Diyuturunumiyu 7

Ti Pinili Diyus pag manga Nasakupan

(Pag. 34:10-16)

1“Nu darahun yi ngani kamu Panginuun niyu Diyus ati sa daga niyu ulianan ag apuun, ipatabug niya sa kanyu atubangan ti pitu ka nasyun mas mayamu ag mas makapangyarihan kaysa kanyu: ti manga Hitiyu, Girgisiyu, Amuriyu, Kananiyu, Pirisiyu, Hibiyu, ag manga Hibusiyu. 2Bag-u nu ipabahala yi sida Panginuun niyu Diyus sa kanyu ag natalu niyu sida, rurisa niyu sida lubus bilang handug sa Panginuun. Danga kamu magbuwat kasunduan ngatay magpakakit pangaawa sa kanda. 3Danga kamu mag-asawa sa kanda, ag danga diman niyu pag pasnui kanyu manga anak mag-asawa sa kanda manga anak, 4dahil ipakarayu nida sa Panginuun kanyu manga anak ag sumunud sida sa tuhay pag manga diyus. Ag nu mangyari inda, iparanas Panginuun kay pangagalit sa kanyu ag rargu maruris kamu. 5Bagkus ngap, kaindaay kanyu buwatun: Pandauta niyu kanda manga harandugan, runuta kanda aramirawan pag manga batu, pamulda kanda manga tulduk tanda diyusa si Asira, ag sunuga kanda manga diyus-diyusan. 6Dahil kamu pag manga tawu ipinablag para sa Panginuun niyu Diyus. Sa tanan pag manga tawu, kamu ti pinili Panginuun niyu Diyus ti pagmahalun niya pag nasakupan.

7“Pinili kamu ag pagmahalun Panginuun balaw dahil mas mayamu kamu kaysa iba pag manga tawu, dahil kamu waya ngani ti pinakapira sa tanan. 8Pinili niya kamu dahil sa kay pagmahal sa kanyu ag pagtupadun niya kay itinaratu sa kanyu manga ginurang. Nakan ngani ipinaluwas niya kamu sa Ihiptu sa panab-anan niya kamaskihan, ag binawi sa pagkapanawuhun sa hari Ihiptu. 9Alalahana niyu ti Panginuun niyu Diyus imaw lang ti Diyus. Masarigan siya pag Diyus, ag pagtupadun niya kay kasunduan tugka sa manga sinulput manga magmahal sa kanya ag magsunud sa kay manga sugu. 10Dapat ti manga unman magmahal sa kanya parusahan gid niya ag ipadamhak.

Ti Pirimyu sa Matinupadun

(Lib. 26:3-13; Diyut. 28:1-14)

11“Nakan tupada gid niyu ti manga sugu hanggan manga surundanun pag-ipakaun niku sa kanyu taynguna. 12Nu tupadun ag sundun niyu mayad inda pag manga sugu, tupadun diman waydi Panginuun niyu Diyus kay kasunduan kuntay mahalun#7:12 mahalun: ngatay, papaladan. niya kamu, angay sa kay itinaratu sa kanyu manga ginurang. 13Mahalun ngani niya kamu, papaladan ag payamuun. Pakan-an niya kamu mayamu pag manga anak, paabundahun kanyu manga ani sa kanyu daga: kanyu manga tirigu, irinmun ubas hanggan lana ulibu. Payamuun niya kanyu manga hayup ati sa kay itinaratu pag daga iayaw sa kanyu manga ginurang hanggan diman sa kanyu. 14Papaladan niya kamu higit waya sa iba manga tawu sa kalibutan. Unman may lalaki ngatay babayi sa kanyu ti mabaug, katunda diman sa kanyu manga hayup. 15Apinan kamu Panginuun sa tanan pag sakit. Balaw niya ipadara sa kanyu ti mayagting pag manga sakit kanyu nakitan ati sa Ihiptu, dapat ipadara niya inda sa tanan magtanum galit sa kanyu. 16Kailangan matyun niyu ti tanan pag tawu ipinahintulut Panginuun niyu Diyus sa kanyu. Danga niyu sida pag kaawai, ag danga kamu sumirbi sa kanda manga diyus, dahil bumaliw suduk inda para sa kanyu.

17“Barang nakan sumabi kamu sa kanyu sadili, ‘Mas makapangyarihan waya inda pag nasyun kaysa kanta. Kabitay wadi nita sida mapaighit?’ 18Dapat ay danga kamu magkadala sa kanda, nu unman alalahanun ngap niyu ti binuwat Panginuun niyu Diyus sa hari Ihiptu#7:18 hari Ihiptu: sa Hibriyu, Paraun. hanggan sa tanan Ihipsiyu. 19Nakitan gid niyu ti manga pagsubuk, ti manga makadululaw hanggan ti manga lilingutan pag bagay, ag ti makamaskihan pag kapangyarihan ipinakakit Panginuun niyu Diyus katpung ipinalwas niya kamu. Parihu diman siyun kay buwatun Panginuun niyu Diyus sa tanan manga pagkadalaan niyu pag manga tawu. 20Padaran-an sida Panginuun niyu Diyus manga tutub tugka sa midamhak una waya ti manga nasawad nakapatagu. 21Danga kamu magkadala sa kanda dahil ti Panginuun niyu Diyus kaibahan niyu, ti makamaskihan ag makadululaw pag Diyus. 22Amat-amat ipatabug sa kanyu Panginuun niyu Diyus tunda pag manga nasyun. Danga niyu sida rargu tabuhun tabugun, dahil nu buwatun niyu inda, yumamu ti simarun pag hayup. 23Dapat ipahintulut sida Panginuun niyu Diyus sa kanyu. Guluhun niya sida tugka sa midamhak. 24Ipahintulut niya sa kanyu kanda manga hari. Panmatyun niyu sida, ag malimtan yi sida. Unman una di usa sa kanda ti makatalu sa kanyu, matyun niyu sida tanan. 25Sunuga niyu kanda manga diyus-diyusan, ag danga niyu pagkaibgi kanda manga gintu hanggan manga pilak masaputan sa inda pag manga diyus-diyusan. Danga gid niyu inda pagbul-a dahil bumaliw suduk inda sa kanyu. Amanan gid niyu inda dahil pagkadat-an inda Panginuun niyu Diyus. 26Danga kamu magdara sa kanyu balay una hintay pag manga mayagting pag bagay, hampay balaw kamu midamhak kaibahan nida. Kailangan bugyahan gid niyu inda, dahil inda pag manga bagay kailangan gid duraun.

Currently Selected:

Diyuturunumiyu 7: HNN

Highlight

Copy

Compare