Binwat 10
10
Itinudlu ni Pidru ti Mayad pag Barita sa kan Kurnilyu
1Ati katpung may usa ka tawu sa banwa Sisariya, kay ngaran si Kurnilyu. Kapitan siya manga sundalu taga Ruma sakup sa gurupu sundalu taga Italya. 2Si Kurnilyu hanggan kay manga kasunu balay niabay sa surundanun manga Hudiyu, masipag sida magsamba sa Diyus. Magpakaun diman gid si Kurnilyu kuwarta sa manga Hudiyu nu may kakurian, pirmi diman siya magdarangin sa Diyus. 3Pagka dugay, pagka palis ti init, may ipinakakit ti Panginuun sa kanya. Malinaw gid pag nakitan ni Kurnilyu may usa ka anghil Diyus nagsulud sa kay balay. Magkun ti anghil sa kanya, “Kurnilyu.” 4Kinulbaan kay tinmurun sa anghil bag-u sinabi niya, “Hintay duy asan?” Nagsagut ti anghil magkun, “Pagbayaun Diyus kanmu manga darangin hanggan kanmu awat sa manga makuri. Nakan pirmi kawu kay pag-alalahanun. 5Pagpasugu kawu taynguna manga lalaki atag sa banwa Hupi, bul-a nida ti usa ka tawu kay buu ngaran si Simun Pidru. 6Magdayun siya sa balay ni Simun manugtimpala sa paknul, ati sa baybay dagat.” 7Pagka nakatapus kay hampang sa kan Kurnilyu, nighit maan ti anghil. Bag-u bin-ul ni Kurnilyu ti duwa ka masarigan gid niya pag panawuhun hanggan ti usa ka suruguun niya pag sundalu. Tunda pag sundalu parihu ga kan Kurnilyu niabay waydi sa surundanun manga Hudiyu. 8Itinultul dapu niya sa kanda ti tanan manga nangyari bag-u sinugu niya sida atag sa banwa Hupi.
9Pagka sa usa ka sirang maglakaw waya tunda pag manga sinugu ni Kurnilyu sa dalan atag sa banwa Hupi. Ati katpung dinmayik si Pidru atag sa atup balay hampay mandarangin. Pagka magkakaraw-an yi sirang, 10magkalun-us yi siya, dapat udwaya tama ti karan-unun. Pagka dugay nabul-an siya isip, 11bag-u nakitan niya nabukasan yi ti langit. Bag-u may ga kumut daka hinigtan kay upat ka yungu itinuntun tag sa daga. 12May sukad tuhay-tuhay kalasi hayup, manga iyay hanggan manga manuk 13Bag-u nadnugan ni Pidru may magbagaw magkun, “Pagtindug yi kawu Pidru, pag-iyaw yi kawu, pagkaun.” 14Dapat sinmagut si Pidru, “Dayu gid duy, Panginuun. Una kaybi ginan unman gid aku nagkaun una hintay nu daut sa kang turun-anun.” 15May nagbagaw maan sa kanya magkun, “Danga nimu pagsabiha daut sa kanmu turun-anun ti ipinakaun Diyus hampay karan-unun.” 16Katlu ginan tunda pag nangyari bag-u binatak maan tag sa tungud tunda pag bilang ga kumut.
17Magpakaisip waya si Pidru nu hintay nguna kay kahulugan ti ipinakakit Panginuun sa kanya, naras-ugan yi ngap siya manga suruguun ni Kurnilyu. Pagka nagpatudlu sida sa manga tawu nu naan kan Simun balay, nag-ati ngani sida, 18bag-u nagtawag sida ginan sa luwas balay magkun, “May magdayun aw nguna atay tawu kay ngaran si Simun Pidru?” 19Pagpakaisip-isipun gid waya ni Pidru ti ipinakakit Panginuun sa kanya, magkun ngap ti Ispiritu sa kanya, “May tulu ka lalaki maghanap sa kanmu. 20Pagdugsun kawu pagkuyug gid sa kanda danga yi kawu mag-alaala, dahil aku ngap ti nagsugu sa kanda sitay tag.” 21Nakan nagdugsun ngani si Pidru ginan sa atup bag-u sinabi niya sa kanda magkun, “Aku ngani ti kanyu paghanapun pag tawu. Hintay nguna kanyu kailangan nakan nagsitay kamu?” 22Sinmagut sida magkun, “Kami duy sinugu ngani ni Kapitan Kurnilyu. Mayad siya pag tawu, niabay yi sa surundanun manga Hudiyu. Paggalangun diman siya tanan manga Hudiyu. Sinabihan siya anghil Diyus kawu yi ngani kunu ti ipabuul niya atag sa kay balay hampay makapatingi siya sa kanmu manga pagsabihun.” 23Bag-u kan Pidru pinasaka sida sa balay magkun, “Pag-igya waya kamu sitay.”
