Binwat 23
23
1Nagturun si Pablu sa buu Katipunan manga Pinunu bag-u kay sinabi magkun, “Manga kaparihu niku Hudiyu, kaybi ginan hanggan taynguna tugka nag-ugali aku sa malumpiyu kang tagipusuun hanggan naisipan sa atubangan Diyus.” 2Pagka si Ananiyas, ti pangulu manughandug sa Balay Diyus nakadnug sa kan Pablu binagaw, sinabihan niya ti manga nakatindug sa kan Pablu arani sampala siya sa bibig. 3Bag-u sinabi ni Pablu sa kanya magkun, “Pihu kawu sampalun waydi Diyus, kawu ga lingub binarnisan malagti. Matukawan kawu asan pumihu mana sa kasalanan niku angay sa Kasuguan. Bati ipinasampal nimu aku, madi labag tunda sa Kasuguan?” 4Sinabi manga matindugan siyun magkun, “Pagmurahun nimu ti pinili Panginuun pag pangulu manughandug sa Balay Diyus.” 5Magkun si Pablu, “Manga kaparihu niku Hudiyu, unman niku naalaman siya maaw ti pangulu manughandug sa Balay Diyus. Nisurat paman sa Banal Kasuratan magkun, ‘Danga kawu magbagaw daut sa pinunu nimu nasyun.’ ”
6Alam ni Pablu ati sa Katipunan ti iba manga Sadusiyu ag ti iba Parisiyu, nakan iinalsa niya kay magbagaw sa Katipunan magkun, “Manga kaparihu niku Hudiyu, aku Parisiyu, kang manga gurang Parisiyu diman waydi. Taynguna aku idinimanda dahil sa kang mag-asa mabuhi maan ti manga namatay.”
7Pagka nadnugan nida kan Pablu sinabi, nagtalaluhan ti manga Parisiyu hanggan ti manga Sadusiyu, nadwa yi ti Katipunan. 8Dahil magkun ti manga Sadusiyu unman magkabuhi maan ti manga namatay, unman kunu may manga anghil, unman diman may manga ispiritu. Ti manga Parisiyu bay magpatutuu di sa pagkabuhi uman manga namatay hanggan sa manga anghil hanggan sa manga ispiritu. 9Nakan nanriringgitan yi gid sida. Pagka dugay may tinmindug manga manugtudlu Kasuguan, manga Parisiyu waydi. Mahigpit sida nangatadlungan magkun, “Unman gid may nakitan kami kasalanan sa inda pag tawu. Barang ungud may nagbagaw sa kanya una anghil una ispiritu.” 10Nag-amat di gid maan kanda magtalaluhan, nakan magkadala ti kumandir barang sab sangsangun nida si Pablu. Nakan sinugu niya kay manga sundalu atag sa kanda hampay bul-un nida si Pablu ginan sa kanda karaw-an bag-u darahun ipaslud maan sa barak.
11Ati katpung pag yabi tinmindug ti Panginuun sa kan Pablu arani magkun, “Pagmatutum duy kanmu naisipan. Nagtultul kawu tungkul sa kangku sa atubangan manga tawu sitay sa Hirusalim. Katunda diman kailangan tumultul kawu tungkul sa kangku sa banwa Ruma.”
Paggayakun si Pablu Matyun manga Hudiyu
12Pagka surip nagpululungan ti manga Hudiyu, nagtaratu sida sa Diyus dayu sida mangaun manginum hanggan sa udwaya malibun nida si Pablu. 13Mayamu sida ti may taratu katida, balaw lang upatpulu ka tawu. 14Bag-u nag-ati sida sa manga pangulu manughandug sa Balay Diyus hanggan sa manga paggurangunun manga Hudiyu, magkun sida, “Mahigpit duy kanmi itinaratu sa atubangan Diyus, dayu gid kami manamit karan-unun hanggan sa ud malibun nimi si Pablu. 15Nakan duy kamu hanggan ti Katipunan pagpaabisu sa kumandir pagkun kailangan daran-un niya si Pablu sitay tag, hampay paingan-un waya gid niyu siya tungkul sa kay binwat. Alistu kami pumuut sa dalan hampay matyun siya.”
16Kan Pablu ari babayi may anak lalaki. Pagka nakadnug siya tungkul sa kanda magpuut sa dalan, nag-ati siya sinmaka sa barak bag-u itinultul niya sa kan Pablu kay nadnugan. 17Tinawag ni Pablu ti usa ka kapitan bag-u kay sinabi sa kanya magkun, “Ibahi duy nimu inda pag kan-akan tag sa kumandir, may itultul siya sa kumandir.”
