Bilang 18
18
Ti Katungkulan manga Manug-asiwa hanggan manga Libita
1Magkun ti Panginuun sa kan Aarun, “Kawu hanggan kanmu manga anak lalaki hanggan kanmu katawuhan ginan sa lahi ni Libi ti may saragtun sa mabwat niyu pag kasalanan sa kanyu magsirbi sa Turda Taragbuan. Dapat kawu lang hanggan kanmu manga anak ti may saragtun sa kasalanan kanyu mabuwat may kalabutan sa kanyu pagkamanughandug. 2Nu mansirbi kawu hanggan kanmu manga anak sa Turda nu naan pag maulian ti Kaban Kasunduan, ipaawat niyu kanyu katawuhan ginan sa lahi ni Libi. 3Manarabahu sida angay sa kanmu patigayun, ag buwatun nida ti tanan nida buruwatun sa Turda, dapat balaw sida kailangan mag-igpil sa banal pag manga kagamitan sa Turda ngatay sa harandugan, dahil nu buwatun nida inda magkaramatay sida hanggan kamu. 4Mangawat sida sa kanmu, turupadun nida ti mag-asikasu sa Turda Taragbuan ag ti pagbuwat tanan buruwatun siyun. Dapat unman may makaawat sa kanyu nu ud ti lahi lang ni Libi.
5“Kawu lang hanggan kanmu manga anak ti may saragtun sa pag-asikasu sa Banal pag Sulud-sulud hanggan sa harandugan, hampay balaw magalit maan aku sa manga Israilita. 6Aku ti nagpili kanmu kaparihu Libita ginan sa manga Israilita hampay kaawat nimu. Nakatalaga sida sa kangku sa pagsirbi sa Turda Taragbuan. 7Dapat kawu lang hanggan kanmu manga anak ti makasirbi bilang manga manughandug. Kamu lang ti makabuwat manga buruwatun may kalabutan sa harandugan ag sa Pinakabanal pag Sulud-sulud. Pakaun niku sa kanyu ti pagkamanughandug niyu. Una si unu ti bumuwat inda balaw manughandug kailangan matyun.”
Ti Handug para sa manga Manug-asiwa ag manga Libita
8Bag-u magkun ti Panginuun sa kan Aarun, “Aku ti nagpili sa kanmu imaw ti manpamahala sa banal pag manga handug pag-ihandug manga Israilita sa kangku. Pag-ipakaun niku inda sa kanmu hanggan sa kanmu manga anak bilang kabahagi niyu hanggan aban. 9May imaw kamu kabahagi sa banal pag handug balaw pagsunugun, pag-ihandug manga tawu sa kangku bilang banal pag handug. Kaibahan sa inda pag manga handug ti handug pasalamat, handug sa paglumpiyu, ag handug bayad sa kasalanan. Inda kanmu huray hanggan nimu manga anak. 10Kan-a niyu inda sa banal pag rugar.#18:10 sa banal pag rugar: ngatay, banal pag handug. Kailangan manga lalaki lang ti mangaun inda ag kilalan-a niyu inda banal. 11Ti iba waya pag manga handug Israilita pag-ipaabwat sa harandugan para diman sa kanyu. Pag-ipakaun niku inda sa kanmu hanggan sa kanmu manga lahi bilang kanyu huray tugka aban. Makakaun inda una si unu sa kanmu magtal-anakan ti pagkilalan-un malumpiyu. 12Pag-ipakaun diman niku sa kanyu ti mayad pag manga kalakal pag-ihandug manga Israilita ginan sa kanda un-an ani: lana, irinmun ubas, ag uyas. 13Ungud, kanyu ti tanan kalakal kanda pag-ihandug sa kangku ginan sa un-an patubas nida daga. Mahimu kumaun inda una si unu sa kanmu magtal-anakan ti malumpiyu.
