Lyenta 11
11
Bulus a boyə ji-kotte a Urshelima shee nda ɗa
1Kpe-lagbe ka mbiɗitɨ ji-kotte a vor njiya Yawudiya a kɨlə atɨ imi myee aa Yawude luu le da Həmɨnpwa. 2Ite Bitrus a wudə vor Urshelima, Yawudee ji-kotti a nyerədə ləmə lakəwne a ndɨlka Bitrus ka sharha, 3təna san atɨ, “Hye wudə hwoda myee aa Yawude a myee myaa jengdərən a lakəwne a zɨmshe kaarən.”
4Bitrus a nggura lə sa ɗa dɨ tiyatə, nda boyərən hyeɗə-hyeɗə a muɗa ɗɨka kat, ɓətɨya ləngɨn a ɗa. 5“Ite hɨne a vor vɨra Jopa dɨ ɗa hiwtə, Həmɨnpwa a wuni diya. Na naa asə ɓətɨ kaɓa baasə kpanə, mye kər gyengi baasəngɨn dɨ fwaɗə a dɨ jangadən dɨ vor pwa, baa nda sɨ kangə hake. 6Na niyə vorsən kpəkəkə, na naa sɨgɨrtə, i mbwayi fwaɗye kat ka i kaake peyi ka ji-fow yedye ka ɓakarye. 7Də na kɨla korme dɨ se atɨ, ‘Bitrus, zə maɗi, hye kɨsə a ɓɨlə a zɨmə.’
8“Na luwa a sa, ‘Həmɨmiye, taa dɨ ɗa wule a nagi ɓyeləng, gə taa nda ga zɨm asə a sa takɨm, wule shingɨn aa ndaga pɨrə kwaama.’
9“Korma na kɨlan dɨ dɨma dɨ pwa, a mɨn kpeyə byele, a se atɨ, ‘Sa kat Həmɨnpwa mɨndən nda gə shet-shet, ɓe sa ka səngɨn atɨ ndi takɨm.’ 10Angɨn a ɗa a laka mwaakɨn na kɨla kormɨngɨn, beetɨ angɨn mya nggəlgə baasəngɨn a nggɨrə kan a vor pwa.
11“Aa ɓongə də i moryi mwaakɨn 'ye mya lyana dɨ Kesariya a hake a tɨla asɨ kangə kwatɨfə hwoɗyee na janga də. 12Pitɨ Ɗəmɗəmtə a se atɨ, ‘Ɓe badə mgbaanga, maɗi parən hwuna wudə.’ Ji-kottɨnə tukoltaka dɨ vor Jopa təna kwaɗe, hina zə a pɨrə vor hwoda mangɨn. 13Ndi mgban nda boyenə lə diya mya wunən nda naa malyene da Həmɨnpwa, ka la malyene a boyən atɨ, ‘Lyenshe a vor vɨra Jopa mya wa Siman a mya dɨ wa atɨ Bitrus nda shi. 14Ndi ɓa shikəw ka ləməgyee ɓa vu mbətə hye kat ka mi hwodəw.’
15“Ite na tiya byele, Pitɨ Ɗəmɗəmtə a janga a nəngrən kat, ɓətɨ ngga janga a nəngəm a kwamətə. 16Də na ɗyanga ka la Həmɨmiye a boyo atɨ, ‘Yohana a ɗa ɓwaare batisɨmatə ka haɓye, hɨnggəwnə hwun, mya ɗəwnə batisɨmatə ka Pitɨ Ɗəmɗəmtə.’ 17Anda Həmɨnpwa ɓa vərən həmtɨngɨn ɓətɨ nda vəm ite hɨm a mwam ka Həmɨmiye Yesu Ma Həmɨnpwa a Yaɓwarən, hɨnə pɨri wonə na kərdə sa Həmɨnpwa a kana ɓa ɗa?”
18Ite təna kɨl ləməgyee Bitrus a boyərən, təna ɗaka byela təna dɨ byelən. Təna ɓondi Həmɨnpwa a sa atɨ, “Həmɨnpwa və myee aa Yawude humwatə mgban gə təna por-njiya a ɗɨm mbətə.”
Ji-kottɨ Antiyok
19A ite ji-kottə a gyeɓə a gbərə gəkɨlə tənəte pɨra kaarən a ite mya ɓɨl Istifanus, təna gyeɓə a mbəgə hee som-som. Imi a muɗə ɓong-ɓong baa njiya Finikiya ka luutɨ Sepɨrus, imi mgban dɨ vɨra Antiyok. Təna pɨrə humwa ta hiwa ka ləmə feme da Yesu a haka Yawude ɓəmbə. 20Imi mgban dɨ vor ji-kotte dɨ luutɨ Sepɨrus ka njiya Sireni a dɨmə a wudə vɨra Antiyok, a tiya bwetə boyə Heline le mgban a nə lə mbəha da Yesu, ndi Həmɨmiye. 21Gəta Həmɨnpwa a gwadə ji-kottɨngɨn, ɓwaare furi-furi a mwadiyale a virwa a vədə nəngrən a haka Həmɨmiye.
22Ite mi kpan-kpani ji-kotte a vor Urshelima a kɨl lə lyenta Həmɨnpwa a vor vɨra Antiyok, təna lyen Barnabas a hangɨn. 23Ite Barnabas a tɨlə a naa wuladəha da Həmɨnpwa, haa nɨngən nda boyərən le a nyerədərən gə təna kangə tɨfe da Həmɨmiye ka hubosərən hiɗə. 24Ndi Barnabas ma tikɨsə, sɨne naa ka Pitɨ Ɗəmɗəmtə ka mwadiyale kan. Ɓwaare hananang a virwo haka Həmɨmiye, ji-kottə a furo.
25Barnabas a dɨmə a wudə vor vɨra Tarsus ta woyi a ɨl Shawulu. 26Ite nda nan, nda zəkan a vor Antiyok. Barnabas ka Shawulu a peyə a ɗa lyentə kiwatə hiɗə a waka ji-kotte a vor Antiyok, təna kənə ɓwaare hananang shee a hangɨn. A vor Antiyok mya tiya watə wa ji-kottə atɨ, myee da Kɨristi.
27A vor bətɨngɨn, i kpali da Həmɨnpwa a shi vor vɨra Antiyok dɨ Urshelima. 28Ama hiɗə dɨ vor kpalingɨn, kwakɨngɨn nə Agabus. Pitɨ Ɗəmɗəmtə a byelə kan, nda maɗə a kangə waka ji-kottə a kpalə atɨ, myatɨ kpantə nə ɓa fuka a nggur bətɨ njiya Roma kat. (Myatɨngɨn mgban a fuka a nzata həmə kpanə Roma ndi Kɨlawdiyus Kaisar.) 29Ji-kottə kat a kɨləsə a mwasə atɨ, nagi ndo ma a vədə həmtə kana ka maasəngɨn gə təna gwadə ji-kotte a vor njiya Yawudiya. 30Sə mgban təna ɗa, təna kɨddə taangɨn a haka mi kpan-kpani vɨnə hiwta ji-kotte a Urshelima dɨ tɨfə Barnabas ka Shawulu.
Currently Selected:
Lyenta 11: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
