Romye 11
11
Mi Israila ɓyeləng Həmɨnpwa a kəpdərən
1Na ɗiyə atɨ ɓwaa, kwoti Həmɨnpwa a kwo myee dan ma? Ə'ə, aa sə gən nagi kəng-kəng. Hɨn ka nəna nzə-Israilati, nzə-jiyə Ibɨraim, dɨ kwirə jigenə Benjamin. 2Həmɨnpwa aa kwo myee dan 'ye nda leetɨrən kɨnɨnɨng. Hwuna ɗyanga ka ləməgyee Malɨmtɨ Ɗəmɗəmtə a boyə nə kpale Iliya, a ite nda tuwo a bɨlə Həmɨnpwa yedi-kɨttɨ dan a nə mi Israila atɨ, 3“Həmɨmiye, tən ɓəl kpalye dəw, tən ɓeegə kɨriye dəw. Gəngnə hɨnə mbiɗi hiɗə kal-kal, tənə dɨ ɓəri gə təna ɓɨlti mgban.”#11.3 Naasə: 1 Həmye 19.10. 4Shezə Həmɨnpwa a luwa a san, “Hɨnə ka ɓwaare haru bəw laka tukolukpe (7,000) a 'ye aa ndaga gyerə humwa pɨlaa mya wa atɨ Baal a kalan-gbəətə.”#11.4 Naasə: 1 Həmye 19.18. 5Sə mgban ɓəgəng imi nə də ɓyeləng, a myee Həmɨnpwa a kəpdərən, dɨ ha wuladəha dan. 6Gə dɨ ha wulahangɨn nə ɓəmbə Həmɨnpwa a dɨ nggɨl ɓwaara, aa gə lyente ɓwaara a ɗa. Gəkɨlə anda gə lyenta ɓwaara, angɨn taayə lə wuladəha də.
7Ɓə a shiya hɨm ɓa sam ka ləngɨn? Mi Israila 'ye dɨ ɨl Həmɨnpwa ka haɓye a hubotə, tənaa ɗɨmrən, shezə myee Həmɨnpwa a tattɨrən nə ɓəmbə ɗɨmrən. Mbiɗisərən mgban mya nyara hubosərən. 8Ɓətɨya mya doro atɨ,
“Həmɨnpwa a kipa kwa-hubosərən
ka səɗə-yedye darən kat,
təne ka dye,
tənaawa naa haa,
ka kwakye mgban tənaawa kɨl le,
baa dɨma a fəranə supo.”#11.8 Naasə: Gɨraha 29.4; Ishaya 29.10.
9Ɓətɨya həmɨn Dawuda a boyo atɨ,
“Naa sɨlangsətɨ darən mgban a gərən pengə
a tən ɓa kɨsə də,
nda gərən fara pawti a tən ɓa pawo nəngɨn,
Həmɨnpwa mgban a ɗarən səgbəɗye.
10Naa diingrən a vwotə,
gələ ɓe tənaa naa haa,
beesərən mgban a puwa
gələ ɓwatɨ tənətɨ darən kaaru-kaaru.”#11.10 Naasə: Dyemshe 69.22-23.
Myee aa Yawude ɓa ɗɨm mbətə
11Na ɗiyə atɨ ɓwaa, pawte Yawude a pawo, gə təna fokə a yerə ɓaa ma? Ə'ə, aa sə gən! Ɗongə koddə le darən nə ɗɨki mbəha a ɓə mɨna a haka myee aa Yawude. Gə-angɨn a və mi Israila jiwne, təna mɨna a haka Həmɨnpwa. 12Anda ɗongə koddə le da Yawude nə shi ka mi vɨratə ka shi-pepeyi gbakye, poritɨ darən mgban a shi ka myee aa Yawude ka shi-pepeyingɨn, ɓə ya Yawude aa dɨ ɗɨm shi-pepeyee gbaki pɨri anda tən mɨna a haka Həmɨnpwa tən dɨ katə?
