Lyenta 3
3
Bitrus a gwadə a gbəgərə
1A fərə yə Bitrus ka Yohana nee dɨ muɗə Shafe, a ite ɓwaare a dɨ ɗa hiwtə, itɨngɨn mgban mbwayi fəre mwaakɨntɨ fəre. 2Ite təna tɨla gbyel ka Kwa-Shafe, dɨ kwatɨfa mya wa atɨ Kwatɨfə Wulatə, təna pa ama də a mya duwa nzadən a hangɨn fərə-fərə gəkɨlə nda nyisə myee dɨ pɨrə Kwa-Shafe taa, mangɨn gbəgərə dɨ mwasasən. 3Ite gbəgərəngɨn a naa Bitrus ka Yohana dɨ pɨra a vor Shafe, nda nyisərən taa. 4Bitrus ka Yohana a nidə mangɨn kpəkəkə. Bitrus a san, “Nidenə.” 5Mangɨn a kpəkərən diingɨn, sɨne dɨ kana atɨ ndi ɓa ɗɨm asə dɨ hakarən.
6Bitrus a san, “Hɨn tam ka nggɨrngɨme, nagi dyamsə, sa na gə kan sɨnə hɨn ɓa vu. A vor kwakɨ Yesu Ma Həmɨnpwa a Yaɓwarən a dɨ vɨra Nazarat, maɗi woyi.” 7Bitrus a kɨt tɨfə zɨməngə mangɨn a gwadən nda maɗə, tee gbyel a hangɨn gbalte mbwayingɨn a pərətə, a təɗə dwat. 8Nda bɨrpə a maɗə a kangə nə mbwayingɨn a tiya wetə. Nda pɨrə Kwa-Shafe ka yə Bitrus ka Yohana, ndi ta woyi a leyə pwa ta ɓondi Həmɨnpwa. 9Ite ɓwaare kat a nan dɨ woyi, dɨ ɓondi Həmɨnpwa, 10təna niyə a leerən atɨ sɨnə gbəgəra dɨ nza nyitshe a Shafe, a haa mya wa atɨ Kwatɨfə Wulatə. Ɓwaare a ndələ ka ləngɨn kɨr-kɨr ka ɗate nda ɗa nda ɓə nyerə a dɨ woyə.
Bitrus a byelə ka ɓwaare
11Ndi gbəgərəngɨn, nda kpəkə sɨtɨ yə Bitrus ka Yohana, ɓwaare a ndələ ka ləngɨn kɨr-kɨr, təna gyaɓa a shi hangɨn, a haa mya wa atɨ Kwakra da Solomon. 12Ite Bitrus ɓe naa ləngɨn, nda sa ɓwaare atɨ, “Mi Israila, ɓə ya ləngɨn a dɨ vəwnə ndəle ya? Mɨnə ɗa hwuna pukenə dye ɓətɨ ka gətɨ denə, naasə mgban gə nzaa pepetɨ denə hina maddə ma nda dɨ woya? 13Həmɨnpwata Ibɨraim ka Ishaku ka Yakubu, Həmɨnpwata yə sɨnggəm, sɨnə ndukodə kɨsa dan Yesu. A Yesu a hwuna vədən gə mya ɓɨltən, sɨnə mgban hwuna kaadən a humwa Bilatus, nagiya Bilatus a mwo atɨ nda paran. 14Hwuna kwo Ma ɗəmɗəme a Ma pepeye. Hwuna shea sa atɨ a mya parəwnə a nzə-ɓəl wogi. 15Hwuna ɓɨl Həmɨ myentə, kat ka angɨn Həmɨnpwa a maddən gə we ka myentə. Hin dɨ kpeyə hin ji-takalə a nə ləngɨn diyalə, sə gən. 16Dɨ ha mwadiyale ka kwakɨ Yesu ndi ma hwuna nan nate a ɗɨm nyerətə, giɓə hwun leerən. Kwakɨ Yesu nə ɓəmbə ka mwadiyala Yesu a vən nə ɗɨki nda ɗɨm nyerətə twa ɓətɨ hwuna dɨ nan.
17“Ji-nuwo, hɨn leyə atɨ shi hashe hwuna ɗa, hwuna ɗatɨrən a vor ɗongə leetə, ɓətɨ mi kpan-kpanye dəwnə a ɗa. 18Shezə yang Həmɨnpwa a naadə ləməgyee nda boyo kɨnɨnɨng dɨ kwaamɨ kpalye dan atɨ Ma Həmɨnpwa a Yaɓwarən ɓa sop tənətə. 19Gə-angɨn, zə porom-njiya, viriwam a haka Həmɨnpwa gə mya suɓownə gə səhase dəwnə. 20Gə hwuna ɗɨm nzatɨ hweltə dɨ haka Həmɨnpwa, nda mɨna lyanəwnə də Ma Həmɨnpwa a Yaɓwarən a ma mya vədən gə le dəwnə ndi Yesu. 21Mbak-mbak Yesu ɓa nza pwa baa Həmɨnpwa a ɗadə shee kat a mɨndərən təna gəə i hweli ɓətɨ Həmɨnpwa a boyo dɨ kwaamɨ kpali ɗəmɗəmye dan kɨnɨnɨng. 22Ndi Musa ka nənəngɨn, nda bwe le atɨ, ‘Həmɨmiye Həmɨnpwatɨ dəwnə ɓa nggɨl a kpalə ɓətɨ hɨn, dɨ wakasəwnə ndi ɓa nggɨl mangɨn, hwuna sardə kwakingəwnə ka ləməgyee ndi ɓawa boyownə. 23Ma kat aa sardə kwakingɨn a ləməgye dan, mye ɓa omrən gə waka myee da Həmɨnpwa.’#3.23 Naasə: Gɨraha 18.15,18,19.
24“A vor nzata kpalye kat, dɨ nzata kpale Samaila, kat ka mbiɗitɨ kpalye kwaɗa beesən, tən kpalə bwe le a nə nzatɨnə. 25Hwunə je da kpalingɨn, hwune mgban a vor kɨləsəte Həmɨnpwa a kɨləsə ka yə sɨnggəwnə. Nda sa Ibɨraim atɨ, ‘Dɨ kwiranga hɨn ɓa wula ka mi vɨratə kat.’#3.25 Naasə: Tiyatə 22.18; 26.4. 26Ite Həmɨnpwa a maddə kɨsa dan, hwunə mi kwaməte kɨsa dan a zə hakəwnə, gə nda wulakəwnə, dɨ ha viriwadə nagi ndo ma a vorsəwnə nda ɗaka səhase.”
Currently Selected:
Lyenta 3: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
