Lyenta 4
4
Bitrus ka Yohana a humwa ji-shalale
1Ite yə Bitrus ka Yohana nee dɨ byeli ka ɓwaare, kɨsehəmye ka gyana da ji-pakawate dɨ gɨra Shafe kat ka Saduke a paya a shi hakarən. 2Təna pɨra ka yedi-kɨttə kɨr-kɨr gəkɨlə kpe-lagbe da Yesu a dɨ kənə ɓwaare shee a nə mattə gə we ka myentə, tən kana mbərə dɨ ha mwadiyale ka Yesu. 3Mya kər yə Bitrus ka Yohana a ɗɨkə vɨnə gbərəwe gə kaade ɗa, təna bədə baa haa kɨɗa. 4Hananang dɨ vor myee sardə kwakingrən kɨl le da Həmɨnpwa a mwadiyale, furo morye a vor ji-kottə tɨl haru bəwtə tuf.
5Ite haa kɨɗa, ji-shalale da Yawude ka mi kpan-kpanye darən, kat ka ji-lee kəndə ɓashita Musa a peyə vor Urshelima. 6A vor myee paya, ndi Anas makpane da kɨsehəmye a iira dɨmgə lyentə, ɗɨkənə Kayafas,#4.6 Kayafas nə makpane da kɨsehəme a hwoɗye. Yohana ka Alezanda, kat ka mbiɗitɨ myee nza vor hwoda Kayafas. 7Təna shea pɨradə Bitrus ka Yohana, a kangdərən a humwaasərən kat, təna tiya ɗitə ɗiyərən ləməgye atɨ, “Ya hwuna ɗa, hwuna ɓə gwadə manə, ka ndo kwakə ka mɨni ndo wule gəti hwuna ɗa shingɨn?”
8Də Pitɨ Ɗəmɗəmtə a naadə hubə Bitrus ka gətə, nda sarən atɨ, “Hwun ji-shalale da Yawude, kat ka mi kpan-kpanye! 9Mye kana ɗiyenə le supo a nə səfema mya ɗa gbəgəra, ka ɗate mya ɗa nda ɓə nyerə a gə dwat, 10hwun mi kpan-kpanye kat ka myee a vor Israila leyəm supo atɨ, a vor kwakɨ Yesu Ma Həmɨnpwa a Yaɓwarən a dɨ vɨra Nazarat, a ma hwuna gbaltən a nə kada ɓɨdɨmtə. Sɨnə ma mgban Həmɨnpwa a maddən gə we ka myentə. A vor kwakɨ Yesu tɨngɨn nə gbəgəra a maɗə a kangə humwasəwnə ganə dwat. 11Sɨnə
“ ‘Fara hwun ji-nwoshe a kworən,
sɨnə mya shea kwak mgba-vɨne kan.’#4.11 Naasə: Dyemshe 118.22.
12Taa a Nzə-mbəha də som a a haa, gəkɨlə taa a kwakə də ganə a vor vɨratə a ɓwaare ɓa wadən a ɗɨm mbətə, pɨrgə kwakɨ Yesu.”
13Ite ji-shalale da Yawude 'ye peyi kat a naa mwamdiya ka gbənzɨmta Bitrus ka Yohana, təna niyə tən kpenəwyi, aa ji-leeshi twayi, təna ɗyanga atɨ təne ɓwaa ka Yesu kɨnɨnɨng. 14Ji-shalaləngɨn aa yə lee sa tən ɓa boyə nəngrən, gəkɨlə ndi gbəgəra yə Bitrus ka Yohana a gwadən nee kangə hakarən. 15Gə-angɨn təna ɗɨkdə yə Bitrus ka Yohana atɨ a təna dɨmə haa bwange a tərən haa gə təna ɗɨmə a shalale a nə ləməgingɨn. 16Ji-shalaləngɨn a ɗiyəsə atɨ, “Ɓə ya mya ɗam ka myee? Gəkɨlə ɓwaare kat a vor Urshelima leyə atɨ tən ɗa kaɓa səkushipe, taa ndəng ma də ɓa məntəmə ləngɨn. 17Gə-angɨn a ləngɨn a mbaate, ɓe ndaa pɨrə kwaki imi.” Təna boyəsə atɨ ndɨka mya watɨrən a fyel-kwakingrən atɨ ɓe tənaa yə pɨrə humwa ta bwe le a mbəgə hee a nə kwaka.
18Təna wagatɨrən a fyel-kwakingrən atɨ ɓe tənaa yə bwe le a kəndəshe a vor kwakɨ Yesu. 19Də Bitrus ka Yohana a luwa a sarən atɨ, “Hwuna nidə ləngɨn, hwun ka nənəngəwnə, anda sɨne pepe a haka Həmɨnpwa atɨ hina ɗaka kanatɨ dan a koɗə hɨnggəwnə. 20Gə hinaa dɨ ɗaka bwe le a nə sa hina nan ka la hina kɨlə dɨ haka Yesu.”