13Hwun myee aa Yawude, hwunə na dɨ kənə. Gəkɨlə le dəwnə Həmɨnpwa a lyanari gə na gəwnə kpa-lagbe. Gə-angɨn a hake sə məndaranyi ka lyente Həmɨnpwa a vi. 14Ndəng dɨ ha lyente na dɨ ɗa a wakasəwnə angɨn ɓa ɗɨkdə myee de tən Yawude təna ɗa jiwne a mɨna, gə imi dɨ vorsərən a ɗɨm mbətə. 15Gəkɨlə ite Həmɨnpwa a kwotɨrən, mbiɗitɨ mi vɨratə a mɨna asɨ gəə tənə ndewogə Həmɨnpwa. Luute Həmɨnpwa ɓa mɨna luutɨrən ɓa gəə kwa-matti gə we ka myenti. 16Anda a gyengə dɨ sɨtɨ burodite mya kəpdə gə mya həmə Həmɨnpwa kaarə nee ɗəmɗəm, angɨn bɨlə atɨ burodite mbiɗi nee ɗəmɗəm kat. Anda kwirə kada mya kəpdən gə mya həmə Həmɨnpwa kan nee ɗəmɗəm, base kadangɨn mgban ɓa gə ɗəmɗəm.
17Anda mye ɓeegə base kadaa mya ngguɓo hwoɗye a dɨ mbwi, mya ɓaya base kadaa za a kaake a aawa mbwo a kpəkə sɨtɨ kadaa mya ngguɓo hwoɗye, hwun myee aa Yawude sə hwuna gə. Hwuna ɗɨmə a dɨ zɨmə ɓwaa ka sə dɨ sɨtɨ kadangɨn. 18Gə ləngɨn ɓe hwunaa məndaranye a nənəngəwnə, gəkɨlə a hwun ɗaasə, ɗyangam atɨ hwun base kada ɓəmbə, aa hwunə kworee kɨt kada nda ɓə kangə, kwirə kɨttəwnə. 19Ndəng a vorsəwnə, a hwun myee aa Yawude, imi ɓa luwa le a sa atɨ, “Kat ka angɨn, mye ɓeegə base kadaa mya ngguɓo hwoɗye na ɓə pɨrə dɨɓongɨn.” 20Diyalə sə gən. Mya ɓeegə base kadangɨn gə ɗongə mwadiyale, hɨnggəwnə hwuna mbiɗi a sɨtɨ kada gə mwadiyale dəwnə. Kat ka angɨn ɓe hwunaa nggur nəngəwnə kɨr-kɨr, ndɨka hwuna nza ka kala. 21Anda Həmɨnpwa aa ɗa purutɨ Yawude a tən myee tənə base kadaa kangə hwoɗye, sə mgban ndaa dɨ mbədəwnə.
22Namə wule ɓwaarawna Həmɨnpwa a gə kan ka wule ɗa sɨmwarashe dan. Nda duwa ɗa myee kworən sɨmwarashe, hwun mgban ndi ɓa bɨləwnə ɓwaarawne hwun kana pɨrə humwa ka bəə myentə a nə ɓwaarawne dan. Naasə hwun mgban ndi ɓa ɗawgəwnə gə sɨtɨ kada. 23Hye kana niyə mgban Yawude a mɨna asɨ mwaka Ma Həmɨnpwa a Yaɓwarən, Həmɨnpwa ɓa mɨna mɨndərən a hee nda ɗawgərən də, gəkɨlə sɨnee ka gətə nda mɨndərən a hengɨn. 24Gə-angɨn, hwun myee aa Yawude, hwunə ɓətɨ base kadaa za a kaake, mya ɓaya basengɨn a kpəkə sɨtɨ kadaa mya ngguɓo hwoɗye. Yawude mgban nə ɓətɨ kadaa mya ngguɓo hwoɗye, gə-angɨn mbak-mbak Həmɨnpwa ɓa mɨndərən tan-tan a doɓingrən a sɨtɨ kadaa mya ɗawgərən də.
Mi Israila ɓa ɗɨm mbətə
25Ji-nuwo, mwoshinə atɨ hwuna lee shee a haa ɓotə kɨnɨnɨng, gə ɓe hwunaa pɨrə ngguunə ɓaye. Imi dɨ vor mi Israila mya nyerədə hubosərən a tɨlə a haa baa a ɗɨkə myee aa Yawude a ɗɨmə a pɨra a haka Həmɨnpwa a vor furte kana. 26Angɨn nə ɓa ɗɨkə Həmɨnpwa a mbədə mi Israila, ɓətɨya mya doro atɨ,
“Nzə-mbəha ɓa dɨma dɨ vor Siyona,
ndi ɓa ngguro je da Yakubu
gə ɗongə kala Həmɨnpwa.”
27Sə mgban Həmɨnpwa a sa atɨ,
“Hɨn kana ngguro mi Israila gə səhase darən,
hɨn ɓa pɨrə kɨləsətə kaarən.”#11.27 Naasə: Ishaya 59.20,21; 27.9; Jerimaya 31.33,34.
