Lukas 1
1
1Kagalang-galang Tiyupilu, mayamu tawu nanipag sa surat manga tultulanun tungkul sa tanan manga nangyari sa kanta karaw-an. 2Sinurat nida ga kanta diman nadnugan sa manga manugtudlu Bagaw Diyus, ag sa manga nakakit sa manga nangyari ginan sa kabag-u.
3Inadalan niku mayad sa kadugayun panahun ti tanan-tanan manga itinultul nida. Bag-u di magaan yi kang isip sumurat usa ka tultulanun malinaw para sa kanmu duy, 4hampay maalaman nimu ti katutuuhanan tungkul sa manga bagay itinudlu sa kanmu.
Kay Paalam Anghil tungkul sa kan Huwan Kapanganakan
5Sa kapanahunan hari si Hirudis sa Hudiya, may usa ka manughandug kay ngaran si Sakaryas sa gurupu ni Abyas. Kan Sakaryas inasawa si Ilisabit, lahi ni Aarun. 6Sida mag-asawa magkabuhi matadlung sa atubangan Diyus Panginuun. Pagsundun gid nida ti tanan niya manga sugu. 7Unman sida may anak dahil unman nagkaanak si Ilisabit, ag parihu yi gurangun.
8Pagka may katungkulan kay gurupu ni Sakaryas, nag-asikasu siya sa kay buruwatun sa atubangan Diyus. 9Angay sa ugali manga manughandug naglunggungan sida nakatama si Sakaryas. Siya yi ngani ti makasaka sa Balay Diyus Panginuun hampay magtuub kamangyan.
10Sa udas sa kan Sakaryas katpung magtuub kamangyan ati nagtiripun ag nagdarangin ti kadamlan tawu sa sugkadan Balay Diyus. 11Bag-u napakakit sa kan Sakaryas ti usa ka anghil Panginuun matindugan sa sikun baliwa harandugan turuuban kamangyan. 12Pagka nakitan ni Sakaryas ti anghil naaburidu nadala gid siya. 13Dapat sinabi anghil sa kanya, “Sakaryas, danga magkadala duy, dahil nadnugan Diyus kanmu darangin. Kanmu asawa si Ilisabit aban manganak gid duy anak lalaki, ag siya kanmu paingarnan Huwan.” 14Magkun waya ti anghil, “Kawu aban masulung gid lubus magbaya, ag mayamu pag tawu ti makabaya sa kay pagkalusad. 15Dahil may kamaskihan siya aban sa atubangan Panginuun. Danga uminum siya intus, una hintay pag manga makalangu pag irinmun. Ginan di waya sa sulud tiyan niya ina sa kanya yi ti Ispiritu Banal.” 16Magkun ti anghil, “Mayamu sa linahi Israil ti pabalikun niya tag sa Panginuun Diyus nida. 17Umuna siya sa Panginuun parihu ga kan Ilyas diman dahil sa kapangyarihan Ispiritu Banal. Pabalikun niya ti naisipan manga gurangun sa ikaayad nida manga anak. Tudluan niya ti manga makasalanan agud sida madunung magtupad sa kagustuhan Diyus. Ialistu niya para sa Panginuun usa ka nasyun handa yi.”
18Sinabi ni Sakaryas sa anghil magkun, “Kabitay gid pag maalaman niku inda ti mangyari, kami mag-asawa gurangun yi?” 19Nagsagut ti anghil, “Aku si Gabriyil manugsirbi sa atubangan Diyus. Sinugu aku hampay ipadakit sa kanmu ti mayad pag barita inda. 20Malu, taynguna ginan kawu buyun yi unman kawu makabagaw hanggan sa udwaya mamhan kang manga binagaw sa kanmu, dahil unman kawu naniwala sa kang manga binagaw, madi pihu matupad aban sa kay taning pag kaudasan.”
21Nag-alagad ti manga tawu sa kan Sakaryas, naglingut sida hayga dugay siya ati sa sulud Balay Diyus. 22Pagka siya nagluwas, unman yi siya makabagaw sa kanda. Nakan pinaamanan yi lang niya sida ag naintindihan nida may ipinakakit maaw ti Diyus sa kanya ati sa sulud Balay Diyus. Tunda ginan udyi siya makabagaw.
23Pagka lawuy kay udas niya panirbi, nuli yi si Sakaryas sa kay ulian. 24Pagka dugay magbuduy kay asawa si Ilisabit. Sa sulud lima ka bulan siya pirmi yi lang nagpatagu sa balay. Magkun siya, 25“Taynguna aku binaya Panginuun. Binwat niya inda hampay balaw yi pag-api-apihun aku manga tawu.”
Kay Paalam Anghil tungkul sa kan Hisus Kapanganakan
26Pagka unum yi ka bulan kay magbuduy ni Ilisabit, sinugu Diyus ti anghil Gabriyil atag sa Nasarit, usa ka banwa sa Galiliya. 27Sinugu si Gabriyil atag sa usa ka tugnaw pag daraga kay arasawan-un pag lalaki si Husi kay ngaran. Si Husi linahi ni Dabid. Kay ngaran pag daraga si Marya. 28Nagpakarani ti anghil sa kan Marya magkun, “Pagmasulung duy kawu, kawu ti pinili Diyus pag daraga. Sa kanmu gid ti Panginuun! Sa tanan babayi kawu ti pinapaladan.” 29Dapat masyadu naaburidu si Marya sa sinabi anghil sa kanya, pagpakaisip-isipun niya nu hintay nguna kay kahulugan tunda. 30Magkun ti anghil sa kanya, “Danga kawu magkadala duy, Marya. Dahil kinaawaan kawu Diyus. 31Malu, pagpatingi duy kawu, mamuduy kawu aban manganak lalaki, siya ingarnan nimu si Hisus. 32May kadayawan aban siya ag ingarnan aban siya Anak Diyus Makamaskihan sa Tanan. Pakan-an siya aban Panginuun Diyus karampatan maghari ga kay ginurang diman kan Dabid. 33Humari siya sa linahi ni Hakub hanggan aban. Ag unman may katapusan kay paghari.”
34Sinabi ni Marya sa anghil magkun, “Kabitay inda duy, aku unman nakaulid sa lalaki?” 35Sinmagut ti anghil magkun, “Pumakababa tag sa kanmu ti Ispiritu Banal, humamuy sa kanmu ti kapangyarihan Diyus Makamaskihan, nakan ti anak ianak aban pagsabihun banal, ti Anak Diyus. 36Malu, kanmu katawuhan si Ilisabit magbuduy diman anak lalaki, madi gurangun yi. Ag taynguna unum yi ka bulan siya, madi kaybi pagsabihun balaw manganak. 37Unman may dayu mabuwat ti Diyus.” 38Magkun si Marya, “Inda duy aku suruguun Panginuun, pagmangyari gid sa kangku angay sa kanmu binagaw.” Bag-u tinayakan yi siya anghil.
Si Marya Nansabang sa kan Ilisabit
39Pagka dugay linmakaw si Marya madali kay lakaw tag sa bantud, tag sa usa ka banwa sa daga Huda. 40Nagsaka siya sa kan Sakaryas balay, nag-alam sa kan Ilisabit. 41Pagka nadnugan ni Ilisabit kay magbagaw ni Marya, namurag ti lapsag sa kan Ilisabit tiyan. Ag lubus sinuldan Ispiritu Banal si Ilisabit. 42Ainalsa niya kay bagaw magkun, “Kawu yi duy, Marya, ti pinapaladan Diyus sa tanan babayi, hanggan ti lapsag sa kanmu tiyan pinapaladan Diyus. 43Salamat duy, nagsitay maaw kawu, ti ina niku Panginuun. 44Dahil malu, pagka nadnugan niku kis-ab kanmu magbagaw, binmaya namurag ti lapsag sa kang tiyan. 45Pinapaladan kawu ti magsarig matupad manga binagaw sa kanya ginan sa Panginuun.”
Si Marya Magdayaw sa Panginuun
46Kay sinabi ni Marya,
“Pagdayawun niku ti Panginuun sa kang tagipusuun.
47Nakabaya kang tagipusuun sa Diyus, sa kang Manugribri.
48Dahil pag-isipun di ngap maaw niya aku, madi ababa kang kahamtangan pag suruguun niya.
Dahil malu, taynguna ginan ti tanan pag manga sinulput tawu aban sumabi magkun, mapalad aku.
49Dahil ti Diyus makapangyarihan may binwat daka pag manga bagay sa kangku.
Banal kay ngaran!
50Kay pagkaawaan ti manga maggalang sa kanya,
hanggan waya may sinulput.
51Ipinakakit niya kay kabisugan ag kamaskihan.
Kinalat-kalat niya ti manga palabi-labihun.
