Romo 7
7
Repaalu aeme eina angele lea ei
1Nina amenuo, neme ambia go lalo angelere nimi ande rudule angele kone ambala wimi repaa nimi repara lalo. Ali na-kome pa alianda komea go rudule angeleme nipu pa surumbelea. Nina kone sialopare go eiri nimimi ambala kone wimi kone sialo.
2Go lalo eina mandaa angele menda lano. Wena menda ali na-kome pa aliandare gore rudule angeleme lalore Go wena nipuri nipuna ali rapu rambulipi lea. Go peapare ali komelea dinare ande rudule angeleme lalo Nipuna ali rapu raminyeke puma aripande eiri perelea lea. 3Go peapare nipuna ali pa ainya ali menda rapu aliandare gore go wena nipuri ali pake noae wena aya. Go peapare ali komena loma go rupa ali menda peleandare gore ale menda dia. 4Go einayandare nina amesinu nimi pange mendaa rupa. Nimiri Yesuna do rapu ambala raminyeke peme. Go einare nimiri ambala komeme eimi Rudule Angeleme nimi na-andere-aya. Nimiri ambiare ali menda rapu rambulimi. Go aliri ande dapa para komala ei minyapalaoma Godeme ma-rekaisaya. Go au pi auri naame Godena epepe aunu pamonoya pisaya. 5Naa naana ambala au rupara pa arima dinare ande Rudule Angelemere koae einu repara wee pambada aunu ma-rekao-aripa eiri naana do ruparanu suaripa. Go eimiri komala eina pupudengi nairi puarima. 6Go peapare ambiare naa komema einare Rudule Angeleme naa na-surumbea. Akepeare ambiare naa koraoma siambaripalere perelea. Naame go wape puma wisimiya Rudule Angele na-raluaema. Naame rali auri ambiare pena pora menda Godena Sipiridimi wada ei raidama.
Rudule Angelemere koae einu ma-epao-aya
7Go einare naame ambiare ake laminyayapae. Rudule Angelere koae einu rumbilia laminyayapae. Gupi na-laminya. Ora dia. Rudule Angelemenda go eiri koae ei lomanda na-wada payalore gore go eiri koae eiyana loma na-andola pawa. Rudule Angeleme lalo ara mendana alena wee na-pambape pinda na-dapayalore gore neme mendana alena wee pambape eina kone na-sula pawa. 8Ande Rudule Angele rupara koae eimi pora andasumare nina ruparare mendana alenu wee ma-pambao-aya. Rudule Angele diayalore gore koae aunu pape pora menda dia dapa. 9Rudule Angele menda kone na-wi arare ni na-kome pa aripu. Go pawapare ande mana angelenu kone sula epawa dinare koae ei pape eina kone sula epawa. 10Koae einu opolo epa dinare gore ni go romona komawa. Gupuma ande endoaya ei ma-andalapa mana angelemere ni reparare komala ei ma-eparipa. 11Gupumare ande mana angele rupara koae eimiri pora andomare ni makiraomare koae eimi ni luma ma-komaripa.
12Go einare ande Rudule Angele pange ande mana angele raidipuna koae ale menda na-ralea. Akepeare Rudule Angele pange mana angele laapo raidipuna Godeme gea. 13Go einare ambiare alea. Gonde epe aleme gole ni lu komayapae. Gupa diama. Koae eimi komea ni lu komaya. Go au pea eiri koae ei nipu ora penameyaluameyanda pea. Naame koae einu pea eiri ora kolea loma andomanayanda pea. Go einare ande mana angelena rupara piriri koae eimi gonde epeale gole wala koae ei ma-epao-aya.
Naana rupara yanda pia ei
14Ande Rudule Angelenuri Gode repara ipula. Go peapare niri komape ali ae. Go einayalo arare niri koae eina angele kama pangoayo ae. 15Neme puayo aunuri kone waru na-suayo. Akepeare nina rana pea aunu na-puayo. Go au na-piri wala nina rana na-pi aunu puayo.
16Go eina nina pi aunuri ni rana na-pi aunu pindare gore Rudule Angeleme lea angelenuri ora da lalo pawana ae. 17Go einare go nina rana na-pi aunu pi eiri neme koneme na-pi ae. Ni rupara wia koae einumi gole piae. 18Neme epe aunu pape einu menda nina rupara na-wia ae. Go lalo eiri nina amame ni mandu wia do ria ambia go aoma ayo eina rupara laloae. Epe aunu pape eina kone puaya einuri ni rupara wiapare neme go aunu manda pape-na-ya. 19Neme nina epe aunu pulameya kone suayo aunu menda na-puayo. Go au na-piri ande na-pape koae aunu puayo. 20Neme nina rana na-pe aununda puluandare gore go eiri neme koneme pulu ara na-pi ae. Ande nina rupara wia koae eimi pia ae.
21Go einare nina ruparare go au pea ei andalo. Neme epe aunu menda puluame pindare pa koae aunu pape pora kama wi da. 22Nina pu ruparare rana andaai pia. Akepeare Gode repara ipula Rudule Angele andoma. 23Go peapare nina ruparare au menda pia ei andalo. Nina koneme raname komea aunu rapu yanda dia aunu andalo. Go eimiri nina rupara wia koae aununa dipula ma-pirada. 24Niri kenda andaai muayo. Nina do riame ni komala ei go ma-andada. Niri apimi rambamiliayapae. 25Neme Gode repara ranae angele lalo. Akepeare Yesu Keriso ruparare nipumi ni rambamida. Go einare niri ambia gurupa ayo. Nina kunuma na purinare go au pi. Nina kone pea eimiri Godena Rudule Angelenu pangapeyapare nina do riamere koae einuna aunu pao-ayo ae.
Currently Selected:
Romo 7: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
