Husyas 2
2
1“Nakan tawaga niyu kanyu kaparihu manga Israilita ‘Kang nasakupan’#2:1 Kang nasakupan: sa Hibriyu, Ami. ag ‘Kinaawaan.’#2:1 Kinaawaan: sa Hibriyu, Ruhama.”
Nanguragin si Gumir
2“Manga anak, sungyawa niyu kanyu ina una balaw yi niku siya asawa, ag balaw yi niya aku asawa. Sungyawa niyu siya kuntay apasi yi niya kay magpanguragin. 3Dahil nu balaw siya umapas ubahan niku siya ag bumaliw uba siya parihu sa kay pagkalusad. Buwatun niku siya ga pangawakawaan ngatay ga tigangan pag daga, ag mamatay siya sa uwaw. 4-5Ag kamu kay manga anak balaw niku kaawaan, dahil manga anak kamu babayi magpanguragin. Makakaray-a ti pagbuwatun niyu ina ti naglusad sa kanyu. Magkun waya siya, ‘Mandasun aku sa kang manga lalaki imaw ti magpakaun sa kangku karan-unun hanggan danum, manga pisahan dilana ag linu, hanggan lana ulibu ag irinmun intus.’
6“Nakan aladan niku siya dugihin pag manga yangaw hampay unman siya makaluwas. 7Lagsun niya kay manga lalaki dapat unman niya sida matakdan. Hanapun niya sida dapat unman niya makitan. Bag-u sumabi siya, ‘Mamalik yi lang aku sa kang un-an pag asawa, dahil mas mayad waya kang kahamtangan kaybi kaysa taynguna.’
8“Balaw niya pag-isipun aku ti nagpakaun sa kanya manga ani, irinmun ubas, lana ulibu, hanggan mayamu pag pilak ag gintu binwat nida larawan ni Baal. 9Nakan sa udas tig-arani bawiun niku kang ipinakaun ani hanggan irinmun ubas. Ag bawiun diman niku kang ipinakaun manga pisahan dilana hanggan linu para itabun sa kay bilug uba. 10Ag taynguna ubahan niku siya sa atubangan niya manga lalaki, unman may makaribri sa kanya sa kang kamang. 11Paapasun yi niku ti tanan ipinasaman mahalaga pag sirang pagsamba pagtupadun niya kada timpu, kada bulan, hanggan kada Sirang Pamahari. 12Dautun niku kay manga tanum ubas hanggan manga puun igus kay sabi ibinayad kunu niya manga lalaki sa kanya. Buwatun niku marikut inda ga kapuruan, kay manga burak inda kan-un talun hayup. 13Parusahan niku siya dahil may manga udas magtuub siya kamangyan sa manga diyus-diyusan ni Baal. Nansulung siya manga pamarinu ag nanlagas sa kay manga lalaki, ag kinalimtan niya aku. Aku, ti Panginuun, ti magsabi inda.
14“Dapat taynguna, darahun niku siya sa pangawakawaan ag kaibgan maan tugka sa mapaibug niku siya. 15Iuli niku sa kanya kay manga tanman ubas, ag buwatun niku ti Karatagan Akur dalan manpaala-ala mayad pag paratabgan. Sagtun niya aku parihu sa kay binwat katpung anak waya siya, katpung sa kay pagluwas niya sa Ihiptu.”
16Magkun ti Panginuun sa manga Israilita, “Sa ati pag sirang niyu pagbalik sa kangku, tawagun niyu aku ‘Kang Asawa’ ag balaw yi niyu aku tawagun ‘Kang Baal.’#2:16 Kang Baal: Kay ibug sabihun, Kang pagsundun. 17Balaw yi gid niku kamu pabanggitun manga ngaran ni Baal. 18Sa ati pag sirang, mantaratu aku sa tanan kalasi hayup kuntay danga kamu pagsakti. Duraun niku sa daga Israil ti manga armas sa labanan, ti manga pamana hanggan baladaw. Dahil sa unman yi may kaguluhan, maturug kamu unman may pagkadalaan kadautan.
19“Kilalan-un niku kamu kang asawa tugka aban. Buwatun niku sa kanyu ti matadlung ag kang-ud. Mahalun niku kamu ag kaawaan, 20ag bumaliw matinupadun aku sa kanyu. Nakan kilalan-un yi gid niyu aku, ti Panginuun. 21Aku, ti Panginuun, magsabi sa ati pag sirang sagutun niku kanyu darangin. Pauranun niku hampay tumubu sa daga 22ti manga uyas, ubas hanggan ulibu para sa kanyu manga pag-ingarnan Hisriil.#2:22 Hisriil: Kay ibug sabihun, magtanum ti Diyus. 23Sa tunda pag panahun mangulian kamu sa kanyu daga bilang kang nasakupan. Ipakakit niku kang pangaawa sa kanyu manga pag-ingarnan Lu Ruhama.#2:23 Lu Ruhama: Kay ibug sabihun, Balaw kawaan. Ag kamu pag manga pag-ingarnan Lu Ami#2:23 Lu Ami: Kay ibug sabihun, Balaw niku nasakupan. ingarnan diman niku kamu kang nasakupan, ag sumabi kamu aku kanyu Diyus.”
Copyright © 2023 by OMF International, Philippines