Matiyu 26

Ti Gayak laban sa kan Hisus

(Mk. 14:1-2; Lukas 22:1-2; Hu. 11:45-53)

1Pagka natapus nitudlu ni Hisus inda tanan, sinabi niya sa kay manga tuludluan magkun, 2“Alam yi niyu, duwa wadi ka sirang bag-u Kapistahan yi sa Pag-alaala sa Karibrihan. Ipahintulut yi ti Anak Tawu sa manga kalaban hampay ipaku siya sa kurus.”

3Ti manga pangulu manughandug hanggan ti manga paggurangunun manga Hudiyu nagtiripun ati katpung sa ulian ni Kaipas imaw ti pangulu manughandug. 4Ginayak nida ipadakup si Hisus sa daya bag-u kanda ipamatay. 5Dapat ay sinabi nida magkun, “Danga nita ipadakup katpung sa Kapistahan, barang magulu ti manga tawu.”

Binuhusan Pamanglu si Hisus

(Mk. 14:3-9; Hu. 12:1-8)

6Ati katpung si Hisus sa balay ni Simun sa baryu Bitanya. Tunda pag Simun kaybi may dilikadu pag sakit sa lukub.#26:6 dilikadu pag sakit sa lukub: Bantayi ti footnote sa 8:2. 7Kan Hisus katpung magkaun napakarani sa kanya ti usa ka babayi may dara alabasturu pag batu ti binwat sukadan punu mahalaga pag pamanglu bag-u kay ibinuhus kay pamanglu sa kay ulu ni Hisus. 8Pagka nakitan manga tuludluan tunda, nangisug sida magkun, “Hayga duy inuyang lang tunda pag pamanglu? 9Mayad waya abi nu ipinabili kis-ab daka paman kay bayad bag-u ipakaun sa manga pugri kay kabilyanan.”

10Alam di ni Hisus kanda pagsabihun nakan magkun siya, “Hayga duy kanyu pagpakialman ti babayi? Mayad inda kay binwat sa kangku. 11Pirmi di sa kanyu ti manga pugri, dapat aku aban udyi dugay kaibahan niyu. 12Binuhusan yi niya pamanglu kang bilug bilang ga alistu yi sa udas aban kanda maglubung sa kangku. 13Ungud duy kang pagsabihun sa kanyu, una naan pag itudlu ti Mayad pag Barita inda sa bilug kalibutan, hanggan ti binwat babayi inda matultul diman hampay maalaala siya.”

Nagkasundu si Hudas sa kay manga Kalaban ni Hisus

(Mk. 14:10-11; Lukas 22:3-6)

14Sa sampulu may duwa ka tuludluan ti usa kay ngaran si Hudas Iskariyuti. Nag-ati si Hudas sa manga pangulu manughandug 15magkun, “Hintay duy kanyu gustu ipakaun sa kangku nu awatan niku kamu agud madakup si Hisus?” Bag-u binilangan nida si Hudas tatlumpulu ka kuwarta pilak. 16Siyun ginan naghanap paraan si Hudas hampay itudlu niya si Hisus sa kalaban.

Sida ni Hisus Namwat Yapun bilang Pag-alaala sa Karibrihan

(Mk. 14:12-21; Lukas 22:7-14,21-23; Hu. 13:21-30)

17Rinmas-ug ti un-an pag sirang Kapistahan manga Tinapay unman may Pamadaka. Nagpakarani kay manga tuludluan sa kan Hisus namaingana magkun, “Naan duy kanmu gustu ialistu nimi kanmu yapun sa Pag-alaala sa Karibrihan?” 18Nagsagut siya, “Pag-ati kamu sa banwa hanapa niyu tunda pag tawu sabiha sa kanya, kainda kay pagsabihun Maisturu, ‘Arani yi kang udas. Aku hanggan kang manga tuludluan sa kanmu balay pag kumaun kanmi yapun para sa Pag-alaala sa Karibrihan.’ ” 19Tinupad manga tuludluan kay bilin ni Hisus. Ihinanda yi ngani nida ti yapun sa Pag-alaala sa Karibrihan.

