Lyenta 22

1“Hwun yə baagi ka hwun mbiɗitɨ myee de kat, samdə kwakingəwnə kɨləm ləməgye na boyo gə na dɨm na a bɨləwnə diyalə la də, gə hwuna leyə atɨ taa ɗa ndəng asə hashi-hashi.” 2Ite təna kɨlan dɨ bwe le ka kwa-Yawude, haa talə shetətət.

Bulus a sarən atɨ, 3“Hɨn Yawuda, mya mwasari a vor vɨra Tarsus, a njiya Silisiya, ganə a vor vɨratɨnə na maɗə. Na ɗyegənshe a hakan ndi makpanə nzə-kəndəshe Gamaliyel. Sə mgban mya kəni ɓashita yə sɨnggəm pepe a ite na dɨ koddə ka hɨmnə Həmɨnpwa ka kalangɨn a huboshi, ɓətɨ hwuna dɨ ɗa ɓəgəng. 4Na tənədə myee dɨ koɗə Tɨfe, imi a mbərə vor tənətɨngɨn, sə mgban na ɗɨkdəha mya kəttɨrən morye ka mandye a ɗɨkə vɨnə gbərəwe. 5Ndi Kɨsahəmə kpane ka mbiɗitɨ ji-shalale kat leyə atɨ diyalə na dɨ boyo. Tənə mgban vi malɨmyee təna doro gələ na zə kaarən a Damaska a və ji-nuwote a hangɨn. Na luu malɨmingɨn a zə kaarən a vor Damaska gə na kasa ji-kottə a shikarən a Urshelima, gə petɨ ji-shalale a ɗarən sɨgbəɗye.

6“Ite hɨne a nə tɨfe, hɨn shi gbyel ka Damaska, ka fəre a nən, a hangɨn ɗəng ɓɨrtə a nzaa dɨma dɨ pwa, a wuɗila mbarang a takadi. 7Na fukə njiya, na kɨla korme dɨ se atɨ, ‘Shawulu, Shawulu! Mɨnə ɗa hye ɓə dɨ tənəə di?’

8“Na ɗi le atɨ, ‘Makpane, hyenə wonə yə?’

“Nda luwa a se atɨ, ‘Hɨnə Yesu dɨ Nazarat, hɨnə hye dɨ tənəə di.’ 9Myee hina dɨ omo kaarən a naa ɓɨrtə, tənaa lee kormɨ ma dɨ byeli ke.

10“Na ɗi le atɨ, ‘Həmɨmiye, ɓə mɨnə hɨn ɓa ɗa yə?’

“Nda se atɨ, ‘Zə maɗi pɨrə vor Damaska, mye ɓa boyu sa hye ɓa ɗa.’ 11Də myee hina zə kaarən a kɨshi kada a zə ke a vor Damaska gəkɨlə na welə hangɨn gə ɓɨrte wuɗila kɨr-kɨr.

12“Ama mya wa atɨ Hananiya a shi hake ɓa nee. Ndi mgban nda dɨ koddə hiwatə ka hubosən hiɗə, mbiɗitɨ Yawudee nza vor Damaska kat a dɨ ndukodən. 13Ndi Hananiya, nda shi a kangə hake, nda se atɨ, ‘Nzə-nuwo Shawulu, naa diinga a wonə.’ Də a hangɨn gbyel dii a wonə, na nan.

14“Hananiya a se atɨ, ‘Həmɨnpwata yə sɨnggəm, sɨnə nggɨlta gə hye lee kanatɨ dan, hye naa Ma pepeye da Həmɨnpwa a kɨl ləməgye dɨ kwaamɨngɨn. 15Hyenə ɓa gəə nzə-takale dan a haka ɓwaare kat, hye ɓa bɨlərən shee hye naarən ka ləməgyee hye kɨlə. 16Ɓə mɨnə hye nza a dɨ kula? Maɗi kanyi mye ɓa ɗəw batisɨmatə a nggurugə səhase dəw, dɨ vor kwakɨngɨn.’

