Markus 13

Tungkul sa Pagguba Balay Diyus sa Hirusalim

(Mat. 24:1-2; Lukas 21:5-6)

1Paraginanun yi si Hisus ginan sa Balay Diyus, may usa ka tuludluan niya ti nagsabi sa kanya, “Maisturu, pagbantay kawu sa Balay Diyus, pagkamangarinu pag manga batu, pagkaraayad kay nagbuwat.” 2Sinabi ni Hisus sa kanya, “Mag-akitan aw nimu ti daraka balay inda? Unman may masawad aban batu sa kay kaparihu babaw batu, tanan-tanan magkarapugdak yi lang.”

Manga Kakurian, manga Pag-unuunu Aban

(Mat. 24:3-14; Lukas 21:7-19)

3Ati si Hisus sa bantud Ulibu. Sa kay matukawan siyun sa kay dipay Balay Diyus, pagka unman may magdungug iba, nagpaingana sa kan Hisus sida ni Pidru, ni Santiyagu, ni Huwan ag ni Andiris. Magkun sida, 4“Pagtultul duy kawu sa kanmi nu kapira tunda pag mangyari aban. Hintay nguna kay tanda nu arani yi mangyari tunda tanan-tanan?”

5Bag-u nagsabi si Hisus sa kanda magkun, “Pag-aman kamu hampay kamu balaw patalangun una hintay pag tawu. 6Mayamu ti sumitay mag-apu kang ngaran magkun, ‘Aku ti Pinili Diyus Manugribri pag Hari’.#13:6 Aku ti Pinili Diyus Manugribri pag Hari: sa litiral, Aku ngani. Mayamu kanda patalangun. 7Madnugan aban niyu ti manga barita sa gira una sa arani una sa arayu. Danga kamu magkakulbaan. Pihu gid kailangan mangyari tunda. Dapat balaw waya tunda ti katapusan kalibutan. 8Dahil manlalabanan aban ti parihu nasyun, manlalabanan aban ti parihu kaharian. May linug aban sa tuhay-tuhay pag rugar. May lun-us aban. Dapat ti tanan tunda umpisa lang manga rumas-ug kakurian aban.

9“Pag-andam kamu. Dahil kamu ipasintinsiya aban sa Katipunan manga Pinunu. Kamu kanda hampakun sa manga simbahan manga Hudiyu. Ipaatubang kamu sa manga gubirnadur hanggan sa manga hari dahil sa kangku hampay kamu tumultul tungkul sa kangku sa kanda atubangan. 10Kailangan gid dapu itudlu ti Mayad pag Barita sa tanan nasyun bag-u di rumas-ug ti katapusan. 11Pagka kamu kanda yi dinakup hampay bistahun, danga kamu maaburidu nu hintay kanyu isagut. Sa siyun katpung pag udas sabiha niyu ti inudyuk sa kanyu. Balaw kamu ti bumagaw nu unman ti Ispiritu Banal. 12May tawu pumakampi sa kalaban bag-u itudlu kay patar-ari hampay matyun. Katunda diman ti buwatun ama sa kay anak. Labanan waydi manga anak kanda manga gurang, kanda diman waydi ipamatay. 13Kagalitan kamu tanan tawu dahil sa kanyu pakiusa sa kangku. Dapat tigpakarig-un hanggan tugka sa katapusan imaw ti maribri.”

Ti Lapastangan unman may Kaparihu

(Mat. 24:15-28; Lukas 21:20-24)

14Magkun si Hisus, “Makitan niyu aban ti lapastangan ud may pumarihu mag-apu sa rugar balaw dapat ulian niya (kailangan intindihun manga manugbasa). Nu mangyari tunda ti manga tawu sa Hudiya pagpalagiw yi tabug sa bantud. 15Ti sa luwas danga yi mag-isip mam-ul waya manga butang sa sulud balay. 16Ti sa tanman danga yi mag-isip muli waya mam-ul kulimpay. 17Kaawaawa gid ti manga magbuduy hanggan ti manga magpasusu sa anak ati katpung pag udas. 18Pagdarangin kamu hampay balaw mitama tunda sa tigraramig. 19Dahil ati katpung aban ti manga tawu makalakaw sa subra yi gid pag kakurian unman waya nalakawan manga tawu ginan waya sa kay pagkalalang Diyus sa kalibutan hanggan waya taynguna tugka ag dayi malakawan maan hanggan waya aban. 20Nu abi unman padag-udun Panginuun aban tunda pag udas kakurian, unman may tawu maribri. Dapat ay dahil ngani sa kay manga pinili, padag-udun Panginuun tunda pag udas kakurian.

