Pag-ighit 11

1Magkun ti Panginuun sa kan Muysis, “Padaran-an niku usa waya ka sarut ti hari Ihiptu hanggan kay nasakupan. Pagkatapus inda, paighitun yi niya kamu. Tabugun waya niya kamu hampay mapaighit madali. 2Sabiha nimu sa manga Israilita lalaki una babayi, paghagad sida pamarinu#11:2 pamarinu: sa Tagalog, alahas. pilak una gintu sa kanda kamalay manga Ihipsiyu.” 3(Ipinahintulut Panginuun bumaliw mabuut ti manga Ihipsiyu sa manga Israilita. Ag lubus ginalang si Muysis manga takinan hari Ihiptu hanggan manga mag-uli sa Ihiptu.)

4Nakan magkun si Muysis sa hari Ihiptu, “Inda ti pag sabihun Panginuun: ‘Lumawuy aku sa Ihiptu sa karaw-an yabi baliwa, 5ag mamatay ti tanan panganay pag anak lalaki sa Ihiptu, umpisa sa panganay hari Ihiptu, ti umilis sa kay pagkahari, tugka sa panganay pinakaababa pag suruguun babayi. Mamatay diman ti tanan panganay manga hayup. 6Madnugan ti mabaskug pag lulumian sa buu Ihiptu, balaw waya may nangyari ga kainda kaybi ginan ag balaw yi may mangyari maan ga kainda. 7Dapat sa rugar manga Israilita may kahusayan di; una di subang idu unman may madnugan.’ ” Magkun waya si Muysis, “Sa panab-anan inda, maalaman niyu tuhay kay mag-alaga Panginuun sa manga Israilita kaysa manga taga Ihiptu. 8Tanan kanmu may kangaranan pumakarani sa kangku nakayungdu ag magsabi, ‘Pag-ighit yi kawu ag tabana yi ti manga magsunud sa kanmu pag nasakupan!’ Siyun ginan, guminan yi aku.” Masyadu gid kay galit ni Muysis nighit ginan sa atubangan hari Ihiptu.

9Magkun kaybi ti Panginuun sa kan Muysis, “Unman maniwala sa kanmu ti hari Ihiptu, hampay mayamu waya pag makadululaw kang buwatun sa Ihiptu.” 10Binuwat nida ni Muysis ni Aarun inda pag manga makadululaw sa atubangan hari Ihiptu, dapat pinaganit Panginuun ti tagipusuun hari Ihiptu, ag balaw pinasnuan umighit ti manga Israilita ginan sa kay nasyun.

Currently Selected:

Pag-ighit 11: HNN

Highlight

Copy

Compare