Libitiku 25
25
Ti Timpu Pamahari
1Katpung si Muysis ati sa Bantud Sinai, sinugu siya Panginuun 2hampay sabihun inda sa manga Israilita:
Nu rumas-ug yi kamu sa daga ipakaun niku sa kanyu, danga niyu pagtanumi ti daga kada ikapitu pag timpu hampay madayaw niyu aku. 3-4Sa sulud unum ka timpu makatanum kamu ag makaani, dapat sa ikapitu pag timpu kailangan paharya niyu ti daga. Danga niyu pagtanumi kanyu manga tanman ag danga diman niyu pagpuldi manga sanga kanyu tanum manga ubas. 5Ag danga diman niyu pag-aniha ti manga uhay aw ngatay ipabili ti manga burak manga tanum nagtubu lang. 6Dapat mahimu di kamu makab-ul siyun ginan tugka lang sa kan-un niyu hanggan niyu manga suruguun ag manga manugtarabahu, hanggan manga day-uhan mag-uli kaibahan niyu, 7kaibahan diman kanyu manga hayup, hanggan ti manga talun manga hayup sa kanyu daga.
Ti Timpu Pagpalpas ag Pagbalik
8-9Sa kada 49 ka timpu,#25:8-9 Sa kada 49 ka timpu: sa Hibriyu, pitu ka timpu ti ipinahari, pitu ka pitu ka timpu. sa ikasampulu pag sirang sa ika pitu pag bulan imaw ti Sirang Paglukat, patunugun niyu ti manga budyung sa buu rugar. Sa tunda pag timpu, sa ikasampulu pag sirang sa ikapitu pag bulan imaw ti Sirang Paglukat, patnuga niyu ti manga budyung sa buu rugar. 10Ibilang niyu ti ika-50 pag timpu bilang mahalaga pag timpu, dahil panahun inda pagpalpas manga suruguun hampay makabalik yi sida sa kanda magtal-anakan hanggan pag-uli sa may apu kanda manga daga ipinabili. 11-12Sa tunda pag Timpu Pagpalpas ag Pagbalik, danga kamu magtanum, ag danga diman kamu mag-ani una magbugtas manga burak tanum nagtubu lang, dapat mahimu kamu makabuul tugka lang kan-un. Banal inda pag timpu para sa kanyu.
13Sa tunda pag timpu, ti kada usa sa kanyu, ti tanan ipinabili sa kanyu pag kasiyunan ulian niyu sa kay apu. 14Nakan nu mamabili kamu aw ngatay mamili daga sa kanyu kasimanwa, danga kamu magdarayaan. 15Kailangan ti bayad sa daga angay sa kay kayamu manga timpu makapatubas bag-u rumas-ug ti sunud pag Timpu Pagpalpas ag Pagbalik. 16Nu mayamu waya timpu bag-u rumas-ug ti Timpu Pagpalpas ag Pagbalik, dugangi niyu ti halaga daga, dapat nu arani yi, bawasi niyu. Dahil kay tutuu, ti pagbilihun balaw kay daga mismu nu unman ti kayamuun patubas ginan sa tunda pag daga. 17Danga kamu magdarayaan bagkus kadalai niyu aku, dahil aku ti Panginuun kanyu Diyus. 18-19Sunda gid niyu kang manga surundanun hanggan manga sugu hampay mabuhi kamu may kahusayan sa daga kanyu ulian ag dayu kamu maduraan karan-unun dahil sa abunda pag manga patubas sa daga. 20Danga kamu magkaaburidu nu hintay kanyu kan-un sa ikapitu pag timpu nu unman kamu makatanum una makaani. 21Dahil papaladan niku kanyu daga sa ikan-um pag timpu hampay makatubas inda mayamu pag karan-unun kang-ud sa tulu ka timpu. 22Nakan sa kada magtanum kamu sa ikawalu pag timpu, kanyu pag kan-un imaw waya kanyu inani katpung ikan-um pag timpu, ag mayamu di kanyu karan-unun tugka sa tig-arani sa ikasiyam pag timpu.
23Balaw mahimu ipabili ti daga sa balaw yi matubus niyu, dahil kangku tunda pag daga; pagpatahanan ag pagpatanmanan lang niku tunda sa kanyu. 24Nakan pasnui di niyu matubus niya apu kay ipinabili pag daga sa kanyu. Buwatun niyu inda sa tanan niyu binili pag daga.
25Nu nagkuri ti kaparihu niyu Israilita, bag-u dahil siti ipinabili niya kay daga, kay pinakaarani pag katawuhan imaw ti lumukat kay ipinabili. 26Dapat nu unman siya may katawuhan hampay lumukat siti para sa kanya, mahimu di maan niya inda malukat nu may kang-ud yi siya panlukat siyun. 27Nu mangyari tunda bayadan niya ti nakabili kay daga sa halaga angay sa mapatubas daga tugka sa pagras-ug Timpu Pagpalpas ag Pagbalik, bag-u mahimu yi niya mabawi kay daga. 28Dapat nu kurang waya kay panlukat, asan lang dap inda sa nakabili tugka sa pagras-ug Timpu Pagpalpas ag Pagbalik. Sa tunda pag timpu, mabawi yi niya kay daga unman may bayad.
