Romye 6
6
Hɨm nee ka myentə gə le da Ma Həmɨnpwa Yaɓwarən
1Ɓə a shiya mye ɓa sa ka ləngɨn? Naa hɨm a pɨrə humwa ka ɗa səhase gələ wuladəha da Həmɨnpwa a pɨrə humwa ta gbaki ma? 2Ə'ə, aa sə gən. Di anda gə səhase, hɨm nə ɓətɨ wogi, a myee səhase yə tam ka gətə a nəngrən, ɓə ya mya mɨna pɨrə humwa a nza vor səhase ta ɗarən? 3Hwuna leyə atɨ hɨm myee kat mya ɗam batisɨmatə, peyə gə ɓwaa ka Yesu Ma Həmɨnpwa a Yaɓwarən, dɨ ha batisɨmatɨngɨn mya peyəm a gəm hiɗə a vor we dan. 4Gə-angɨn mgban mye mbəttəm ɓwaa kan dɨ ha batisɨmate pedəm a vor we dan, gəkɨlə ɓətɨya mya maddən gə we ndi Ma Həmɨnpwa a Yaɓwarən dɨ ha fukata Həmɨnpwa Baatə, sə mgban hɨm ɓa nzamə vor myentɨ hweltə.
5Di anda ɓəgəng hɨm peyəm ka Yesu gə hiɗə a vor we dan, mbak-mbak mye ɓa peyəm kan a gə hiɗə dɨ ha mattɨ dan gə we ka myentə. 6Gələ hɨm leyəm atɨ mye gbal nzaa iite hɨm a nzam də kɨnɨnɨng gələ mya nggurgə wule sɨtɨ iitɨngɨn, gə ɓe hɨm aa yə gəə kɨse da səhasə – 7gəkɨlə ma kat mbɨri, ɓə piyagə kɨsawne da səhase.
8Hɨm leyəm kat atɨ mye mbərəm ɓwaa ka Ma Həmɨnpwa a Yaɓwarən, mye mwamdiyale mgban atɨ mye ɓa nzam ɓwaa kan. 9Hɨm leyəm kat atɨ Həmɨnpwa maddə Ma Həmɨnpwa a Yaɓwarən gə we ka myentə, ndaa diyə ga mɨna mbɨrə ɓə gələ we yə tamdə ka gətə a nəngɨn. 10Mbɨrte nda mbɨrə som hiɗə kal-kal gələ nda ɓiya gəta səhase nə, shezə nzate nda nza ka myentə ɓəgəng gə le da Həmɨnpwa nda nza.
11Sə mgban hwuna nidə nəngəwnə ɓətɨ wogi gə səhase, shezə hwunə nza ka myentə a haka Həmɨnpwa a vor Yesu Ma Həmɨnpwa a Yaɓwarən. 12Gə-angɨn ɓe hwunaa yə mwa səhase a mbəwnə a nza sɨtɨ soɓwa nə, a ɗɨkdəwnə hwun ta koddə kadawo sɨtə. 13Ɓe hwunaa yə mwa a vədə a basa a sɨsəwnə gələ ɗa səhase, vəmdə sɨsəwnə a haka Həmɨnpwa ɓəmbə gə ɗa lyentɨ pepetə ɓətɨ myee mya mɨnaa dərən gə we ka myentə nə. 14Ɓe səhase aa yə mbəwnə, gəkɨlə hwun yə tam a mɨni pukə ɓashita Musa, shezə hwune a pukə wuladəha da Həmɨnpwa.
Gəm kɨse ɗa sə pepeyə
15Ɓə a shiya mye ɓa sa ka ləngɨn? Naa hɨm a pɨrə humwa ka ɗa səhase gə hɨm yə tam a pukə ɓashita Musa, gə hɨm nə a pukə wuladəha da Həmɨnpwa ma? Ə'ə, aa sə gən! 16Hwunaa leyə atɨ hwun kana nggur nəngəwnə a ɗɨkə pukə ama ta koddən, hwun gəə kɨse da mangɨn nə ma? Hwun ɓa gəə kɨse ɗa səhasə a ɓa zə kəwnə a we? Naasə hwuna koddə kormi Həmɨnpwa a gəə kɨse ɗa sə pepeya? 17Usəkə da Həmɨnpwa! Gəkɨlə kɨnɨnɨng, hwuna nggɨl səhase a pɨrə vorsən ta ɗan kɨsawne, ɓəgəng hwun tiya dɨ koddə shee mya kənəwnə kat ka hubosəwnə hiɗə. 18Mye dɨmdəwnə gə kɨsawne da səhase, hwun gəə kɨse ɗa sə pepeyə.
19Na boyownə ləməgye yang pupuluk gəkɨlə hwun kpenəwyi. Ɓətɨya kɨnɨnɨng hwuna vədə base sɨsəwnə kɨse nzaa gunamti ka kwakaɗɨkatə mba-dɨ-mba, gə-angɨn ɓəgəng vəmdə base sɨsəwnə gə kɨsawnə ɗa sə pepeye a ɓa zə kəwnə a nzaa ɗəmɗəmtə. 20Ite hwune a vor kɨsawnə səhase, asə aa pɨrdəwnə ka lyentɨ pepetə. 21Ɓətɨ ite hwune a vor ɗa səhase a hwuna dɨ gəə sopingɨn ɓəgəng, moonə mɨnə hwuna ɗɨmə də? Kpawtɨ səhasəngɨn nə we. 22Ɓəgəng, mye dɨmdəwnə gə kɨsawnə səhase, hwun gəə kɨse da Həmɨnpwa nə, moona hwuna ɗɨmə nə ɓa zə kəwnə a nzaa ɗəmɗəmtə, a kpawtə kat hwuna ɗɨm myente kaaru-kaaru. 23Gələ moona ɓwaara a dɨ ɗɨmə ɗa səhase sɨnə we, həmta Həmɨnpwa mgban kotə myente kaaru-kaaru dɨ haka Yesu Ma Həmɨnpwa a Yaɓwarən Həmɨmiye dam.
Currently Selected:
Romye 6: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