28Sa pa ləmə feme da Həmɨnpwa, tən Yawude tənə ji-nyaagə Həmɨnpwa gə le dəwnə. Shezə Həmɨnpwa a mwotɨrən gə tatte nda tat yə jigərən. 29Gə shi-pepeyee Həmɨnpwa a və ɓwaare ka waha dan ndaa dɨ mɨnagərən. 30Hwun myee aa Yawude, sə mgban kɨnɨnɨng a kwamətə hwunaa koddə le da Həmɨnpwa. Ɓəgəng nə hwuna shea luu purutɨ dan, gəkɨlə Yawude aa koddən. 31Sə mgban ɓəgəng Yawude aa koddə Həmɨnpwa, gə tən mgban təna ɗɨm wule purute Həmɨnpwa a ɗəwnə. 32Həmɨnpwa mɨndə ɓwaare ɓətɨ ji-gbərəwyi a vor ɗongə koddə le darən, gə nda ɗa purusərən kat.
Dyemshi ɓondi Həmɨnpwa
33Wule fukata Həmɨnpwa kat ka fyemtɨ dan,
wonə ɓa mbara?
Tamdə!
Wonə ɓa mba kuɓuktɨ lee shee ka lele dan?
Tamdə!
Wonə ɓa mba kanatɨ dan a leyə a bɨlda?
Tamdə!
Wonə ɓa mba təfəgye dan a leetɨrən?
Tamdə!
34“Wonə lee wule ɗyangale da Həmɨmiye Baata?
Tamdə!
Ɓə wonə nzə-shalale dan?
Tamdə!”#11.34 Naasə: Ishaya 40.13.
35“Nda mɨnə ɓwaara a ɗɨmə a və Həmɨnpwa,
gə Həmɨnpwa a mɨnan dən?
Tamdə!”#11.35 Naasə: Ayuba 41.11.
36Shee kat a vor vɨratə Həmɨnpwa nə ɗatɨrən,
dɨ hakan təna dɨma,
gə le dan,
hɨnggən nə mgban.
Fukatə kat hɨnggə Həmɨnpwa nə kaaru-kaaru!
Amin.
Currently Selected:
Romye 11: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
Romye 11
11
Mi Israila ɓyeləng Həmɨnpwa a kəpdərən
1Na ɗiyə atɨ ɓwaa, kwoti Həmɨnpwa a kwo myee dan ma? Ə'ə, aa sə gən nagi kəng-kəng. Hɨn ka nəna nzə-Israilati, nzə-jiyə Ibɨraim, dɨ kwirə jigenə Benjamin. 2Həmɨnpwa aa kwo myee dan 'ye nda leetɨrən kɨnɨnɨng. Hwuna ɗyanga ka ləməgyee Malɨmtɨ Ɗəmɗəmtə a boyə nə kpale Iliya, a ite nda tuwo a bɨlə Həmɨnpwa yedi-kɨttɨ dan a nə mi Israila atɨ, 3“Həmɨmiye, tən ɓəl kpalye dəw, tən ɓeegə kɨriye dəw. Gəngnə hɨnə mbiɗi hiɗə kal-kal, tənə dɨ ɓəri gə təna ɓɨlti mgban.”#11.3 Naasə: 1 Həmye 19.10. 4Shezə Həmɨnpwa a luwa a san, “Hɨnə ka ɓwaare haru bəw laka tukolukpe (7,000) a 'ye aa ndaga gyerə humwa pɨlaa mya wa atɨ Baal a kalan-gbəətə.”#11.4 Naasə: 1 Həmye 19.18. 5Sə mgban ɓəgəng imi nə də ɓyeləng, a myee Həmɨnpwa a kəpdərən, dɨ ha wuladəha dan. 6Gə dɨ ha wulahangɨn nə ɓəmbə Həmɨnpwa a dɨ nggɨl ɓwaara, aa gə lyente ɓwaara a ɗa. Gəkɨlə anda gə lyenta ɓwaara, angɨn taayə lə wuladəha də.
7Ɓə a shiya hɨm ɓa sam ka ləngɨn? Mi Israila 'ye dɨ ɨl Həmɨnpwa ka haɓye a hubotə, tənaa ɗɨmrən, shezə myee Həmɨnpwa a tattɨrən nə ɓəmbə ɗɨmrən. Mbiɗisərən mgban mya nyara hubosərən. 8Ɓətɨya mya doro atɨ,
“Həmɨnpwa a kipa kwa-hubosərən
ka səɗə-yedye darən kat,
təne ka dye,
tənaawa naa haa,
ka kwakye mgban tənaawa kɨl le,
baa dɨma a fəranə supo.”#11.8 Naasə: Gɨraha 29.4; Ishaya 29.10.
