Gimpuunan 39

Si Husi ag ti Asawa ni Putipar

1Igu dinara yi si Husi manga Ismailita sa Ihiptu, ipinabili siya sa kan Putipar usa sa manga takinan hari Ihiptu.#39:1 hari Ihiptu: sa Hibriyu, Paraun. (Si Putipar kapitan manga guwardiya sa balay hari.)

2Giniyahan Panginuun si Husi, nakan marapanalu siya. Ati siya pag mag-uli sa balay niya amu Ihipsiyu si Putipar. 3Nakitan ni Putipar paggiyahan Panginuun si Husi ag pagpapaladan sa tanan niya buruwatun, 4nakan mayad kay magpakiusa niya sa kan Husi. Binwat niya siya katiwala ag manugpamahala niya magtal-anakan hanggan tanan niya kasiyunan. 5Ginan sa umpisa si Husi ti magpamahala, pinapaladan Panginuun ti magtal-anakan niya amu, si Putipar taga Ihiptu hanggan ti tanan kasiyunan niya sa kay balay ag tanman. Binwat inda Panginuun dahil sa kan Husi. 6Ikinatiwala ni Putipar ti tanan sa kan Husi ag unman siya may tuhay irintindihun purya wadi sa kay magpili kay kan-un.

Makurasug si Husi ag marinu kay bilug. 7Balaw nagdugay, naibug sa kanya ti asawa niya amu. Paggaryahun niya si Husi hampay man-ululidan.

8Dapat unman nagpasnu si Husi. Magkun siya sa babayi, “Patingihi duy nimu aku! Ikinatiwala duy sa kangku niku amu ti tanan niya kasiyunan, nakan udyi siya nag-alinlangan sa manga butang atay sa kay magtal-anakan. 9Unman yi duy may tumupung sa kangku sa inda pag magtal-anakan. Ikinatiwala niya sa kangku ti tanan purya lang sa kanmu dahil asawa niya kawu. Nakan balaw duy niku mabuwat tunda sa kang amu ag magkasala sa Diyus.” 10Una sirang-sirang ti maggarya babayi sa kan Husi hampay man-ululidan, unman diman gid magpasnu si Husi.

11Sa usa ka sirang, sinmaka si Husi sa balay hampay mantarabahu. Nitaun unman may suruguun sa sulud balay. 12Hiniyaptan siya asawa niya amu sa balukas ag magkun, “Pag-ulid kawu sa kangku!” Dapat nalagiw si Husi tag sa luwas balay, ag natayak kay balukas sa babayi.

13Pagka nakitan babayi nakalwas yi si Husi ag hiyaput niya kay balukas, 14tinawagan niya kay manga suruguun ag magkun, “Bantayi niyu inda! Dinarahan kita niku asawa usa ka Hibriyu hampay ipakay-a kita. Alam aw niyu sinmaka siya sa kang sulud-sulud hampay lugusun aku, dapat nagringgit aku. 15Nakan nalagiw siya tag sa luwas, ag natayak kay balukas.”

16Itinagu babayi ti balukas ni Husi tugka sa rinmas-ug kay asawa. 17Itinultul niya rargu inda sa kay asawa. Magkun siya, “Ti dinara nimu sitay tag pag suruguun Hibriyu magkaibug pumakay-a sa kangku dahil nagsaka siya sa kang sulud-sulud hampay lugusun aku. 18Dapat nalagiw siya tag sa luwas pagka nanringgit aku, ag natayak waya ngani kay balukas.”

19Igu nasaydan ni Putipar ti tultulanun niya asawa tungkul sa binwat ni Husi, nangisug gid siya. 20Nakan ipinadakup niya si Husi ag ipinaslud sa pirisuhan manga piririsuhan hari. Dapat una sa pirisuhan si Husi, 21paggiyahan di siya Panginuun. Ag dahil sa kaayadan Panginuun, mayad di kay magpakiusa manugpamahala pirisuhan sa kan Husi. 22Nakan ikinatiwala niya sa kan Husi ti pagpamahala sa tanan pirisu hanggan sa tanan buruwatun sa pirisuhan. 23Unman nag-alinlangan ti manugpamahala pirisuhan sa manga ikinatiwala niya pag butang sa kan Husi, dahil paggiyahan Panginuun si Husi ag pagpapaladan sa tanan pagbuwatun niya.

Currently Selected:

Gimpuunan 39: HNN

Highlight

Copy

Compare