18Nakan inibahan ngani siya kapitan atag sa kumandir. Magkun ti kapitan, “Ti pirisu si Pablu nagtawag sa kangku, ibahi kunu niku inda pag kan-akan sitay tag sa kanmu, dahil may isabi kunu siya sa kanmu.” 19Inabat kumandir kan Pablu bapa tag sa un-an sa unman may magdungug, bag-u namaingana siya magkun, “Hintay duy ti kanmu isabi sa kangku?” 20Sinmagut ti kan-akan magkun, “Nagkarasunduan ti manga Hudiyu hampay sabihan nida kawu nu mahimu ipadara si Pablu aldaw surip agud ipaatubang sa Katipunan. Kay singyanan#23:20 singyanan: sa Tagalog, dahilan. hampay paingan-un waya gid siya tungkul sa kay binwat. 21Dapat danga kawu magpasnu sa kanda, dahil subra upatpulu ka tawu tigpuut sa dalan. Nagtaratu gid sida sa Diyus dayu kunu sida mangaun manginum hanggan sa ud malibun nida si Pablu. Una kainda handa yi sida mag-alagad sida sa kanmu sagut.” 22Sinabi kumandir sa kan-akan, “Pag-uli yi duy kawu. Danga mag-alaman una sa kantapu tungkul sa kanmu itinultul inda sa kangku.”
Ipinadara si Pablu atag sa kan Gubirnadur Pilik
23Tinawag kumandir kay duwa ka kapitan bag-u kay sinabi sa kanda magkun, “Paghanda kamu duwa ka gatus sundalu, may pitumpulu waya ka sundalu lunsay masakyan sa manga kabayu ag may duwa waya ga gatus sundalu may bangkaw. Pag-alistu yi kamu hampay umatag sa Sisariya sab yabi pagka nakalawuy yapun. 24Alistuhi diman niyu si Pablu kay manga sarakyan pag kabayu. Itibu niyu siya atag sa kan Gubirnadur Pilik. Ingatan niyu siya kaayad.” 25Bag-u may padara waya surat ti kumandir. Inda kay isinurat magkun,
26“Aku si Kalaudyu Lisyas ti may surat tabug sa kanmu duy, kagalang-galang Gubirnadur Pilik. 27Inda pag tawu dinakup manga Hudiyu kanda yi mana matyun. Pagka naalaman niku siya nasakupan Ruma, nag-ati aku kaibahan kang manga sundalu bag-u kang binawi siya. 28Gustu niku maalaman nu hintay kanda dimanda laban sa kanya, nakan ipinadara niku siya tag sa Katipunan nida. 29Ati pag naalaman niku kanda dimanda laban sa kanya tungkul sa manga kakurian sa kanda Kasuguan. Dapat unman may idinimanda sida laban sa kanya kang-ud sa ikamatay una ikapirisu niya. 30Pagka naalaman niku siya paggayakun yi matyun manga Hudiyu, susun ipinadara niku atag sa kanmu. Sinabihan niku kay manga kalaban kailangan sida pag-atubang sa kanmu hampay ipadnug nida kanda manga dimanda laban sa kanya.”
31Nakan bin-ul ngani manga sundalu si Pablu angay sa isinugu kumandir sa kanda bag-u pagka yabi yi kanda dinara siya sa banwa Antipatris. 32Pagka surip binmalik maan tag sa barak ti manga sundalu, tinayakan nida ti masakyan sa kabayu pag manga sundalu hampay umiba sa kan Pablu. 33Pagka sida rinmas-ug sa banwa Sisariya, ipinakaun nida ti surat sa gubirnadur bag-u kanda iinintirga si Pablu sa kanya. 34Pagka binasa gubirnadur ti surat, pinaingana niya sa kan Pablu nu taga naan siya. Pagka naalaman niya siya taga Silisya, 35sinabi gubirnadur magkun, “Patingihan duy niku kanmu kasu nu rumas-ug ti manga magdimanda sa kanmu.” Bag-u kay sinugu gubirnadur kay manga sundalu hampay kanda bantayan si Pablu sa balay kay nag-ulian kaybi ni Hari Hirudis.
Copyright © 2023 by OMF International, Philippines