14“Ti tanan bagay sa Israil ihinandug buu#18:14 ihinandug buu sa kangku: Sa bagaw Hibriyu kay ibug sabihun manga bagay ihinandug sa Panginuun balaw yi mabawi ag sa manga manughandug yi tunda hanggan aban. Nu kas-a pag-ipadamhak inda. sa kangku kanyu yi. 15Ti tanan panganay lalaki, tawu man ngatay hayup, ihinandug sa kangku kanyu yi diman. Dapat kailangan ipalukat niyu ti panganay pag manga anak lalaki hanggan ti manga panganay pag manga hayup mayagting. 16Ipalukat niyu inda nu usa ka bulan yi kay idad, kailangan lukatun niyu inda sa halaga lima ka pulud pilak, angay sa buyat pilak sa timbangan paggamitun manga manughandug. 17Dapat danga niyu pagpalukatan ti panganay tudu baka, karanidu ngatay kambing dahil kangku inda. Iyawun niyu ag iwidwisik kay dugu sa harandugan bag-u sunugun kay taba, handug sa panab-anan apuy.#18:17 handug sa panab-anan apuy: Bantayi ti footnote sa 15:3. Kay hungaw inda pag handug makapasulung sa kangku. 18Kanyu kay taguban, katunda diman kay dubdub hanggan kay sikun pag lulud handug pag-ipaabwat. 19Pag-ipakaun niku sa kanyu ti tanan banal pag handug pag-ipaabwat manga Israilita sa kangku. Para inda sa kanmu hanggan sa kanmu lahi pag kabahagi hanggan aban. Inda pag kasunduan niku sa kanmu hanggan sa kanmu lahi balaw mauman hanggan aban.”#18:19 balaw mauman hanggan aban: sa Hibriyu, Unman inda may katugkaan pag kasunduan para sa kanmu hanggan sa kanmu manga lahi.
20Magkumun waya gid ti Panginuun sa kan Aarun, “Kamu pag manga manughandug unman may manahun daga sa Israil, dahil aku di ti mangayaw kanyu pangailangan.
21“Nu tungkul sa manga Libita, bayadan niku sida sa kanda magsirbi sa Turda. Iayaw niku sa kanda ti tanan ikasampulu pag-iayaw manga Israilita bilang huray nida. 22Taynguna ginan, unman may iba ka Israilita ti pumakarani sa Turda Taragbuan purya lang sa manga manughandug ag manga Libita, dahil nu pumakarani sida, may saragtun sida sa kanda kasalanan ag mamatay. 23Manga Libita ti may saragtun sa buruwatun sa Turda Taragbuan, ag may saragtun sida sa kanda mabwat salan laban siyun. Inda pag surundanun kailangan tupadun niyu tugka sa sunud pag manga sinulput tawu. Unman may manahun daga ti manga Libita sa Israil. 24Bagkus ngap, ipakaun niku sa kanda bilang huray nida ti ikasampulu pag ayaw manga Israilita bilang handug nida sa kangku. Tunda ngani kang pagsabihun sa manga Libita unman sida may manahun daga sa Israil.”
25Sinugu Panginuun si Muysis 26kuntay sabiha niya inda sa manga Libita: “Nu matanggap yi niyu ginan sa manga Israilita ti ikasampulu kang iayaw sa kanyu bilang huray niyu, kailangan pag ayaw diman kamu kanyu ikasampulu ginan sa tunda pag ikasampulu bilang handug sa kangku. 27Kilalan-un niku inda bilang kanyu handug ginan sa manga inani, ga naghandug kamu tirigu ginan sa giriukan ngatay pin-ga ubas ginan sa pirigsan. 28Sa panab-anan inda, makapakaun diman kamu handug sa kangku ginan sa tanan ikasampulu kanyu matanggap ginan sa manga Israilita. Ag kanyu ikapu imaw ti kangku pag huray. Ipakaun niyu sa kan Aarun, ti manughandug. 29Kailangan kangku pag huray ti pinakamayad ginan sa tanan ipakaun sa kanyu. 30Nu maihandug yi niyu inda, kilalan-un niku inda handug niyu ginan sa girik-an ngatay pirigsan ubas. 31Mahimu kan-un niyu hanggan niyu magtal-anakan kanyu huray una naan pag rugar, dahil tunda kanyu upa sa magsirbi sa Turda Taragbuan. 32Balaw kamu magkasala sa kanyu magkaun inda nu naihandug yi niyu ti pinakamayad pag huray sa Panginuun. Basta pihuun niyu balaw niyu mayagtingan ti banal pag manga handug manga Israilita sa panab-anan pagkaun kanyu huray balaw waya niyu niayaw kangku pag huray, hampay balaw kamu mamatay.”
Currently Selected:
Bilang 18: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
