 2“Kumampu ti kada linahi Israil sa sirung bandira nida lahi. Ti Turda Taragbuan ipauli sa karaw-an kampu. 3-8Ti manga lahi nida ni Huda, ni Isakar hanggan ni Sabulun kumampu sa butlakan, sa sirung bandira nida lahi. Inda ti manga ngaran nida manga takinan hanggan ti bilang nida manga sakupan:
| Lahi | Takinan | Bilang |
|---|---|---|
| Huda | Nashun kay anak ni Aminadab | 74,600 |
| Isakar | Natanyil kay anak ni Suwar | 54,400 |
| Sabulun | Ilyab kay anak ni Hilun | 57,400 |
9Ti bilang tanan gurupu pagpangunahan lahi ni Huda 186,400. Sida ti mag-una nu maglakaw ti manga Israilita.
10-15“Ti manga lahi nida ni Rubin, ni Simyun hanggan ni Gad kumampu sa kanaway, sa sirung bandira nida lahi. Inda ti manga ngaran nida manga takinan hanggan ti bilang nida manga sakupan:
| Lahi | Takinan | Bilang |
|---|---|---|
| Rubin | Ilisur kay anak ni Sidiyur | 46,500 |
| Simyun | Silumyil kay anak ni Surisaday | 59,300 |
| Gad | Iliyasap kay anak ni Diyuwil | 45,650 |
16Ti bilang tanan gurupu pagpangunahan lahi ni Rubin 151,450. Sida ti ikadwa pag gurupu nu maglakaw ti manga Israilita.
17“Magdasun sa kanda ti lahi ni Libi ti tagadara Turda Taragbuan. Ti tanan manga lahi maglakaw angay sa kanda kaayusan nu magkampu sida, kada lahi ati sa sirung bandira nida. 18-23Ti manga lahi nida ni Ipraim, ni Manasis hanggan ni Binhamin kumampu sa isalpan, sa sirung bandira nida lahi. Inda ti manga ngaran nida manga takinan hanggan ti bilang nida manga sakupan:
| Lahi | Takinan | Bilang |
|---|---|---|
| Ipraim | Ilisama kay anak ni Amihud | 40,500 |
| Manasis | Gamalyil kay anak ni Pidasur | 32,200 |
| Binhamin | Abidan kay anak ni Gidyuni | 35,400 |
24Ti bilang tanan gurupu pagpangunahan lahi ni Ipraim 108,100. Sida ti kasunud sa lahi ni Libi nu maglakaw ti manga Israilita.
25-30“Ti manga lahi nida ni Dan, ni Asir hanggan ni Niptali kumampu sa amihanan, sa sirung bandira nida lahi. Inda ti manga ngaran nida manga takinan hanggan ti bilang nida manga sakupan:
| Lahi | Takinan | Bilang |
|---|---|---|
| Dan | Ayisir kay anak ni Amisaday | 62,700 |
| Asir | Pagiyil kay anak ni Ukran | 41,500 |
| Niptali | Ahira kay anak ni Inan | 53,400 |
31Ti bilang tanan gurupu pagpangunahan lahi ni Dan 157,600. Sida ti pinaka-uryan pag gurupu nu maglakaw ti manga Israilita. Maglakaw sida sa sirung bandira nida.”
32Ti kabuuhan bilang manga Israilita nailista angay sa kanda lahi 603,550 tanan. 33Dapat unman kasali siyun ti manga lahi ni Libi, angay sa pag-isugu Panginuun sa kan Muysis.
34Nakan binwat manga Israilita ti tanan pag-isugu Panginuun sa kan Muysis. Ti kada lahi nagkampu ag naglakaw sa sirung bandira nida angay sa kanda lahi hanggan magtal-anakan.
Currently Selected:
Bilang 2: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines