Libitiku 27
27
Ti Paglukat sa Isinagda pag manga Butang sa Panginuun
1Sinugu Panginuun si Muysis 2hampay sabihun inda sa manga Israilita:
Nu ti usa ka tawu ihinandug sa Panginuun bilang pagtupad sa usa ka taratu, inda pag tawu mahimu di malukat sa siti ginan pag taratu 3-7nu bayadan pilak kay halaga angay sa buyat kiluhan manga manughandug:
sa idad 1 ka bulan tugka 4 ka timpu
lalaki: 5 ka bilug pilak
babayi: 3 ka bilug pilak
sa may idad 5 ka timpu tugka 19
lalaki: 20 ka bilug pilak
babayi: 10 ka bilug pilak
sa may idad 20 ka timpu tugka 59
lalaki: 50 ka bilug pilak
babayi: 30 ka bilug pilak
sa may idad 60 ka timpu mahigit
lalaki: 15 ka bilug pilak
babayi: 10 ka bilug pilak.
8Nu pugri ti nanaratu bag-u unman siya makakaya sa sinabi pag halaga, daran-un niya tabug sa manughandug ti tawu itinaratu niya ihinandug tag sa Panginuun, bag-u ti manughandug imaw ti pumakaun halaga angay sa makaya ibayad tawu.
9Nu kay itinaratu hayup mahimu ihandug sa Panginuun, inda pag hayup atabug yi sa Panginuun. 10Kailangan balaw niya inda balyuhan usa waya ka hayup, una waya mas marinu kay ibalyu. Nu buwatun niya tunda, ti hayup kay itinaratu hanggan ti hayup kay ibinalyu parihu atabug yi sa Panginuun. 11Nu kay itinaratu mauring pag hayup, balaw mahimu pamakaun sa Panginuun, daran-un niya ti hayup tabug sa manughandug. 12Bantayan inda manughandug nu mayad ngatay unman, bag-u rargu pakan-an niya inda halaga#27:12 pakan-an niya inda halaga: hampay ipabili inda bag-u kay kuwarta gamitun sa Balay Diyus ngatay sa Turda Tiripnan. balaw yi mahimu ilisan. 13Nu bawiun may apu ti hayup, kailangan bayadan niya ti halaga hayup ag dugangan waya gid niya 20 ka pursintu sa kay bayad siti.
14Nu itinalaga tawu kay balay sa Panginuun, bantayan manughandug tunda pag balay nu ngatay mayad waya tunda aw ngatay udyi, bag-u rargu pakan-an niya tunda kay halaga udyi mahimu ilisan. 15Nu bawiun may apu kay balay, kailangan bayadan niya ti halaga balay ag dugangan waya niya 20 ka pursintu sa kay bayad siyun. Bag-u ti balay iuli sa kanya.
16Nu ihinandug tawu sa Panginuun ti kabaliw niya daga kay minana sa kay ginurang, pakan-an inda manughandug halaga angay sa kayamuun binhi kang-ud mipamgas sa tunda pag daga: sa kada saku binhi, ti halaga daga 20 ka bilug pilak. 17Nu ihandug niya kay tanman pagkatapus lang gid ti Timpu Pagpalpas ag Pagbalik, kay halaga tida imaw lang diman. 18Dapat nu sa uryan waya tabug niya inda pag ihandug, pakan-an inda manughandug halaga mas ababa, angay sa kay kayamu manga timpu magkasawad tugka sa sunud maan pag Timpu Pagpalpas ag Pagbalik. 19Nu bawiun may apu kay tanman, kailangan bayadan niya ti halaga tanman bag-u dugangan waya gid niya 20 ka pursintu sa kay halaga siti. Bag-u di ibalik sa kanya kay tanman. 20Dapat nu ipinabili niya kay tanman bukun waya niya nalukat, udyi gid niya tunda mabawi waya. 21Ag sa pagras-ug Timpu Pagpalpas ag Pagbalik, para yi tunda sa Panginuun ag udyi gid malukat; tunda sa magkaapu yi manga manughandug.
22Nu ihinandug usa ka tawu kay binili tanman, 23pakan-an inda manughandug halaga angay sa kayamuun manga timpu magkasawad tugka sa Timpu Pagpalpas ag Pagbalik. Kailangan lukatun tunda kadali tawu. Ti halaga ilinukat niya para yi sa Panginuun. 24Sa Timpu Pagpalpas ag Pagbalik tida pag tanman iuli sa kay may apu namabili.
25Ti tanan halaga sa tunda pag manga ihinandug sa Panginuun kailangan angay sa buyat pilak sa kiluhan manga manughandug.
26Ti panganay pag hayup sa Panginuun yi, nakan unman yi kailangan ihandug inda sa kanya. 27Nu inda pag hayup mauring, mahimu inda lukatun may apu. Bayadan niya ti halaga hayup bag-u dugangan waya gid niya 20 ka pursintu sa kay bayad siti. Dapat nu dayu niya lukatun, ipabili inda manga manughandug angay sa kay halaga tunda.
28Unman may una hintay pag bagay ti ihinandug yi lubus#27:28 ihinandug yi lubus: Sa Hibriyu kay ibug sabihun manga bagay ihinandug yi sa Panginuun udyi gid mabawi ag maapu yi inda manga manughandug hanggan aban. sa Panginuun ti mahimu ipabili ngatay lukatun, una tawu man inda aw ngatay hayup una daga minana. Kanya yi gid inda sa Panginuun. 29Ti tawu ipinakaun yi lubus sa Panginuun#27:29 Bantayi ti footnote sa talata 28. balaw yi mahimu lukatun. Kailangan matyun gid siya.
30Ti ikasampulu pag bahagi tanan ani sa Panginuun di. 31Nu lukatun manga tawu ti ikasampulu niya tubas, kailangan bayadan niya kay halaga tunda bag-u dugangan waya gid niya 20 ka pursintu kay halaga. 32Nu magbilang kamu kanyu manga baka, karanidu, ngatay kambing, ti usa sa sampulu siti ipakaun niyu sa Panginuun. 33Ag kailangan danga niyu inda pagpilia una pagbalyuha. Nu balyuhan niyu inda, tunda pag hayup hanggan ti hayup ibinalyu parihu yi bumaliw kanya tag sa Panginuun udyi mahimu lukatun.
34Imaw tida kay manga sugu ipinakaun Panginuun tag sa kan Muysis ati sa Bantud Sinai para sa manga Israilita.
Currently Selected:
Libitiku 27: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
