2 Tisalunika 2
2
Ti May Puun Kadautan
1Manga patar-ari, nu bay tungkul sa pagsitay aban nita Panginuun Hisu-Kiristu hanggan sa kanta pagtiripun sa kanya, paghilingun nimi 2danga kamu magkataranta, danga waydi magkaaburidu sa manga barita tawu kuntay rinmas-ug yi ti kaudasan Panginuun. Danga kamu magpaniwala una kanda sabi ipinurupita kunu tunda, una abi itinultul kunu una abi kunu sa surat ginan sa kanmi. 3Sa una waya kabitay pag paraan tawu, danga kamu padaya. Ti kaudasan Panginuun balaw rumas-ug hanggan sa ud mangyari dapu ti katapusan pag maglaban sa Diyus ag hanggan sa ud mibantala ti May Puun Kadautan, ti daan ihinanda para tabug sa unman may katapusan pag kaparusahan. 4Siya yi gid ti Manuglaban. Magpalabi-labi siya laban sa tanan pag-ingarnan manga tawu kuntay diyus hanggan sa tanan pag manga pagsambahun nida. Pagka dugay ipaabwat niya kay sadili, sumaka siya sa Balay Diyus, tumukaw siya ati akuun niya kuntay Diyus siya.
5Unman aw lugud niyu natandaan? Kang yi sinabi sa kanyu inda tanan-tanan pagka aku asan waya sa kanyu. 6Nakan lang, udwaya nangyari inda dahil alam yi waydi niyu may mag-ampara waya hampay nu kaudasan yi bag-u lumuwang ti May Puun Kadautan. 7Taynguna matagu-taguan waya tunda pag kapangyarihan daut kay buwat hanggan sa ud bul-un ti Manug-ampara. Nu bay mab-ul yi ti Manug-ampara, 8bag-u mibantala yi ti May Puun Kadautan. Pagka sa kaudasan niya pagras-ug ni Kiristu, arupan niya ti May Puun Kadautan kay papasun yi, matyun siya sa masyadu masilaw pag rayaw ni Kiristu. 9Lumuwang gid ti May Puun Kadautan may kapangyarihan ni Satanas. Nakan bumuwat diman ti May Puun Kadautan manga makadululaw pag tanda may daka pag kamaskihan hampay dumaya siya sa manga tawu. 10Gumamit siya tanan paraan pag pamadaya hampay madaya tag sa kadautan ti manga midamhak, tunda ngani pag manga tawu miribri mana nu nangus kanda lang tinanggap ag minahal ti katutuuhanan. 11Dahil ngani unman ngap tinanggap nida ti katutuuhanan, nakan pagpahintulutan sida Diyus sa udyi kumilala sida sa tutuu sa pudil. 12Nakan ngani masintinsiyahan Diyus sa kaparusahan ti tanan tawu magdayu magpaniwala sa katutuuhanan, bagkus ngap binaya nida ti kadautan.
Ti manga Pinili Diyus hampay Pakan-an Karibrihan
13Dapat kailangan pirmi kami magpasalamat sa Diyus dahil sa kanyu, manga patar-ari. Kamu kay pagmahalun Panginuun. Kami magpasalamat gid dahil ginan waya sa kabag-u kamu kay yi gid pinili hampay kamu pakan-an karibrihan, dahil sa kay kamaskihan Ispiritu imaw tigbuwat matadlung sa kanyu ag dahil sa kanyu pagsarig sa katutuuhanan. 14Nakan kay binutung kamu Diyus pagka itinudlu nimi sa kanyu ti Mayad pag Barita hampay sa kanyu yi kay kadayawan nita Panginuun Hisu-Kiristu. 15Nakan ngani duy manga patar-ari, pagpakarig-un kamu, dagbul-iw sa manga katutuuhanan kanmi itinudlu sa kanyu una sa bagaw una diman sa surat.
16Kanmi pag-idarangin kamu hampay pasayahun nita Panginuun Hisu-Kiristu hanggan nita Diyus Ama, imaw ti nagmahal sa kanta. Kinaawaan gid niya kita, pinakan-an niya kita unman magkauman pag matutum naisipan hanggan marig-un pagsarig. 17Kanmi pag-idarangin kamu hampay pakan-an kamu marig-un pag naisipan agud kanyu pagbuwatun hanggan pagbagawun lunsay kaayadan.
Copyright © 2023 by OMF International, Philippines