Romye 4
4
Həmɨnpwa a bəl Ibɨraim ma pepeyə dɨ ha mwadiyale
1Ɓə a shiya mya sa ka le da Ibɨraim a ndi kwirə yə jigenə, mɨnə nda ɗyegənə a nə mwadiyale? 2Anda gəkɨlə lyentɨ pepeta Ibɨraim nə Həmɨnpwa aɓə nidən ma pepeyə, Ibɨraim nee ka mgbaalə məndaranye, kat ka angɨn ndaa dɨ məndaranye a humwa Həmɨnpwa. 3Nda a shiya Malɨmtɨ Ɗəmɗəmtə a sa? “Ibɨraim a mwaka Həmɨnpwa a gɨɗən, gə-angɨn Həmɨnpwa a bəltən ma pepeyə.”#4.3 Naasə: Tiyatə 15.6; 22.
4Ɓwaare leyə kat atɨ ma ɗa lyentə, mya dɨ mbwan moone, mbwamtɨngɨn aa həmə mya həmə kan, mbak-mbak moonə lyentɨ dan nə mya mbwan. 5Ma mgban aa ɗa itɨ lyenti, shezə nda mwaka Həmɨnpwa a gɨɗən ɗəng, Həmɨnpwa ndi ma dɨ sawuɗa ji-ɗa səhase, ɓa bəl mangɨn ma pepeyə. 6Wule ləngɨn nə həmɨn Dawuda a boyo atɨ, ma Həmɨnpwa a bələ ma pepeyə, nagi aa gələ lyentɨ pepetɨ dan, Həmɨnpwa ɗan sə pepeye.
7“Sə hanɨngti kaarən
a tən myee mya nggurərəngə
səhasə ɓiya ɓashitə,
a wule myee mya kupo səhase darən.
8Sə hanɨngti kan
a ma myaa diyə gaa bəl
səhase dan a nəngɨn.”#4.8 Naasə: Dyemshe 32.1,2.
9Ɓə wule sə hanɨngtɨngɨn a Dawuda a bwe le a nəngɨn ɓwaa, a nə myee mya jengdərən a lakəwne nə ɓəmbə ma, naasə mgban ka mbiɗitɨ myee myaa jengdərən a lakəwne na? Ɓətɨya hina dɨ boyə atɨ, Ibɨraim a mwaka Həmɨnpwa a gɨɗən gəkɨlə mwadiyaləngɨn, Həmɨnpwa a bəltən ma pepeyə. 10Nda goɗinə Həmɨnpwa a bəl Ibɨraim ma pepeya? A beetɨ jengsən a lakəwne ma? Naasə mgban myaa nda jengdən a lakəwne na? Ite myaa nda jengdən a lakəwne nə! 11Ibɨraim a luu sɨgbəshi jengtə a lakəwne ka vomihaa gəədən ma pepeyə dɨ ha mwadiyale a ite myaa nda jengdən a lakəwne. Gə-angɨn sɨnə baagə myee mwadiyale shezə myaa jengdərən a lakəwne, gələ Həmɨnpwa a bəltɨrən mi pepeyi. 12Sə mgban, Ibɨraim nə baagə Yawudee mya jengdərən a lakəwne a wule myee mwadiyale ka Həmɨnpwa ɓətɨ ndi Ibɨraim a ite myaa nda jengdən a lakəwne.
13Aa dɨ ha koddə ɓashitə Ibɨraim ka kwirəngɨn a luu shee Həmɨnpwa a boyo a nzarəndən atɨ ndi ɓa ɗɨm bətɨ vɨratə kat, shezə dɨ pepete dɨ ha mwadiyale. 14Anda gəkɨlə koddə ɓashita Həmɨnpwa ɓwaare ɓa ɗɨm shingɨn, angɨn bɨlə atɨ taa fukati ka mwadiyale, la Həmɨnpwa a boyo a nzadən mgban gə ɓaa. 15Gələ ɓashitə, yedi-kɨtta Həmɨnpwa a shi nə ɓwaare kat. Haa ɓashitə tamdə, taa ɓiya ɓashiti a hangɨn.
16Gə-angɨn la Həmɨnpwa a boyo a nzadən a shi dɨ ha mwadiyale, gələ nggagə dɨ ha wuladəha da Həmɨnpwa myee dɨ kwirə Ibɨraim a ɗɨmə, aa Yawude nə ɓəmbə, shezə kat ka myee ka wule mwadiyale da Ibɨraim nə. Gələ Ibɨraim nə baagəm, hɨm ji-mwadiyale kat. 17Ɓətɨya Malɨmtɨ Ɗəmɗəmtə a boyo atɨ, “Hɨnə ɗɨkda gələ hye gəə hyenə baagə zərgi ɓwaare vɨratə kat.”#4.17 Naasə: Tiyatə 17.5. Sɨnə baagəm a humwa Həmɨnpwa a nda mwadiyale kan. Sɨnə Həmɨnpwate dɨ və wogye myentə, nda ɗɨkdə wule shee tamdə təna dɨma a gə də.
18Nagi a nə sate atɨ Ibɨraim iiragə mwasatə, kat ka angɨn nda pɨrə humwa ka bəə myentə ka mwadiyale a nə la Həmɨnpwa a boyən atɨ ndi ɓa mwasa nze. Zərgi ɓwaare vɨratə kat ɓa dɨma dɨ kwirəngɨn, ɓətɨya Malɨmtɨ Ɗəmɗəmtə a boyo atɨ, “Myee ɓa dɨma dɨ kwiranga ɓa gə hananang.”#4.18 Naasə: Tiyatə 15.5. 19Mwadiyale dan aa gbəkəyə nagi a nə sate atɨ ɓə iira, taayə maasə kan gəkɨlə kyawasən tɨlə haru hiɗə. Mesən Saratu jinti, kwa-mwasatɨ darə mgban pɨrə, gə nggi iiragə mwasatə. 20Kat ka angɨn Ibɨraim aa ɗa ndəle ka ləngɨn, nda mwaka ləma Həmɨnpwa a boyo a nzadən, nda pɨrə humwa ka kangtə kpəkəkə a vor mwadiyale ta fukadə Həmɨnpwa. 21Nda kangə nə mwadiyale ka sate atɨ Həmɨnpwa nee ka gətə nda ɗa sa nda boyo a nzadən atɨ ndi ɓa ɗa. 22Gə ləngɨn mgban, “Həmɨnpwa a bəltən ma pepeyə.” 23Dorshingɨn atɨ, “Həmɨnpwa a bəltən ma pepeyə,” aa gə le dan nə mba-mba mya doro. 24Mya doro gə le dam mgban, a hɨm myee Həmɨnpwa ɓa bəltəm mi pepeyi a humwasən gələ hɨm a mwaka sate atɨ sɨnə maddə Yesu Həmɨmiye dam gə we ka myentə. 25Mya vədən nda mbɨrə gəkɨlə səhasə dam, Həmɨnpwa a maddən gə we ka myentə gələ nda sawuɗam.
Currently Selected:
Romye 4: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
