Bilang 11
11
Nagriklamu ti manga Israilita sa kan Muysis
1Nagriklamu ti manga Israilita sa kan Muysis dahil sa kanda magkalakawan kakurian. Pagka nadnugan inda Panginuun, nangisug siya ag pinauranan niya sida apuy imaw ti nag-irub sa saruy pag kampu. 2Nakan nanhagad awat ti manga Israilita sa kan Muysis, ag nandarangin si Muysis sa Panginuun, bag-u napsa ti apuy. 3Nakan iningarnan tunda pag rugar Tabira,#11:3 Tabira: Kay ibug sabihun, mag-apuy. dahil inirub sida apuy Panginuun.
4May manga gurupu day-uhan nagkuyug sa manga Israilita maghanap kanda pagkaibgan kan-un pag karan-unun, nakan hanggan ti manga Israilita nagriklamu magkumun, “Nu may makaun lang mana kita taguban. 5Katpung ati di waya kita sa Ihiptu, may magkakaun kita manga pangayawan isda hanggan manga kunduy, katimun, lasuna ag manga bawang. 6Dapat atay, magpanlumuy yi kita; pasay wadi mana kanta pag kan-un.”
7Inda pag mana parihu sa manga butir dariit malagti. 8-9Pagpunpunun manga Israilita sa babaw daga kada surip ag paggalingun nida ngatay pagbaywun sa lusung. Bag-u paggatungun sa anglit ag pagbuwatun manipis pag tinapay. Kay lasa parihu sa tinapay tinama sa lana ulibu.
10Nadnugan ni Muysis ti riklamu kada magtal-anakan sa sabian nida manga turda. Nakan nangisug gid ti Panginuun sa kanda, ag dahil siyun naaburidu si Muysis. 11Nagpaingana siya sa Panginuun, “Hayga duy aku, kanmu suruguun, pinakan-an daka pag kakurian? Hintay duy lugud ti nabwat niku balaw nimu ikinabaya, ipinapas-an nimu sa kangku ti kakurian manga tawu? 12Kang aw lugud manga anak sida? Aku aw lugud kanda ama? Hayga pagsabihun nimu sa kangku alagai niku sida parihu sa usa ka manugpamataw magsabibi anak, ag darahun sida sa itinaratu nimu sa kanda manga ginurang pag daga? 13Naan duy aku pagmam-ul taguban para sa tunda pag manga tawu? Dahil parargu kanda magriklamu sa kangku kuntay pakan-i niku sida kanda makaun pag taguban. 14Balaw duy niku kaya sida tanan alagaan. Purus yi inda pag kakurian niku. 15Nu katunda lang waydi kanmu pagbuwatun sa kangku, matya yi lang nimu aku taynguna. Nu magbaya kawu sa kangku, danga nimu aku pagpabay-ani makurian.”
16Nakan magkun ti Panginuun sa kan Muysis, “Tipuna nimu ti 70 ka paggurangunun sa Israil, ti pagkilalan-un nimu takinan nida nasakupan, ag tabana nimu sa Turda Taragbuan, bag-u patinduga sida ati kaibahan nimu. 17Dumugsun aku ag manhampang sa kanmu siyun, bag-u ibahagi niku sa kanda kay iba ka Ispiritu ti ipinakaun niku sa kanmu hampay makaawat sida sa kanmu.