20Ati katpung pag yabi nagpakarani si Hisus sa lamak kaibahan niya ti sampulu may duwa ka tuludluan. 21Sa kanda magkaun magkun si Hisus, “Ungud duy kang pagsabihun sa kanyu, ti usa sa kanyu pumakampi sa kalaban hampay aku kay itudlu.”

22Nanruku masyadu ti manga tuludluan, ti kada usa namaingana sa kanya magkun, “Aku aw nguna Panginuun?” 23Nagsagut si Hisus, “Ti kadungan niku sumawsaw sa taya imaw yi ti pumakampi sa kalaban hampay aku kay itudlu. 24Mamatay gid ti Anak Tawu angay sa isinurat sa Banal Kasuratan, dapat kaawaawa duy tunda pag tawu ti pumakampi sa kalaban agud kay itudlu aku, ti Anak Tawu. Mayad waya nu unman nianak siya pag tawu.” 25Pagka sinabi ni Hisus tunda, nagpaingana diman si Hudas, imaw ti magpakampi sa kalaban, magkun, “Maisturu, aku aw nguna?” Magkun si Hisus, “Kawu ti nagsabi tunda.”

Ti Banal pag Yapun

(Mk. 14:22-26; Lukas 22:15-20; 1 Kur. 11:23-25)

26Pagka sida magkaun yi, nagpunpun si Hisus tinapay ginan sa lamak. Pagka nakapasalamat siya sa Diyus, pinikapika niya ti tinapay bag-u kay ipinakaun sa kay manga tuludluan. Magkun siya, “Tanggapa niyu inda kan-a. Inda kang bilug.” 27Binitbit niya ti ungut, nagpasalamat siya sa Diyus bag-u itinunghul niya sa kanda, magkun siya, “Pag-inum kamu tanan inda. 28Dahil inda kang dugu itinalaghut Diyus sa taratu. Ibuhus kang dugu sa ikapatawad manga kasalanan mayamu tawu. 29Kang pagsabihun sa kanyu, dayi aku uminum inda pag intus ubas hanggan sa udwaya inmun niku ti bag-u intus ubas kasaru niku kamu sa kaharian niku Ama.” 30Pagka sida kinmanta kanda dayaw sa Diyus, nag-atag sida sa bantud Ulibu.

Ipinurupita ni Hisus kan Pidru Pagtanggi sa Kanya

(Mk. 14:27-31; Lukas 22:31-34; Hu. 13:36-38)

31Sinabi ni Hisus sa kanda magkun, “Taynguna pag yabi kamu tanan umalinlangan sa kangku parihu sa pagsabihun Diyus sa Banal Kasuratan magkun, ‘Matyun niku ti manug-alaga karanidu, bag-u mangalat ti manga karanidu.’#26:31 Bantayi diman ti Sak. 13:7. 32Dapat nu aku mabuhi uman, umuna aku sa kanyu atag sa Galiliya.” 33Sinmabi si Pidru magkun, “Una duy umalinlangan sida tanan sa kanmu, aku dayu gid umalinlangan sa kanmu.” 34Sinabi ni Hisus sa kanya, “Ungud duy kang pagsabihun sa kanmu, taynguna yi gid pag yabi udwaya tumarauk ti manuk, itanggi nimu aku katlu ginan.” 35Dapat sinabi gid ni Pidru sa kanya, “Una waya sa kamatayan damayan gid niku kawu, balaw gid niku kawu itanggi.” Katunda diman ti sinabi tanan manga tuludluan.

Magdarangin si Hisus sa Gitsimani

(Mk. 14:32-42; Lukas 22:39-46)

36Bag-u kay tinaban ni Hisus kay manga tuludluan atag sa usa ka rugar kay ngaran Gitsimani. Sinabi niya sa kanda, “Pagtukaw dapu kamu sitay. Mandarangin aku ati sa un-an.” 37Dapat tinaban niya si Pidru hanggan kay duwa ka anak ni Sibidiyu sida ni Huwan, ni Santiyagu. Bag-u nanruku siya ag naarimputu sa kay tagipusuun. 38Sinabi niya sa kanda, “Kang tagipusuun mas-ut yi sa karukuan, harus ga mamatay yi aku. Pag-alagad kamu sitay, abayi di niyu aku sa kang maimatahan.” 39Pagka napakarayu siya diit, napadapa siya nagdarangin magkun, “Amang, nu mahimu ipakarayu nimu ginan sa kangku inda pag ungut may kakurian. Dapat una katida, danga kangku pag kagustuhan ti masunud nu unman kanmu di gid ti kailangan masunud.”

