Istir 7
7
Binitay si Haman
1Nagluwang sida ni Hari Aswiru hanggan ni Haman sa inalistu yapun ni Rayna Istir. 2Habang mag-irinuman sida, pinaingana maan hari si Rayna Istir, “Hintay gid ungud kanmu paghilingun? Sabiha yi nimu ag ipakaun niku sa kanmu una ti katunga niku kaharian.” 3“Mahal Hari, nu ungud gid kawu magbaya sa kangku, ribrihan duy nimu aku hanggan kang manga linahi Hudiyu. Tunda kang paghilingun sa kanmu. 4Dahil may itinaratu pirimyu sa manga tawu mumatay sa kanmi. Nu ipinabili kami hampay lang buwatun suruguun, pabay-anan yi lang niku, dahil balaw waydi tunda mahalaga para balagun waya niku kawu.”
5Magkun si Hari Aswiru sa kanya, “Si unu ti pinmanghas binmuwat katunda pag tarabahu ag naan siya kainda?” 6Sinmagut si Istir, “Ti maglaban sa kanmi ag kanmi kalaban si Haman yi ngani, daut gid.”
Magkadala yi gid masyadu si Haman sa atubangan hari ag ni rayna. 7Galit gid tinmindug ti hari. Tinayakan niya kay pag-inmun bag-u inmatag sa halamanan balay hari. Natayak si Haman magpaawa-awa sa kan Rayna Istir dahil alam niya pihu gid parusahan siya hari.
8Pagka nagbalik ti hari gin sa halamanan, natakdan niya madapaan si Haman sa atubangan igyaan ni Istir magpaawa-awa. Nakan magkun ti hari, “Duy, gustu waya banta lugusun nimu ti rayna sa sulud balay hari niku.”
Pagkalawuy bagaw hari, rargu dinakup si Haman manga tanud sa balay hari. Ag tinaungan kay ulu#7:8 tinaungan kay ulu: Mahimu tanda tunda matyun siya. niya. 9Magkun si Harbuna, ti usa sa manga suruguun hari, “Namabuwat duy si Haman matarum pag kayu hampay tuhugun si Murdukyu, ti nagribri sa buhi hari. Kay abwat pag kayu 50 ka luk-an siku ag arani inda sa kay balay ni Haman.”
Bag-u nagsugu ti hari, “Ati niyu pag bitaya si Haman.” 10Nakan binitay ngani nida si Haman ati sa kay ipinabwat matarum pag kayu para mana sa kan Murdukyu. Bag-u nadura ti pangagalit hari.
Copyright © 2023 by OMF International, Philippines