17“Ite na mɨna ganə a vor Urshelima, itɨngɨn hɨne a vor Shafe dɨ ɗa hiwtə, mya wuni diya, 18də na naa Həmɨmiye sɨne dɨ byeli ke atɨ, ‘Maɗi tan-tan dɨmgə vor Urshelima ɓəgəng, gəkɨlə tənaa dɨ luu ləməgyee hye ɓa boyə na.’

19“Na luwa a san, ‘Həmɨmiye, minə ganə kat tən leyə atɨ na dɨ woyo a pɨrə vəni kəndəshe hananang gə na kasa myee mwakəw a ɗɨkə vɨnə gbərəwe, imi mgban na dɨ byengə. 20Ite mya ɓɨl nzə-takale dəw Istifanus, hɨnə ka nəna kanyi dɨ nidə rokotye da myee kalarən ka fare ɓɨli, gə na bɨldə sate atɨ hɨn mwaka sa təna dɨ ɗa.’

21“Həmɨmiye a luwa a se atɨ, ‘Muɗi hɨn ɓa lyenta ɓong-ɓong a haka mbiɗitɨ ɓwaare, a tən myee aa Yawude.’ ”

Bulus nzə-njiya Romati

22Ɓwaaree kanyi hananang kat a sardə kwakingrən a kɨl ləməgye Bulus a boyə kat. Də təna ɓə shea maddə kormingrən a gəəshe atɨ, “Dɨməm kan aa kana nda nza vɨratə, wule ma aa kana nda mbə!”

23Ite təne dɨ gəə gaawe dɨ ledə sɨɓwetɨ darən a hawe ka maddə bɨr-bɨre a pwa, 24gyana kpane a boyə ji-pakawatɨ dan atɨ ma təna pɨrə ka Bulus a vor lure da ji-pakawatə a byengrən a ɗiyən le gə nda bwe sa ɗa ɓwaare a ɓə dɨ gəəshe ka gaawe kɨr-kɨrte a nəngɨn. 25Ite təna ɓwerən ɓa byengrən, Bulus a ɗiyə gyana nyate kangə hangɨn atɨ, “Ɓashitə mwow atɨ hye byeng nzə-njiya Romata, a ma ɓashitə aa nda lɨbadən?”

26Gyana nyatɨngɨn ɓe kɨlə she, nda mɨnə haka gyana kpane darən a ɗiyən atɨ, “Mɨnə hye ɓa ɗa gəngna? Manə nzə-njiya Romati.”

27Gyanangɨn a zə haka Bulus, nda ɗiyən atɨ, “Boyi pee, hye nzə-njiya Romati ma?”

Bulus a luwa a san atɨ, “Bwesən nə, hɨn nzə-njiya Romati.”

28Gyana kpane a sa Bulus atɨ, “Ɗərə na ɗərə ka taa kaɓa kpan na ɓə gəə nzə-njiya Romati.”

Bulus a luwa a san atɨ, “Hɨn hɨnggi mwasa njiya Romati.”

29Ite myee shi ɓa byeng Bulus a ɗiyən ləməgye ɓe kɨləte, təna gə sə kat. Ndi gyanangɨn kala a gən mgban, gəkɨlə ɓə ɓwe Bulus ka malye mbəə, a wule sa myaawa ɗa nzə-njiya Romatə.

Bulus a kangə humwa ji-shalale da Yawude

30Ndi gyana kpane nda dɨ mwo atɨ nda lee mgbaalə sa ɗɨki Yawude a ɓə dɨ ɗɨkə Bulus le. Səngɨn nə ɗa ite haa kɨɗa nda dɨmaadə Bulus a haa bwange. Nda waga kɨsehəmi kpan-kpanye ka mbiɗitɨ ji-shalale gə təna peyə kat. Nda shi ka Bulus a kangdən a humwaasərən kat.

Currently Selected:

Lyenta 22: bcy

Highlight

Copy

Compare