Pag-ighit 9

Ti Sarut sa manga Hayup

1Magkun ti Panginuun sa kan Muysis, “Atihi nimu ti hari Ihiptu sabihun nimu sa kanya, ‘Inda ti pagsabihun Panginuun, ti Diyus manga Hibriyu: Paighita yi kang manga nasakupan hampay makasamba sida sa kangku. 2Nu unman nimu sida paighitun, 3padaran-an niku sarut kanmu manga pag-alagaun pag hayup — manga kabayu, manga asnu, manga kamilyu, manga baka, manga karanidu ag manga kambing. 4Dapat ipablag niku ti hayup manga Israilita sa hayup manga Ihipsiyu, unman may mamatay sa hayup manga Israilita.’ ”

5-6Ipinaalam Panginuun buwatun niya inda aldaw, ag nangyari ngani. Namatay ti tanan hayup manga Ihipsiyu, dapat unman may namatay una di usa sa hayup manga Israilita. 7Namadara ti hari Ihiptu manga tawu hampay alamun nu tutuu unman may namatay sa hayup manga Israilita. Dapat una naalaman niya tutuu inda, maganit di gid kay tagipusuun ag unman maan niya pinaighit ti manga Israilita.

Ti Sarut manga Baga

8Magkun ti Panginuun sa kanda ni Muysis ag ni Aarun, “Pagbuul kamu tigus-a ka akup dapug sa darapgan, bag-u sarwagan ni Muysis sa durus sa atubangan hari Ihiptu. 9Mawayak ti dapug sa buu Ihiptu. Dahil siyun, tubuan manga baga ti bilug manga tawu hanggan manga hayup.” 10Nakan nanmuul ngani dapug sa darapgan sida ni Muysis ni Aarun, bag-u tinmindug sa atubangan hari Ihiptu. Isinarwag ngani ni Muysis sa durus ti dapug, ag tinubuan ngani manga baga ti manga tawu hanggan ti manga hayup. 11Una ti manugsalumangka unman makapasrangu sa kan Muysis dahil sida hanggan may manga baga diman parihu sa nagtubu sa tanan Ihipsiyu. 12Dapat pinaganit di gid Panginuun kay tagipusuun hari Ihiptu, balaw siya naniwala sa kanda ni Muysis ag ni Aarun, parihu sa sinabi Panginuun sa kan Muysis.

Ti Uran Yilu

13Bag-u magkun ti Panginuun sa kan Muysis, “Pagbangun kawu madlum surip aldaw ag atihi nimu ti hari Ihiptu, ag sabihun nimu, ‘Inda ti pagsabihun Panginuun, ti Diyus manga Hibriyu: Paighitun nimu kang nasakupan hampay makasamba sida sa kangku. 14Dapat nu unman, mamadara aku masyadu pag sarut mamarusa sa kanmu, hanggan sa kanmu manga may kangaranan ag nasakupan nimu hampay maalaman nimu unman aku may kaparihu sa buu kalibutan. 15Una kaybi waya, kaya yi kawu niku matyun hanggan kanmu nasakupan sa panab-anan manga panakitun, ag udyi mana kawu kainda. 16Dapat pinasnuan niku kawu mabuhi sa inda pag turunu: hampay maipakakit niku sa kanmu kang kamaskihan ag hampay makilala kang ngaran sa buu kalibutan. 17Dapat magpalabaw diman kawu sa kang nasakupan, ag unman waya nimu sida pagpasnuan umighit. 18Nakan aldaw, kainda diman pag udas, mamauran aku yilu ga manga batu, unman waya gid inda nalakawan Ihiptu ginan sa kabag-u nagpatindug inda pag nasyun. 19Nakan taynguna, suguun nimu ipasirung ti tanan nimu hayup ag ti tanan nimu panawuhun ati sa tanman, dahil una si unu ti asan sa luwas, tawu man ngatay hayup mamatay nu matamaan uran yilu ga manga batu.’ ”

20Nadala ti iba manga takinan hari sa binagaw Panginuun, nakan daldali nida ipinasirung ti manga panawuhun ag manga hayup.

21Dapat ti iba binul-an halaga ti pasandam Panginuun; pinabay-anan lang nida kanda manga hayup ag manga panawuhun sa luwas.

22Magkun ti Panginuun sa kan Muysis, “Paabwatan kanmu sugkud#9:22 sugkud: sa Hibriyu, kamang. tag sa langit hampay umuran yilu ga manga batu sa buu Ihiptu — sa manga tawu, sa manga hayup ag sa tanan manga pananum.” 23Nakan pagka ipinaabwat niya kay sugkud, nagpadara ti Panginuun linti ag kilat ag pinauranan yilu. Ti ipinauran Panginuun pag yilu atag sa daga Ihiptu 24imaw ti pinakamabisug ginan sa nagbaliw nasyun ti Ihiptu. Habang mag-uran yilu parargu waydi ti magkilat. 25Namatay ti tanan hayup hanggan ti natayak pag manga tawu sa luwas, hanggan yi ti manga tanum ag manga puun kayu. 26Ti Gusin lang ti unman nauranan yilu, dahil ati pag mag-uli ti manga Israilita.

27Ipinatawag hari Ihiptu sida ni Muysis ni Aarun. Magkun siya sa kanda, “Sa inda pag udas, pag-akuun niku nagkasala aku. Kang-ud ti Panginuun; aku ag kang nasakupan ti salan. 28Pakihampangi ti Panginuun, paapasa yi niya inda pag masyadu pag linti ag kilat hanggan ti pag-uran yilu. Paighitun yi niku kamu; balaw yi kailangan kamu pumirmaminti sitay.”

29Sinmagut si Muysis, “Nu nakalwas yi aku banwa, ipaabwat niku kang kamang ag mandarangin sa Panginuun. Bag-u umapas ti linti hanggan kilat, ag unman yi umuran yilu, hampay maalaman nimu Panginuun ti may apu kalibutan. 30Dapat alam niku kawu ag ti manga may kangaranan nimu unman waya magkadala sa Panginuun Diyus.”

31(Nadaut ti manga tanum flax#9:31 flax: tanum pagbuwatun pisahan linu. ag sibada,#9:31 sibada: Inda pag butir pagbuwatun tinapay ag intus. ati katpung aranyun yi ti manga sibada ag magburusang yi ti manga flax. 32Dapat unman nadaut ti manga tirigu hanggan ispalta#9:32 ispalta: Sa bagaw Hibriyu inda magtukuy sa usa ka kalasi uyas. dahil balaw waya inda aranyun.)

33Ginminan si Muysis sa atubangan hari Ihiptu ag linmuwas sa banwa. Ipinaabwat niya kay kamang ag nandarangin sa Panginuun; inmapas ti linti ag kilat, ti paglagpak yilu ag ti pag-uran. 34Pagka nakitan hari Ihiptu inmapas yi ti uran, ti yilu ag ti linti, utru siya nagkasala. Nagpaganit siya hanggan ti manga may kangaranan niya. 35Sa pagpaganit niya, unman niya pinaighit ti manga Israilita, parihu sa pagsabihun Panginuun sa kan Muysis.

Currently Selected:

Pag-ighit 9: HNN

Highlight

Copy

Compare