40Nagbalik siya, naras-ugan niya turug kay tulu ka tuludluan. Sinabi niya sa kan Pidru, “Ungud aw gid unman makaabay kamu sa kang maimatahan una lang usa ka udas? 41Pagmaimatahan kamu, pagdarangin gid hampay kamu balaw madara sa tuksu. Ti naisipan mana alistu, dapat ay ti bilug malumuy.”

42Nagpakarayu maan siya nandarangin magkun, “Amang nu ud mab-ul inda pag ungut may kakurian nu unman kang inman, kailangan kanmu di pag kagustuhan ti masunud.” 43Nagbalik maan siya naras-ugan maan niya sida manga maturugan dahil tinalu yi sida puyat.

44Nakan kas-a waya kay tinayakan sida nandarangin siya maan pakatlu imaw diman kay sinabi. 45Bag-u nagbalik maan siya sa kay manga tuludluan magkun siya sa kanda, “Magkaturug aw waya kamu, magpahari aw waya? Inda yi ti udas. Taynguna itudlu ti Anak Tawu sa manga makasalanan ag ipabahala yi siya sa kanda. 46Pagbangun yi kamu, atag yi kita, inda yi ti tumudlu sa kangku atag sa manga makasalanan.”

Kay Nagdakup sa kan Hisus

(Mk. 14:43-50; Lukas 22:47-53; Hu. 18:3-12)

47Magbagaw di waya si Hisus, nagras-ug yi si Hudas, usa sa sampulu may duwa. May kaibahan siya mayamu tawu may dara manga baladaw, manga pamakul. Sinugu sida manga pangulu manughandug hanggan manga paggurangunun manga Hudiyu. 48Udwaya sida rinmas-ug ati, magkun si Hudas, ti pumakampi sa kalaban, sa kay manga kaibahan, “Inda kanta hugyatan, nu hintay sab kang arkan imaw yi ngap pag tawu. Dakpa yi niyu siya.” 49Nakan dinmulud si Hudas sa kan Hisus magkun, “Mayad pag yabi, Maisturu.” Bag-u kay inarkan. 50Sinabi ni Hisus sa kanya, “Duy, kainda yi buwata kanmu gayak.” Bag-u hiniyaptan manga tawu si Hisus, kanda yi dinakup. 51Ginmabut kay baladaw ti usa ka kaibahan ni Hisus, tinigbas niya ti panawuhun pangulu manughandug, napungus kay tuli. 52Bag-u sinabi ni Hisus sa kanya magkun, “Suulan yi duy kanmu baladaw. Ti manga tawu nu itigbas kay baladaw, tigbasun matyun waydi sida baladaw. 53Unman aw lugud nimu alam aku makahimu manhagad sa kang Ama bag-u susun padaran-an niya aku subra waya sa sampulu may duwa ka kagadhan anghil. 54Dapat nu abi katida, kabitay pag matupad ti sinabi sa Kasuratan kailangan mangyari gid inda.”

55Bag-u napasrangu siya atag sa manga tawu magkun, “Aku lugud tulisan aw, nakan nagsitay kamu may dara baladaw, manga pamakul hampay dakpun aku? Sirang-sirang diman waydi magtukaw aku sa Balay Diyus magtudlu, bati unman waydi niyu dinakup? 56Dapat nangyari inda tanan hampay matupad ti isinurat manga purupita.”

Bag-u naglinayas yi ti manga tuludluan, tinayakan yi lang usa-usa si Hisus.