9Ɓətɨya həmɨn Dawuda a boyo atɨ,
“Naa sɨlangsətɨ darən mgban a gərən pengə
a tən ɓa kɨsə də,
nda gərən fara pawti a tən ɓa pawo nəngɨn,
Həmɨnpwa mgban a ɗarən səgbəɗye.
10Naa diingrən a vwotə,
gələ ɓe tənaa naa haa,
beesərən mgban a puwa
gələ ɓwatɨ tənətɨ darən kaaru-kaaru.”#11.10 Naasə: Dyemshe 69.22-23.
Myee aa Yawude ɓa ɗɨm mbətə
11Na ɗiyə atɨ ɓwaa, pawte Yawude a pawo, gə təna fokə a yerə ɓaa ma? Ə'ə, aa sə gən! Ɗongə koddə le darən nə ɗɨki mbəha a ɓə mɨna a haka myee aa Yawude. Gə-angɨn a və mi Israila jiwne, təna mɨna a haka Həmɨnpwa. 12Anda ɗongə koddə le da Yawude nə shi ka mi vɨratə ka shi-pepeyi gbakye, poritɨ darən mgban a shi ka myee aa Yawude ka shi-pepeyingɨn, ɓə ya Yawude aa dɨ ɗɨm shi-pepeyee gbaki pɨri anda tən mɨna a haka Həmɨnpwa tən dɨ katə?
13Hwun myee aa Yawude, hwunə na dɨ kənə. Gəkɨlə le dəwnə Həmɨnpwa a lyanari gə na gəwnə kpa-lagbe. Gə-angɨn a hake sə məndaranyi ka lyente Həmɨnpwa a vi. 14Ndəng dɨ ha lyente na dɨ ɗa a wakasəwnə angɨn ɓa ɗɨkdə myee de tən Yawude təna ɗa jiwne a mɨna, gə imi dɨ vorsərən a ɗɨm mbətə. 15Gəkɨlə ite Həmɨnpwa a kwotɨrən, mbiɗitɨ mi vɨratə a mɨna asɨ gəə tənə ndewogə Həmɨnpwa. Luute Həmɨnpwa ɓa mɨna luutɨrən ɓa gəə kwa-matti gə we ka myenti. 16Anda a gyengə dɨ sɨtɨ burodite mya kəpdə gə mya həmə Həmɨnpwa kaarə nee ɗəmɗəm, angɨn bɨlə atɨ burodite mbiɗi nee ɗəmɗəm kat. Anda kwirə kada mya kəpdən gə mya həmə Həmɨnpwa kan nee ɗəmɗəm, base kadangɨn mgban ɓa gə ɗəmɗəm.
17Anda mye ɓeegə base kadaa mya ngguɓo hwoɗye a dɨ mbwi, mya ɓaya base kadaa za a kaake a aawa mbwo a kpəkə sɨtɨ kadaa mya ngguɓo hwoɗye, hwun myee aa Yawude sə hwuna gə. Hwuna ɗɨmə a dɨ zɨmə ɓwaa ka sə dɨ sɨtɨ kadangɨn. 18Gə ləngɨn ɓe hwunaa məndaranye a nənəngəwnə, gəkɨlə a hwun ɗaasə, ɗyangam atɨ hwun base kada ɓəmbə, aa hwunə kworee kɨt kada nda ɓə kangə, kwirə kɨttəwnə. 19Ndəng a vorsəwnə, a hwun myee aa Yawude, imi ɓa luwa le a sa atɨ, “Kat ka angɨn, mye ɓeegə base kadaa mya ngguɓo hwoɗye na ɓə pɨrə dɨɓongɨn.” 20Diyalə sə gən. Mya ɓeegə base kadangɨn gə ɗongə mwadiyale, hɨnggəwnə hwuna mbiɗi a sɨtɨ kada gə mwadiyale dəwnə. Kat ka angɨn ɓe hwunaa nggur nəngəwnə kɨr-kɨr, ndɨka hwuna nza ka kala. 21Anda Həmɨnpwa aa ɗa purutɨ Yawude a tən myee tənə base kadaa kangə hwoɗye, sə mgban ndaa dɨ mbədəwnə.
