Yohana 19
19
Mye vədə Yesu gə mya ɓɨdɨmdən
1Bilatus a ɗɨkdəha mya byeng Yesu. 2Ji-gyelmbutə a tak mbulo hwole. Təna kan rukutə həmna ka ɗuwo gaaɗətə, 3tən ta shea kopo humwasən mba-dɨ-mba a dɨttən ka kala-gbəətə atɨ, “Naa həmne a gɨrə kwe həme da Yawude!” Tən ta falagən.
4Bilatus a mɨna dɨmə haa bwange a sa Yawude atɨ, “Niyəm sɨnə hɨn ɓa dɨməwnə kan gə hwuna leyə atɨ taa pan ka a səhasə.” 5Ite Yesu a dɨma ka mbulo hwola a nəngɨn, ka ɓarawtɨ ɗuwo gaaɗəte mya kan, Bilatus a sarən, “Mangɨn nə.”
6Ite kɨsehəmi kpan-kpanye kat ka ji-ɓwesɨtə a nan, təna pukdə gəəshe kat atɨ, “A mya ɓɨdɨmdən a gbaltən!”
Bilatus a sarən atɨ, “Kɨsəmrən ka nənəngəwnə, hwuna gbaltən a kada ɓɨdɨmtə. Hɨnggi hɨn taa ɗɨmgən alə a nə kaadəha dəwnə.”
7Yawude a tyawala, “Hinə ka ɓashitɨ denə, ɓashitɨngɨn a sa atɨ, wule ma ɓətɨ a, ɓə kana mya ɓɨlə, gəkɨlə nda nggur nəngɨn atɨ sɨnə Nze da Həmɨnpwa.”
8Ite Bilatus a kɨl ləngɨn tee, kala a gən kɨr-kɨr, 9nda mɨna pɨrə voti a ɗiyə Yesu le atɨ, “Dɨ ndo haa hye dɨma?” Yesu aa wunakan. 10Bilatus a san atɨ, “Hye kwo byele ke, tee leyi atɨ hɨnə ka gətə na parəw hye muɗə, hɨnə mgban ka gətə na gbalta a nə kada ɓɨdɨmta?”
11Yesu a luwa a san, “Taa itɨ gəti kəw a na, pɨrgə ite mya vu dɨ pwa. Səngɨn nə ɗa səhase da ma vədi a hakəw pɨrgə hɨnggu.”
12Dɨ hangɨn Bilatus a ɓərə a ɨl kwatɨfe gə nda para Yesu. Yawude a mɨna maɗə ka gəəshe, tən ta ɗaw-kwaame atɨ, “Hye kana para ma nda muɗə, aa hyenə ndewogə Kaisar. Ma kat nggur nəngɨn atɨ ndi həmə, mangɨn nzə-nyaagə Kaisar həmə kpane nə.”
13Ite Bilatus a kɨl ləngɨn, nda dɨma ka Yesu a haa bwange, ndi Bilatus nda nza nə raame a nə ruutɨ ɓashitɨ dan a haa mya liɓa ka fare, ka kwa-Yawude mya wa atɨ Gabata. 14Fərəngɨn nə mya dɨ luwa sɨkwalə Lawuttə, fərə tufə bəti, fəre tɨla a nən.
Bilatus a sa Yawude atɨ, “Həme dəwnə nə.”
15Təna maddə gəəshe, “Muɗəm kan! Muɗəm kan! A mya ɓɨdɨmdən a gbaltən!”
Bilatus a ɗiyərən, “A na kɨt həme dəwnə a gbaltən?”
Kɨsehəmi kpan-kpanye a luwa a san atɨ, “Hin tamdə ka a həmə pɨrgə Kaisar.”
16A kpawtə kat, Bilatus a vərən Yesu gə təna gbaltən.
Mye ɓɨdɨmdə Yesu
(Matta 27.32-44; Markus 15.21-32; Luka 23.26-43)
Ji-gyelmbutə mgban a luu Yesu a kɨsə tɨfərən. 17Yesu a nggur kada ɓɨdɨmtɨ dan a dɨmə a muɗə haa mgbənga mya wa atɨ, “Kpəəkəne.” Ka kwa-Yawude sɨnə Golgota. 18A hangɨn təna ɓɨdɨmdə Yesu a gbaltən a nə kada ɓɨdɨmtə ka imi kpe, Yesu nə a wakasərən.
19Bilatus a ɗɨkə mya dorshe a galingaa dərən a nə kada ɓɨdɨmtə atɨ, “yesu a dɨ nazara, həme da yawude.” 20Ɓwaare furi-furi dɨ vor Yawude bəl shingɨn, gəkɨlə haa mya gbal Yesu də aa ɓongə ka vor vɨratə. Mya dorshingɨn ka kwa-Yawude ka kwa Romye ka hɨnggə Heline mgban. 21Kɨsehəmi kpan-kpanye a sa Bilatus atɨ, “Ɓe dori atɨ Həme da Yawude, dori atɨ mangɨn a nggur nəngɨn atɨ sɨnə Həme da Yawude.”
22Bilatus a sarən, “Sa na doro ɓə nzasə.”
23Ite ji-pakawatə a ɓɨdɨmdə Yesu a nə kada ɓɨdɨmtə, təna taka rukute dan fwat a ɓyanasə, nagi ndo ma a ɗɨmə hiɗə. Ɓarawtɨ votisə nə hiɗə, mya puktɨrə ɓətɨ dii-baasə.
