Penameyaya ei 1
1
1Go bukare Yesumi penameyaya aunu wia buka. Go aunuri reesi para Godeme nipuna wenaali repara pula pea aunu wadoame pisaya. Yesumi go aunu wale auri Dioni repara nipuna eindiolo ali rapado ara walisaya. 2Dionimi go andisaya aunu raayo lea. Go angelere Gode repara epea pange ande Godena angele Yesu Kerisome walisaya. 3Go buka wenaali repara yarepe adea alinu nipumi epe aunu andoalia. Go angeleme da aunu pangoma pualimi wenaalimi epe aunu andoalimi. Akepeare go aunu pula pea naarere repara ipula.
Dionimi andasu menda paranu Keriso wenaali para angele rapaya ei
4Ni Dionimi Esia andasu para mendane ki pereya mendane kina laapo andasu para aeme Keriso wenaali para go ramayo rapado.
Godeme yarame komala ei pange kuma pi ei nimi para ginya. Gode nipuri ambaisena aisaya pange ambia pange pa aya pange ora werepenu pange ora pa ao-alia. Ande Godena pupudengi nao-aeme mendane ki pereya mendane kina laapo Epe Yaakopi Remonumi nimi para pange kuma pi ei ginya. Go Remonuri Gode nipu piruaya seana lee wilina aeme. 5Yesu Keriso ora Godena angele loaya ali. Komeme wenaali na-reko-aemepare nipu komea ora ririna Ali rekisaya. Go suna aeme kini alinu raayo nipumi lu rambuaya. Nipumi nimi repara yarame komala ei pange kuma pi ei ginya.
Nipumi naa repara pu gea. Gupuma nipuna komea eimi naana koae einumi naa dipula memepare naa kepe rapaya. 6Naare nipumi ki rambuaoma pia wenaali aema pange Godena alinau puaeme wenaali aema. Godere ora aya pange nipuri puri pale ali ora paa ari pelea. Go angelere ora ae.
7Nipu repara koaa rapu rapu epelea ei andeleme. Nipu ma-liiame wenaali pange wenaali raayome nipu andeleme. Suna aeme wenaali raayome nipu andoma ree deme. Go ei ora pilia.
8Gode nipuri ora puri andaai wia. Gupuma nipumi gupi lea. Niri ririna Ali pange werepe ayo Ali lisaya. Ambaisena pange aripu ambia pange ayo. Werepe pange ora pa ari pola lea.
Dionimi Keriso andisaya ei
9Niri Dioni nimina Kerisona ameme lalo. Nimimi naleme rendaare neme pange nalo. Naa raayo Godena Ki Rambuao-aya wenaali aema. Go einare naa repara ipula kendanu pawa kuma pi rupa ri eiri bainya. Neme Godena angele walawanda pange Yesu nipumi wala ree aunu laripu eina ni yokorumbuma monde ipa piru kopoliaoma wia su menda nipuna bi Padamosi lee alena ma-pirarimi. 10Go dinare Godena naarena Godena Sipiridimi ni mea. Gupuma nina kou nane ara bu kenangeme wi waru andapu loma angele la ei pangawa. 11Go angele la alimi gupi la. Neeme go andale aunu raayo wape puma go lalo anda paranu rapa la ei pangawa. Go angele la alimi gupi la. Mo andanuri Epesusi, Simena, Pegamumu, Daiadara, Sadisi, Piladelapia pange Laodisia wape puma raparipa.
12-13Ni repara angele da ali apimi dapae lo andolame pawa dinare golome wari lamepa mendane ki pereyoma mendane kina laapopu kepana andiaoma ma-kopoliaoma rupara Alina Simi mandana ande ale menda runa aripa ei andawa. Nipumiri aka andalu pea ei pambo andalu paoma ange lee para minya laya. Gupuma golome wari ako nipuna ako mandaa yamisaya. 14Nipuna iriri yaa yakona irimi andea rupa yaako pupa puaya. Gupuma nipuna lee laapore kaloma repana lengame andaya.
15Nipuna ange laapore wambala liaoma kakesoro puma andae nono paya. Gupuma nipuna angele lalore ande ipa dau rombalanda da e manda ora andapu la.
16Nipuna popeke ki nanere kumba danganu mendane ki pereyoma mendane kina laapo ripinaya. Nipuna angaa parare bainasi rai mendane mendane nee aya ei sia aisaya. Gupuma nipuna lee angaare naare mandana roma rumbisaya. 17Neme nipu andomare nipuna ange para kome ro leale lopawa. Go pawa ei andomare nipumi nipuna popeke ki ni mandaa sumare ni para gupi la. Nee paalame na-komape la. Niri ririna pange werepena ayo Ali la. 18Ambia ni endoma ayo. Ambalande ni komawapare ambiare ni pa go ayonda. Ora pa ao-alua. Komala eina pora gape neme surumbe pange komaleme repaana anda pora gape neme surumbe. 19Go einare neme go andola pili aunu pange werepe pula pea aunu raayo wape pili. 20Nina popeke ki nane apo ambia go andale mendane ki pereya mendane kina laapopu kumba danganu andale einuna reere go ei. Mo mendane ki pereya mendane ki andasu andere-aeme eindiolo alinu manda. Gupuma mendane ki pereya mendane kina laapo pa golome wari lamepa andiame kepa andale eiri mo mendane ki pereya mendane kina laapo andasu para aeme Keriso wenaali manda.
Currently Selected:
Penameyaya ei 1: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