21Ite ji-shalaləngɨn a mɨna gɨratɨrən a fyel-kwakingrən a nyakarən kɨr-kɨr, təna ɗakarən təna muɗə. Tənaa le wule sɨgbəɗye tən ɓa ɗarən, gəkɨlə ɓwaare kat nee dɨ ɓondi Həmɨnpwa gə səkushipa təna nan.
22Ndi gbəgəra mya gwadən nda maɗə dwat, kyawasən pɨrgə bəwtə fwat.
Hiwta ji-kottə
23Ite mya ɗaka yə Bitrus ka Yohana təna mɨnə haka mbiɗitɨ ji-kottə a boyərən ləməgyee kɨsehəmi kpan-kpanye ka mi kpan-kpanye da Yawude a boyərən. 24Ite ji-kottɨngɨn a kɨl ləməgingɨn kat, təna maddə kormingrən a kwa-hiɗə a ɗa Həmɨnpwa hiwtə, təna sa atɨ, “Hye Həmɨnpwa, magbake kat. Hye ma ɗa pwa ka njiya, ka gbɨnuwtɨ sɨkorən ka shee a vorsərən kat. 25Hyenə bwe le dɨ haka Pitɨ Ɗəmɗəmtə dɨ kwaamɨ kɨsa dəw baagenə Dawuda atɨ,
“ ‘Mɨnə ɗa mi vɨratə a ɗa muune,
ɓwaare mgban a pedə kwaamə ɓaye?
26Həmi vɨratə a ɓwesɨtə a kangə,
mi kpan-kpani vɨratə mgban a pedə nəngrən,
a ndɨlka Həmɨnpwa
ka ndi Ma dan a mya Yaɓwarən.’#4.26 Naasə: Dyemshe 2.1,2.
27Diyalə yə Hiridus ka Pontus Bilatus a pedə nəngrən Urshelima ka ɓwaare dɨ hee som-som kat ka mi Israila gə təna ndɨlka kɨsa dəw Ma ɗəmɗəme Yesu, ndi ma hye yaɓwarən. 28Soɓo sa hye Həmɨnpwa hye dɨ mwo atɨ hye ɗarən kɨnɨnɨng a vor gətɨ dəw ka mwosa, sɨnə sa mingɨn a ɗa ɗate. 29Gəngnə, Həmɨmiye Baatə, zə niyi naa ndɨlte mingɨn a ndɨlə nəngenə ka nyatə. Hinə dɨ nyisu, hye gwadə kɨse dəw gə təna mwamdiya a kangə dwat a bwe ləməgye dəw ka gbənzɨmtə. 30Zə ɗifadə tɨfanga ka gətɨ dəw. Hye maddə ji-ootə, hye ɗa səkushipe ka sɨndəle a vor kwakɨ kɨsa dəw Yesu Ma ɗəmɗəme.”
31Ite təna ɗa hiwtə a mbəə, haa təna peyə də a dɨ hiwo, njiya hangɨn a humuro. Mya naadərən kat ka Pitɨ Ɗəmɗəmtə, təna tiya bwe ləməgye da Həmɨnpwa ka gbənzɨmtə taa kala də.
Ji-kottə a ɓyanasə shee darən
32Ji-kottə kat a peyə a kətsə ka hubosərən hiɗə, taa ma də kɨt sə nənəngɨn dɨsərən, təna pedə shee darən kat ta ɓyanasə. 33Kpe-lagbe da Yesu a pɨrə humwa ka gətə, tən ta bɨlə ɓwaare ta takale a nə mattə da Yesu Həmɨmiye gə we ka myentə, wuladəha da Həmɨnpwa nee ɓwaa kaarən kat. 34Taa ndəng ma ɗongə asə a vor ji-kottɨngɨn kat, gəkɨlə myee ka gaashe, myee mgban ka hwoɗye a vor ji-kottɨngɨn a ɗərdərən a paya taangɨn a shikan 35asɨ pukdən a humwa kpe-lagbe da Yesu, təna gwadə myee taa asə kaarən.
36Ama nee də mya wa atɨ Yusufu, sɨnə dɨ kwirə mi Levi, sɨnə dɨ vɨrate mya wa atɨ luutɨ Sepɨrus, kpe-lagbe a dɨ warən atɨ Barnabas, naarə kwakɨngɨn nə, ma dɨ gwadəha ka nyerədə ɓwaare. 37Nda ɗərdə gaashe dan a shi ka taangɨn a pukə humwa kpe-lagbengɨn.
Currently Selected:
Lyenta 4: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