21“Nu may magsabi sa kanyu magkun, ‘Inda yi ngani ti Pinili Diyus Manugribri pag Hari’, aw ngatay may magsabi, ‘Asan ngap siya’, danga kamu magpaniwala. 22Dahil may manga pumabalhinguun aban kuntay siya yi ngani ti Pinili Diyus Manugribri pag Hari ag may lumuwang manga pudilun pag purupita. Pumakakit sida manga makadululaw ag lilingutan pag tanda hampay nu mahimu lang patalangun nida hanggan ti manga pinili Diyus. 23Tandai gid niyu dahil udwaya nangyari tunda, ipinasandam yi niku daan sa kanyu.”

Sa kay Pagsitay Anak Tawu Aban

(Mat. 24:29-31; Lukas 21:25-28)

24Magkun si Hisus, “Dapat ati katpung aban nu nakalawuy yi tunda pag kakurian, dumulum ti init, dayi maninggit ti bulan, 25mangalagpak ti manga pamgasan ginan sa langit, ti manga bagay#13:25 ti manga bagay: sa litiral, manga kapangyarihan. matandug panungaan langit daga. 26Bag-u makitan nida ti Anak Tawu rumas-ug padara sa rurum may daka pag kapangyarihan hanggan kadayawan. 27Nu sumitay siya, suguun niya kay manga anghil hampay kanda tipunun ti manga pinili Diyus ginan sa upat ka puun durus, ginan sa bilug kalibutan.”

Pahalimbawa sa Puun Igus

(Mat. 24:32-35; Lukas 21:29-33)

28Magkun si Hisus, “Intindiha niyu kang pag-iadal tungkul sa puun igus. Pagka nanugbuk nanlabung kay manga sanga alam niyu arani yi ti abagat. 29Katunda diman waydi nu makitan niyu tunda pag manga mangyari, alam yi niyu udyi dugay ti kaudasan pagras-ug niya, arani yi gid. 30Ungud duy kang pagsabihun sa kanyu, dayu mamatay inda pag tinubu tawu hanggan sa ud matupad inda tanan-tanan kang sinabi. 31Madura di aban ti langit ag ti daga, dapat kang manga bagaw dayu pumalya.”

Unman may Tawu Umalam sa Kaudasan Pagras-ug Panginuun

(Mat. 24:36-44)

32Magkun si Hisus, “Dapat unman may tawu umalam nu kapira tunda pag mangyari aban una kay sirang una kay udas. Unman may makaalam una manga anghil sa langit, una paman ti Anak. Ti Ama lang ti makaalam tunda. 33Pag-aman kamu paglagi handa kamu dahil unman niyu alam nu kapira pag mangyari tunda. 34Parihu sa usa ka tawu linmakaw tag sa iba rugar. Pagka magkalakaw yi siya, ainintirga dapu niya kay ulian sa kay manga panawuhun ag sa kada usa kay buruwatun. Nagbilin waydi sa manug-alaga sabian magkun, ‘Pagpirmi kawu alistu.’ 35Paglagi handa kamu dahil unman niyu alam nu kapira pag rumas-ug ti may apu balay, nu ngatay malambung baliwa, nu ngatay karaw-an yabi, nu ngatay sa pagpamintu manuk, aw nu sa surip. 36Barang nu bigla rumas-ug siya, kamu maras-ugan maturugan. 37Ti kang pagsabihun sa kanyu, imaw diman kang pagsabihun sa tanan, kailangan kamu paglagi handa gid.”

Currently Selected:

Markus 13: HNN

Highlight

Copy

Compare