52Kay binahasan katungkulan ti manga hari,
Ag itinaas ti manga unman may kangaranan.
53Binsug niya ti manga magkalun-us sa manga mayad pag kabagayan.
Tinulak niya ti manga mayaman, unman pinakan-an una lang hintay.
54-55Inawatan niya kay manga suruguun, ti manga taga Israil.
Unman nalimtan niya kay taratu sa kanta manga ginurang — sa kan Abraham hanggan sa kay manga linahi —
kuntay kaawaan niya sida hanggan waya aban.”
56Nagdugay tulu ka bulan si Marya ati sa kan Ilisabit bag-u nuli yi siya.
Sa kay Kapanganakan ni Huwan Manugtulbaw
57Pagka udas yi, si Ilisabit nanganak usa ka lalaki. 58Pagka naalaman niya manga kamalay hanggan niya manga katawuhan kuntay pinapaladan gid Panginuun si Ilisabit nakabaya sida sa kanya. 59Pagka walu ka sirang yi kay nianak, nagrinas-ug kay manga kamalay hanggan kay manga katawuhan hampay turiun ti lapsag. Kanda mana ingarnan si Sakaryas parihu sa kay ngaran niya ama. 60Dapat sinabi niya ina, “Danga imaw nu unman kanta ingarnan siya si Huwan.” 61Magkun sida, “Hayga? Unman may katawuhan kawu si Huwan kay ngaran.” 62Pinaamanan nida ti ama lapsag nu hintay kay gustu ipaingaran sa lapsag. 63Hinmagad si Sakaryas sururatan, bag-u sinmurat siya, “Kay ngaran si Huwan.” Sida tanan linmingut gid. 64Kadaka ngap nang-at kay bibig ni Sakaryas. Binmagaw siya ag dinayaw niya ti Diyus. 65Sinindakan dala ti tanan tawu mag-uli sa kanda kalibut. Ti barita tungkul tanan manga nangyari sa kanda ni Sakaryas ikinalat sa tanan bantud daga Hudiya. 66Ti tanan manga nakadnug tunda ihinamnu nida sa kanda tagipusuun ti manga barita magkun, “Hintay nguna aban pag kalasi tawu inda pag anak?” Dahil siya sakup sa kapangyarihan Panginuun.
Magpurupita si Sakaryas
67Si Sakaryas kay ama ni Huwan lubus sinuldan Ispiritu Banal, bag-u nagpurupita siya magkun,
68“Dayawun nita ti Panginuun ti Diyus Israil,
dahil kay inawatan ag linkat niya kay nasyun.
69Sinugu niya ti makamaskihan pag Manugribri sa kanta
ginan sa linahi niya suruguun ni Hari Dabid.
70Kaybi di waya inudyukan Diyus ti manga purupita napasakup sa kanya,
bag-u ipinadakit diman nida kay taratu Diyus,
71iribri niya kita sa kanta manga kalaban
hanggan sa kamang manga magkagalit sa kanta.
72Ag hampay ipakilala niya kay pangaawa sa kanta manga ginurang,
ag alalahanun niya kay banal pag taratu.
73Mahigpit gid kay taratu kay isinumpa sa kanta ginurang sa kan Abraham.
74Kita kay iribri sa kamang nita manga kalaban,
agud masirbihan nita siya unman may kadalaan.
75Ipinasaman niya kita ginan sa kalibutan hampay banal ag matadlung sa kay magbantay,
hanggan waya kita magkabuhi.
76Kawu duy anak, ingarnan kawu purupita Diyus Makamaskihan sa Tanan.
Sapagka kawu ti un-an umuna bag-u ti Panginuun dumasun sa kanmu.
Kawu nakan ti humanda dalan Panginuun.
77Ipaalam nimu ti karibrihan Panginuun sa kay nasyun,
sa panab-anan pagpatawad nida kanda manga kasalanan.
78Sa mahal pangaawa Diyus nita, ipadara niya sa kanta ti Manugribri, parihu sa pagsinggit init.
79Marayawan ti manga tawu nangulian sa kadudulman ag hinarian kamatayan.
Ilakaw kanta raprapa sa dalan kahusayan sa Diyus hanggan sa kanta kaparihu.”
80Dinmaka ti anak, ag nagbisug kay tagipusuun. Sa pangawakawaan manga tawu kay ulian hanggan sa udwaya napakakit siya magtudlu sa manga taga Israil.
Currently Selected:
Lukas 1: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