18“Bag-u sumabi kawu sa manga tawu lumpiyuha nida kanda sadili,#11:18 lumpiyuha nida kanda sadili: Kay ibug sabihun, buwatun nida ti buruwatun sa paglumpiyu. dahil aldaw may makaun yi sida taguban. Sabiha nimu inda sa kanda: ‘Nadnugan niku kanyu riklamu magkaibug kamu mangaun taguban. Pagsabihun niyu mas mayad waya kanyu kahamtangan sa Ihiptu. Nakan aldaw, pakan-an niku kamu taguban hampay makakaun kamu. 19Bukun lang usa ka sirang, ngatay duwa, ngatay lima, ngatay 10, ngatay 20 ka sirang kamu pag makakaun inda, 20nu unman usa ka bulan, tugka sa manawa kamu#11:20 manawa kamu: sa Hibriyu, manlinuwas inda sa kanyu manga irung. ag dayu yi kamu makakaun inda. Dahil binugyahan niyu aku kanyu manuggiya, ag nagriklamu kamu sa kangku kuntay balaw yi lang mana kamu nighit sa Ihiptu.’ ”
21Dapat magkun si Muysis, “600,000 tanan kang kaibahan tawu, ag taynguna magkun kawu pakan-an nimu sida kanda makaun pag taguban sa sulud usa ka bulan? 22Una waya iyawun nimi ti tanan manga karanidu hanggan manga baka, una sarapun waya nimi ti manga isda sa dagat, dayu duy inda kumang-ud sa kanda.” 23Magkun ti Panginuun sa kan Muysis, “May hangganan aw lugud kang kamaskihan? Makitan nimu taynguna nu mangyari kang pagsabihun ngatay unman.”
24Nakan linmakaw si Muysis ag sinabi sa manga tawu ti sinabi Panginuun. Tinipun niya ti 70 ka paggurangunun ag pinatindug sa sangput Turda. 25Bag-u nagdugsun ti Panginuun sa panab-anan rurum ag naghampang sa kan Muysis. Ipinakaun Panginuun sa 70 ka paggurangunun kay iba ka Ispiritu ni Muysis. Ag pagka natanggap nida inda, nagbagaw sida ga manga purupita, dapat udyi inda nangyari uman.
26Ti duwa sa 70 ka paggurangunun sida ni Ildad ni Midad, napatayak sida sa kampu, balaw nag-ati sa Turda. Dapat natanggap diman nida ti Ispiritu, nagbagaw diman sida parihu sa manga purupita. 27May usa ka kalay-awan lalaki#11:27 kalay-awan lalaki: Siguru si Huswi nagbagaw sa sunud pag talata. nalagiw atag kan Muysis ag nagsabi magbagaw si Ildad ag si Midad ati sa kampu. 28Si Huswi kay anak ni Nun, kay kaawat ni Muysis ginan sa anak di waya siya, nagkumun tag kan Muysis, “Paapasa sida.” 29Dapat nagsagut si Muysis, “Magkataranta aw lugud kawu nu hintay ti mangyari sa kang magpangulu? Nu sa kangku lang, gustu niku ti tanan nasakupan Panginuun pakan-an niya Ispiritu hampay makabagaw sida parihu sa manga purupita.” 30Bag-u binmalik si Muysis atag sa kampu hanggan ti manga paggurangunun sa Israil.
31Taynguna, nagpadara ti Panginuun durus nagdara manga pugu ginan sa dagat. Maglayang-layang sida sa sangput kampu, manga 2 ka luk-an siku kay abwat sa daga ag pira ka kilumitru kay nahamnaan. 32Nakan sa tunda pag sirang, nandarakup pugu ti manga tawu tugka sa yabi hanggan sa dasun waya pag sirang. Unman may nakabuul kurang sa 30 ka saku ag ipinauga nida sa sangput kampu. 33Dapat habang pagtaltaun di waya nida ti taguban ag udwaya natlun, nagalit gid ti Panginuun sa kanda, pinadarahan niya sida masyadu pag sarut. 34Nakan iningarnan Kibrut Hataaba#11:34 Kibrut Hataaba: Kay ibug sabihun sa Hibriyu, kalubngan manga daluk-daluk. tunda pag rugar dahil ati pag-ilinbung ti manga tawu daluk-daluk sa taguban. 35Siyun ginan, naglakaw ti manga Israilita atabug sa Hasirut ag ati pag kinmampu.
Currently Selected:
Bilang 11: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