Pagka surip nag-alistu si Pidru bag-u kinmuyug siya sa kanda. May kaibahan waya siya manga patar-ari taga Hupi. 24Pagka sa usa ka sirang rinmas-ug yi sida sa banwa Sisariya. Pag-alagdun yi sida ni Kurnilyu. Tinipun ni Kurnilyu kay manga katawuhan hanggan kay pagmayadun pag manga kakilala. Tanan-tanan sida mag-alagad yi sa kanda ni Pidru. 25Pagka rinmas-ug yi si Pidru, sinulang siya ni Kurnilyu. Bag-u napadapa si Kurnilyu sa kan Pidru atubangan, kay sinamba. 26Dapat ay itinindug siya ni Pidru magkun, “Pagtindug yi duy kawu, dahil aku tawu lang waydi.” 27Maghampang waya si Pidru sa kan Kurnilyu, nagsaka yi sida sa balay. Pagka sinmaka yi si Pidru, nakitan niya mayamu tawu ti nagtiripun siyun. 28Bag-u sinabi ni Pidru sa kanda magkun, “Magkaalaman diman waydi niyu nu angay sa surundanun manga Hudiyu bawal gid ti usa ka Hudiyu magsabang una magpaminsan sa manga balaw Hudiyu. Dapat ipinakilala Diyus sa kangku danga yi kunu pagsabiha niku may turun-anun waya aku una sa kantapu pag tawu. 29Nakan ngani pagka ipinabuul niyu aku, udyi aku may pag-alalahanun, kinmuyug yi lang aku. Taynguna kang paingana sa kanyu, hayga nguna aku kanyu bin-ul?”
30Sinmagut si Kurnilyu magkun, “Nakatlu waya duy, manga kainda ngani palis ti init, aku nagdarangin sa kang balay. Bigla may tinmindug sa kang atubangan usa ka lalaki masilaw kay rutay. 31Magkun siya sa kangku, ‘Kurnilyu, nadnugan Diyus kanmu manga darangin. Pagbayaun niya kanmu awat sa manga makuri. 32Nakan ngani pagpasugu kawu atag sa banwa Hupi hampay bul-un nida ti usa ka tawu kay buu ngaran si Simun Pidru. Magdayun siya sa balay ni Simun manugtimpala sa paknul, ati sa baybay dagat.’ 33Susun pinasuguan yi ngani niku kawu. Mayad ungud duy kanmu nalub-anan nakan kawu nagsitay. Taynguna kami tanan nagtiripun handa sa atubangan Diyus hampay magpatingi sa tanan nimu sarabihun angay sa kay ibinilin Panginuun sa kanmu.”
Kan Pidru Paliwanag
34Bag-u nagpaliwanag si Pidru magkun, “Taynguna duy lubus naintindihan niku unman gid mag-api ti Diyus. 35Unman may pagpiliun siya una tawu una nasyun. Kay di pagbayaun ti tawu nu maggalang sa kanya ag nu magbuwat mayad. 36Inda yi ngani ti barita kay ipinaalam Diyus kaybi sa nasyun Israil, ti Mayad pag Barita tungkul sa kahusayan sa panab-anan ni Hisu-Kiristu, tig hari sa tanan.
37“Alam yi niyu nu hintay ti nangyari sa bilug daga Hudiya. Nag-umpisa tunda sa Galiliya pagka itinulbaw yi si Hisus angay sa kay manga itinudlu ni Huwan. 38Naalaman yi waydi niyu inda pag Hisus taga Nasarit, ti pinili Diyus, nakan ipinakaun Diyus sa kanya ti Ispiritu Banal hanggan ti kapangyarihan. Namalibutan siya una naan tag, nagbuwat siya mayad. Ti tanan tawu inapuan diyablu kay diman pinaayad, dahil sa kanya gid ti Diyus. 39Nakitan gid duy nimi ti tanan niya manga binwat sa daga manga Hudiyu hanggan sa Hirusalim. Bag-u kanda ipinaku siya sa kurus, kanda minatay. 40Dapat ay pagka sa ikatlu pag sirang siya binuhi maan Diyus bag-u ipinakakit di maan siya Diyus, 41dapat balaw sa tanan tawu. Sa kanmi lang pag ipinakakit siya, dahil kami ngani ti daan pinili Diyus manga manugpadakit sa inda pag manga nangyari. Pagka nabuhi maan si Hisus, kaibahan di maan niya kami kasaru diman niya sa karan-an. 42Ibinilin niya sa kanmi pagbarita sa manga tawu kuntay si Hisus yi ngani ti pinili Diyus pag Manugpihu aban sa tanan tawu nu daut nu mayad, una sa manga buhi di waya ag sa manga namatay yi. 43Ti tanan purupita nagbarita diman waydi tungkul sa kan Hisus magkun, una hintay pag tawu nu sumarig sa kanya, patawadun Diyus kay manga kasalanan dahil sa kamaskihan niya.”
Ipinakaun ti Ispiritu Banal sa manga Balaw Hudiyu
44Udwaya magkatapus kan Pidru paliwanag, kadaka lubus sinuldan ngap Ispiritu Banal ti tanan manga tawu siyun magpatingi sa Mayad pag Barita. 45Nadulaw gid kan Pidru kaibahan pag manga patar-ari Hudiyu. Una maaw sa manga balaw Hudiyu ipinakaun Diyus ti Ispiritu Banal. 46Dahil nadnugan nida ti manga balaw Hudiyu magbagaw yi sa tuhay-tuhay pag pamagaw magdayaw sa kamaskihan Diyus. Nakan magkun si Pidru, 47“Ipinakaun Diyus ti Ispiritu Banal sa inda pag manga tawu, parihu diman ga sa kanta. Udyi nguna may umampara sa inda pag manga tawu hampay itulbaw sa danum.” 48Nakan sinabi ni Pidru, “Kailangan itulbaw yi sida ipasakup sa ngaran ni Hisu-Kiristu.” Pagka sida itinulbaw yi, tinawidan waya nida si Pidru may manga pira waya ka sirang.
Copyright © 2023 by OMF International, Philippines