29Nu ti usa ka tawu mamabili kay balay ati sa inaladan batu pag banwa, mahimu di niya malukat tunda sa sulud usa ka timpu ginan sa panahun niya nagpabili. 30Dapat nu unman niya inda malukat sa sulud usa ka timpu, tunda pag balay maapu yi ngap nakabili hanggan niya manga katawuhan hanggan aban. Balaw yi inda malukat may apu sa Timpu Pagpalpas ag Pagbalik. 31Dapat ti manga balay sa manga baryu unman may alad batu pag ibilang parihu sa manga tanman, mahimu malukat ag mabawi sa Timpu Pagpalpas ag Pagbalik.
32Kay manga lahi ni Libi mahimu makalukat una kapira kanda manga balay ati sa manga banwa kanda magkaapu. 33Nu unman nida inda malukat, iuli inda sa kanda sa Timpu Pagpalpas ag Pagbalik. Dahil ti manga balay ati sa kanda manga banwa kanda tunda pag kabahagi ginan sa kaparihu nida manga Israilita. 34Ti manga paraharaban ati sa kanda arani manga banwa kailangan gid balaw ipabili, dahil kanda sadili yi inda hanggan aban.
35Nu nagkuri ti kaparihu niyu Israilita bag-u udyi siya makakaya buhiun kay sadili, awati niyu siya parihu sa pag-awat niyu sa manga balaw Israilita nagpirmaminti nangulian minsan sa kanyu aw ngatay nanday-u lang, hampay makaparargu siya mangulian minsan sa kanyu. 36-37Paudami niyu siya kuwarta balaw may tubu, ag pabilihi niyu siya karan-unun unman may patubu, hampay makaparargu siya mangulian minsan sa kanyu. Buwata niyu inda agud ipakakit kanyu magkadala sa kangku sa kanyu Diyus. 38Aku ti Panginuun kanyu Diyus ti nagpalwas sa kanyu ginan sa Ihiptu hampay ipakaun niku sa kanyu ti daga Kanaan ag hampay bumaliw Diyus niyu aku.
39Nu nagkuri ti kaparihu niyu Israilita, ag dahil siti ipinabili niya kay sadili sa kanyu bilang suruguun, danga niyu siya pagpatarabahuan parihu sa usa ka hamak lang pag suruguun. 40Kilalan-un niyu siya ga usa ka sinuhulan pag manugtarabahu aw ngatay usa ka manugsabang nangulian lang sa kanyu. Manarabahu siya sa kanyu tugka lang sa Timpu Pagpalpas ag Pagbalik. 41Sa tunda pag timpu, nalukat yi siya hanggan kay manga anak, bag-u makabalik yi sida sa kanda manga katawuhan ag kanda yi maan ti manga kasiyunan nida manga ginurang. 42Manga suruguun niku kamu, kamu pag manga Israilita ti ipinalwas niku ginan sa Ihiptu. Nakan unman kailangan ipabili niyu kanyu sadili bilang suruguun. 43Danga niyu paghigpiti ti kaparihu niyu manga Israilita kanyu suruguun. Buwata niyu inda agud ipakakit kanyu magkadala sa kangku sa kanyu Diyus.
44Nu gustu niyu may manga suruguun kamu, pagbili kamu sa kanyu kalibut pag manga nasyun. 45Mahimu diman niyu bilihun ti manga day-uhan mag-uli kaibahan niyu una ti manga kaibahan nida magtal-anakan nu nagdaka sa kanyu rugar. Ti manga suruguun nabili niyu sa kanda bumaliw sadili yi niyu, 46ag mahimu niyu sida ipamana sa kanyu manga anak agud sumirbi sa kanda habang buhi sida. Dapat danga gid niyu paghigpiti ti kaparihu niyu manga Israilita kanyu suruguun.
47Nu ti usa ka pugri pag Israilita nagpabili kay sadili bilang suruguun tag sa usa ka mayaman day-uhan lang mag-ulian kaibahan niyu ngatay sa kay katawuhan, 48tunda pag Israilita mahimu waya malukat. Mahimu siya malukat niya patar-ari, 49ngatay niya bapa, ngatay pinsan, ngatay una si unu sa suud niya pag manga katawuhan. Mahimu diman una siya yi ngap ti lumukat sa kay sadili nu may kang-ud yi siya. 50-52Kay buwatun sumadahun niya kaibahan ti nagbili sa kanya nu pira ka timpu kay pagsirbi ag nu pira ti masawad siti nu bayadan siya parihu sa pagbuwatun sa usa ka sinuhulan pag manugtarabahu. Ti masawad pag halaga ibuhin niya sa halaga ibinayad sa kanya katpung waya sa pagbili sa kanya bilang usa ka suruguun. (Tunda pag halaga pag ipatumbas sa kayamuun timpu ginan sa pagbili sa kanya tugka sa Timpu Pagpalpas ag Pagbalik.) Ag nu pira ti masawad imaw ti ibayad niya para malukat siya. 53Kailangan gid kilalan-un siya nagbili sa kanya bilang ga usa ka sinuhulan pag manugtarabahu ag danga niya siya paghigpiti. 54Nu unman siya malukat sa tunda pag manga paraan, mapalpasan di maan siya hanggan kay manga anak sa Timpu Pagpalpas ag Pagbalik. 55Nakan danga kamu magpasakup bilang suruguun sa kanyu kaparihu una kapira, dahil manga suruguun niku kamu, kamu pag manga ipinaluwas niku ginan sa Ihiptu. Aku ti Panginuun kanyu Diyus.
Currently Selected:
Libitiku 25: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