24Təna boyəsə atɨ, “Ɓe myaa sararə, ndɨka mya pa-bara a nəngrə gə mya lee ma ɓa zɨmə a ngguro.”
Angɨn a ɗaasə gə la mya boyə vor Malɨmtɨ Ɗəmɗəmtə a naa atɨ,
“Təna taka ɓarawtɨ de a wakasərən
a pa-bara a nə sɨɓwetɨ de.”#19.24 Naasə: Dyemshe 22.18.
Sa ji-pakawatə a ɗa nee.
25Gbyel ka kada ɓɨdɨmta Yesu, yə nuwogən ka mwafɨrə ɗɨkənə Maryamu metɨ Kɨlopas, ka Maryamu dɨ Magdala nee kangə hangɨn. 26Ite Yesu a naa nuwogən a hangɨn ka lagba dan a nda dɨ mworən gbyel kaarə, nda sa nuwogən atɨ, “Nuwo, nzanga nee,” 27nda sa lagbangɨn mgban atɨ, “Nuwogu nee.” Dɨ hangɨn, lagbangɨn a muɗə ka nuwogə Yesu a hwodan.
We da Yesu
(Matta 27.45-56; Markus 15.33-41; Luka 23.44-49)
28Beetɨ lanə kat, Yesu leyə atɨ nagi ndo sə mbəə. Gə ləməgyee mya boyə vor Malɨmtɨ Ɗəmɗəmtə a naa, nda sa atɨ, “Wor-haɓye nee gi.”#19.28 Naasə: Dyemshe 69.21. 29Kyeɗəwtɨ vwo gbaange nee kangə hangɨn gbyel. Təna ɓwe sɨbaashe a kwaamɨ kada hisoptə, a shipdən a vor vwongɨn a ɗifə Yesu a kwaamɨngɨn. 30Ite Yesu a kɨla haɓingɨn, nda sa atɨ, “Ɓə mbəə.” Ndi ɓe boyo sə nda kpala a ɗaka pisən.
31Fərəngɨn fərə luwa kwalə Lawutti, haa kana kɨɗa, sɨnə fərə piyatɨ da Yawude mgban. Yawude aa mwo atɨ wogingɨn a gə nə kada ɓɨdɨmtə a fərə piyatə, gə-angɨn təna nyisə Bilatus atɨ a mya mwarən təna ɓeegə mbwayi myee mya ɓɨdɨmdərən gə təna mbərə mya jengdə wogingrən a njiya. 32Ji-gyelmbutə a shi a dɨ ɓeegə mbwayi ma kwaməte mya ɓɨdɨmdə Yesu ɓwaa kan, təna mɨna lawuɗə a dɨ ɓeegə mbwayi ma kpeyətə. 33Na ite təna shi ɓa ɓeegə mbwayi Yesu, təna niyə ɓə mbɨrə, gə ləngɨn tənaa ɓeegə mbwayingɨn. 34Ama hiɗə dɨ vor ji-pakawatə a zub Yesu ka suɗe a pɨra-gyengəngɨn, haɓye kat ka zaambe a kwaɗa ɓoke a shaara. 35Ma naa ləngɨn nə takale sə, takale dan mgban diyalə. Mangɨn leyə atɨ diyalə nda boyo. Nda takale sə gə hwun mgban hwuna mwadiyale. 36Shingɨn a ɗaasə gə ləməgyee mya boyə vor Malɨmtɨ Ɗəmɗəmtə a naa atɨ, “Taa hiɗə dɨ vor oolingɨn ɓa ɓiyə.”#19.36 Naasə: Dɨmatə 12.46; Bəlha 9.12; Dyemshe 34.20. 37Mya mɨna doro a haa a vor Malɨmtɨ Ɗəmɗəmtə atɨ, “Tən ɓa niyə a naa ma təna zubrən.”#19.37 Naasə: Zakariya 12.10.
Mye ɗɨk wo Yesu
38A beetɨ shee ɗa kat, ama nee də mya wa atɨ Yusufu dɨ vɨra Aramatiya a dɨ koɗə Yesu a haa ɓotə gəkɨlə kalaa Yawude a dɨ gən, nda shi a nyisə Bilatus atɨ a mya ɗakan a we ndi ɓa ɗɨkə. Ite Bilatus a mwan, Yusufu asɨ nggur wo Yesu. 39Nikodimuste shi haka Yesu ka tukotə, a shi ka humbo kade mərtə ka pomə ɨhɨng-ɨhɨnge kaɓa kpan gə təna bəsə wo Yesu. Nda raadə Yusufu təna zə. 40Təna ngguragə sɨtɨ Yesu a bəsən shi ɨhɨng-ɨhɨngye a takə ka foowe ɓətɨya Yawude a dɨ ɗɨk we darən. 41Gbyel a haa mya ɓɨdɨmdə Yesu də, kaanda nee də, a vor kaandangɨn taanə wela mya ɗa a gonggoro fara nee də a myaa ndaga ɗɨk we a vorsən. 42Gəkɨlə fərə luwa kwalə Lawutti, təna lərə a ɗɨkdə wo Yesu a taanəngɨn gə sɨne gbyel ka hangɨn.
Currently Selected:
Yohana 19: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