Si Hisus sa Atubangan Katipunan manga Pinunu

(Mk. 14:53-65; Lukas 22:54-55,63-71; Hu. 18:12-24)

57Pagka dinakup nida si Hisus, kanda dinara siya tabug sa balay ni Kaipas, imaw ti pangulu manughandug. Nagtiripun ati ti manga manugtudlu Kasuguan hanggan ti manga paggurangunun manga Hudiyu. 58Dinmasun diman si Pidru dapat ay balaw napasuud. Pagka rinmas-ug si Pidru sa balay pangulu manughandug, napasirung siya sa sugkadan. Tinmukaw siya siyun kaibahan niya ti manga suruguun hampay makitan nu hintay ti mangyari. 59Ti manga pangulu manughandug hanggan ti buu Katipunan manga Pinunu naghanap manga kastigus pudilun laban sa kan Hisus hampay masintinsiyahan siya sa kamatayan. 60Dapat unman sida may mag-akitan, madi mayamu ti nag-atubang nagbagaw kapudilan laban sa kan Hisus. Sa katapusan may duwa ka tawu nag-atubang magkun, 61“Kay sabi inda pag tawu magkun, ‘Kaya niku gubaun ti Balay Diyus bag-u ipatindug maan sa sulud tulu ka sirang.’ ”

62Tinmindug ti pangulu manughandug, bag-u kay sinabi sa kan Hisus magkun, “Unman yi aw kawu may isagut sa inda pag dimanda nida laban sa kanmu?” 63Dapat unman nag-ingay si Hisus. Bag-u magkun ti pangulu manughandug sa kan Hisus, “Sa ngaran Diyus buhi, kang pag-ibilin sa kanmu, sabiha nimu sa kanmi, nu tutuu kawu ti Pinili Diyus Manugribri pag Hari, ti Anak Diyus.” 64Sinmagut si Hisus, “Tutuu yi ngap kanmu pagbagawun. Dapat kang pagsabihun sa kanyu, ‘Kainda ginan makitan niyu ti Anak Tawu matukawan baliwa sa kay sikun Diyus minsan sa karampatan Diyus makapangyarihan. Rumas-ug siya aban padara sa rurum ginan sa langit.’ ”

65Pagka nakadnug ti pangulu manughandug sa kay sinabi ni Hisus, ginisi niya kay sadili rutay magkun, “Inda lapastangan yi laban sa Diyus. Unman yi kailangan nita ti manga kastigus. Kamu yi ngani ti nakadnug taynguna kay lapastangan laban sa Diyus. 66Kabitay lugud kanyu magkilala?” Sinmagut sida, “Kailangan siya mamatay.”

67Bag-u binug-anan nida siya sa kay uyahun bag-u kanda sinuntuk. Sinampal waya siya manga iba magkun, 68“Kawu ti Pinili Diyus Manugribri pag Hari, pintua nimu nu si unu ti nagsampal sa kanmu.”

Tinanggi ni Pidru si Hisus

(Mk. 14:66-72; Lukas 22:56-62; Hu. 18:15-18,25-27)

69Pagka si Hisus siyun sa atubangan Katipunan manga Pinunu, si Pidru matukawan sa sugkadan. Napakarani sa kanya ti usa ka suruguun pag babayi magkun sa kanya, “Kaibahan diman waydi kawu ni Hisus taga Galiliya, unman aw?” 70Dapat ay nagtanggi si Pidru tunda sa mag-adnugan nida tanan. Magkun si Pidru, “Unman niku magkaalaman kanmu pagsabihun.” 71Inmati siya sa may sabian sugkadan. Nakitan siya tuhay maan pag babayi suruguun, sinabi niya siyun sa manga tawu, “Inda pag lalaki kaibahan diman ni Hisus taga Nasarit.” 72Tinmanggi di gid maan si Pidru uman magkun, “Matay waya, unman niku magkakilala tunda pag tawu.” 73Lagat lagat waya bag-u pinmakarani sa kan Pidru ti manga tawu siyun magkun, “Kaibahan gid ngap kawu nida. Magkakilala sa kanmu pamagaw.” 74Sinmagut si Pidru, “Una waya matyun aku, balaw gid ungud magkakilala niku tunda pag tawu.” Susun nanarauk yi ngani ti manuk. 75Bag-u naisipan ni Pidru kay sinabi ni Hisus magkun, “Udwaya tumarauk ti manuk, itanggi nimu aku katlu ginan.” Napalwas si Pidru ga magutsan sa lumi.

Currently Selected:

Matiyu 26: HNN

Highlight

Copy

Compare