22Namə wule ɓwaarawna Həmɨnpwa a gə kan ka wule ɗa sɨmwarashe dan. Nda duwa ɗa myee kworən sɨmwarashe, hwun mgban ndi ɓa bɨləwnə ɓwaarawne hwun kana pɨrə humwa ka bəə myentə a nə ɓwaarawne dan. Naasə hwun mgban ndi ɓa ɗawgəwnə gə sɨtɨ kada. 23Hye kana niyə mgban Yawude a mɨna asɨ mwaka Ma Həmɨnpwa a Yaɓwarən, Həmɨnpwa ɓa mɨna mɨndərən a hee nda ɗawgərən də, gəkɨlə sɨnee ka gətə nda mɨndərən a hengɨn. 24Gə-angɨn, hwun myee aa Yawude, hwunə ɓətɨ base kadaa za a kaake, mya ɓaya basengɨn a kpəkə sɨtɨ kadaa mya ngguɓo hwoɗye. Yawude mgban nə ɓətɨ kadaa mya ngguɓo hwoɗye, gə-angɨn mbak-mbak Həmɨnpwa ɓa mɨndərən tan-tan a doɓingrən a sɨtɨ kadaa mya ɗawgərən də.
Mi Israila ɓa ɗɨm mbətə
25Ji-nuwo, mwoshinə atɨ hwuna lee shee a haa ɓotə kɨnɨnɨng, gə ɓe hwunaa pɨrə ngguunə ɓaye. Imi dɨ vor mi Israila mya nyerədə hubosərən a tɨlə a haa baa a ɗɨkə myee aa Yawude a ɗɨmə a pɨra a haka Həmɨnpwa a vor furte kana. 26Angɨn nə ɓa ɗɨkə Həmɨnpwa a mbədə mi Israila, ɓətɨya mya doro atɨ,
“Nzə-mbəha ɓa dɨma dɨ vor Siyona,
ndi ɓa ngguro je da Yakubu
gə ɗongə kala Həmɨnpwa.”
27Sə mgban Həmɨnpwa a sa atɨ,
“Hɨn kana ngguro mi Israila gə səhase darən,
hɨn ɓa pɨrə kɨləsətə kaarən.”#11.27 Naasə: Ishaya 59.20,21; 27.9; Jerimaya 31.33,34.
28Sa pa ləmə feme da Həmɨnpwa, tən Yawude tənə ji-nyaagə Həmɨnpwa gə le dəwnə. Shezə Həmɨnpwa a mwotɨrən gə tatte nda tat yə jigərən. 29Gə shi-pepeyee Həmɨnpwa a və ɓwaare ka waha dan ndaa dɨ mɨnagərən. 30Hwun myee aa Yawude, sə mgban kɨnɨnɨng a kwamətə hwunaa koddə le da Həmɨnpwa. Ɓəgəng nə hwuna shea luu purutɨ dan, gəkɨlə Yawude aa koddən. 31Sə mgban ɓəgəng Yawude aa koddə Həmɨnpwa, gə tən mgban təna ɗɨm wule purute Həmɨnpwa a ɗəwnə. 32Həmɨnpwa mɨndə ɓwaare ɓətɨ ji-gbərəwyi a vor ɗongə koddə le darən, gə nda ɗa purusərən kat.
Dyemshi ɓondi Həmɨnpwa
33Wule fukata Həmɨnpwa kat ka fyemtɨ dan,
wonə ɓa mbara?
Tamdə!
Wonə ɓa mba kuɓuktɨ lee shee ka lele dan?
Tamdə!
Wonə ɓa mba kanatɨ dan a leyə a bɨlda?
Tamdə!
Wonə ɓa mba təfəgye dan a leetɨrən?
Tamdə!
34“Wonə lee wule ɗyangale da Həmɨmiye Baata?
Tamdə!
Ɓə wonə nzə-shalale dan?
Tamdə!”#11.34 Naasə: Ishaya 40.13.
35“Nda mɨnə ɓwaara a ɗɨmə a və Həmɨnpwa,
gə Həmɨnpwa a mɨnan dən?
Tamdə!”#11.35 Naasə: Ayuba 41.11.
36Shee kat a vor vɨratə Həmɨnpwa nə ɗatɨrən,
dɨ hakan təna dɨma,
gə le dan,
hɨnggən nə mgban.
Fukatə kat hɨnggə Həmɨnpwa nə kaaru-kaaru!
Amin.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.